பெற்றோரே! இது உங்களின் கவனத்துக்கு...

(தமிழ்த்தந்திக்காக )

பல்கலைக்கழகம் என்ற இலக்கு சின்னப்பருவத்தில் படிக்கும்போது தெரிவதில்லை அல்லது எண்ணுவதில்லை.
ஏதோ படிக்கிறோம், அல்லது படிக்கத் திணிக்கப்படுகின்றோம், என்ற நிலையில் எமது கல்விநிலை அனேகமானோரிடம் காணப்படுகின்றது.


ஐந்தாம் தரம் புலமைப்பரிசில் பரீட்சை என்ற கட்டாயத்துக்கும் பெற்றோரின் பெருமைகளுக்கும் என்றுமாய் முதலாவது திணிப்பு நாடகம் அரங்கேறுகிறது.

அப்பரீட்சையில்; பிள்ளைகளின் வயதுக்கு ஏற்ப அப்பரீட்சை போதுமானதாக இருந்தாலும், நமது நாட்டில் அனேக பிள்ளைகள் உடல், உள வளர்ச்சிகளில் முன்னேற்றம் காணப்படாதிருக்கின்ற நிலை பல பிரதேசங்களில் இருக்கின்றது.

இதற்கு எமது பிள்ளைகளின் வளர்ச்சிப்பருவங்களில் குழந்தைகளின் உடல் வளர்ச்சிக்குரிய சரியான போசணையளவு பேணப்பட்டு வளர்க்கப்படுவது குறைவு. இதற்காக இதுவரை சரியான சுகாதாரக் கட்டமைப்புக்கள் முறையாக ஆறு அல்லது ஏழு வயதுகளுக்கு மேல் இல்லை என்றே கூறத்தோன்றுகிறது.

சற்று பொருளாதார வசதி குறைந்த குடும்பப் பின்னணியில் உள்ள மாணவர்கள் இப்பிரச்சனைக்கு இயல்பாக உள்ளாக்கப்படுகின்றனர்.
நமது நாட்டில் நடுத்தர அல்லது அதற்கும் குறைந்த பொருளாதார வசதியுள்ள குடும்பத்தினரே கூடிய சதவீதத்தில் இருப்பதால், புலமைப்பரிசில் பரீட்சையானது பிள்ளைகளை மிகவும் கஸ்டத்துக்கும் அதிக மன உழைச்சலுக்கும் உள்ளாகக்கூடிய நிலையிருப்பது வருந்ததக்கதது. சாதாரணமாய் நாம் பார்க்கின்ற விடயம் இது.

இதற்கு ஒரு உதாரணமாக கடந்த பரீட்சையொன்றில் நடந்த உண்மையான விடயத்தை பகிர்கிறேன்.
'ஒரு மாணவன் வகுப்பில் கெட்டிக்காரன். அவனது பொருளாதார வசதிபடைத்த பெற்றோர் அவனை மிகவும் கஸ்டப்படுத்தியற்காக அவன் பரீட்சை மண்டபத்தில் சுட்டெண்ணை மட்டும் எழுதி விடைகளை எழுதாமல் வெறுமையாக கொடுத்திருந்தான்'. ஆய்வாக நிகழ்த்தப்பட்டதில் ஐந்தாம் தரத்தில் சித்தியெய்திய மாணவர்களில் அனேகம்பேர் உயர்தரத்தில் பல்கலைக்கழகத்தை தவறுகின்றனர்.

"பிள்ளைக்குரிய போதிய உடல் உளவளர்ச்சியையும் முறையான வழிகாட்டல்களையும் மேற்கொண்டால் எதுவும் வெற்றியே!."

ஐந்தாரம் தரத்திற்குப் பிற்பாடு பிள்ளைகளின் கல்வி வளர்ச்சியில்; ஆறாந்தரத்தில், தமது பிள்ளைகள் மீது பெற்றோர்கள் பெருமளவில் அக்கறை செலுத்தத் தவறுகின்றனர். காரணம் கடந்தவருடம் பிள்ளையை கூடுதலாகக் கஸ்டப்படுத்தியாச்சு, ஆகவே என்னவாவது தன்னாலான செயற்பாடுகளை செய்யட்டும் என்ற மனப்பாங்கு அனேக பெற்றோரிடம் இருப்பது வழமையான விடயம். இது பெற்றோர் விடும் தவறு.
பிள்ளையின் தொடர்ச்சியான கல்வியின் தொடரறா ஒத்துழைப்பில் கவனக்குறைவு நடக்கிறது. இதனால் பிள்ளைகள் தமது மேல்வகுப்புக்களில் கஸ்டமான கற்றல்களுக்கு உள்ளாகின்றமை உள்ளங்கை நெல்லிக்கனி.


பின்னர் கல்விப் பொதுத் தராதர (க.பொ.த) சாதாரணதரப் பரீட்சைக்கு ஆயத்தமாகும் தருணம். இது பிள்ளையின் முயற்சியும் பயிற்சியும் நிறைந்த நிலையிருக்கவேண்டிய தருணம்.
ஆனால் பிள்ளைக்கு சரியான ஒத்துழைப்பும் தொடர்ச்சியான கவனமும் தரம் பதினொன்றிலேதான் அதுவும் கடைசித் தவணையிலேதான் அனேக பெற்றோரிடமிருந்து கிடைக்கின்றது. இதனால் பிள்ளைகள் மிகச்சிறந்த பெறுபேறுகளைப் பெறத்தவறுகின்றனர்.

உண்மையில் பெற்றோரின் தொடர்ச்சியான கண்காணிப்பு தரம் ஆறிலிருந்து ஆரம்பமாகவேண்டும். பிள்ளைக்கு எழுதத்தெரிகிறதா, வாசிக்கமுடிகிறதா, ஏதாவது பிரச்சனை பிள்ளையின் கல்வியில் இருக்கிறதா? பிள்ளைகளுக்கு ஏதாவது உடலியல் அல்லது உளவியல் பிரச்சனைகள் இருக்கின்றதா,? என்றெல்லாம் பிள்ளைகளோடும் பாடசாலையில் ஆசிரியர்களோடும் கதைத்து; பிரத்தியேக வகுப்புப் பாட ஆசிரியர்களுடன் தொடர்பாடல்களை மேற்கொண்டு பிள்ளைநேயக் கல்வியை ஊட்டவேண்டும்.

அக்காலகட்டத்தில் மொழியறிவு மீது அதுவும் தான் கல்விபயிலும் தாய்மொழிமீது சரியான வாசிப்பும் எழுத்தாற்றலும் இருக்கின்றதா என்பதை உறுதிப்படுத்திக்கொள்ளவேண்டும். காரணம் மொழியறிவில் குறைவு ஏற்படும் பட்சத்தில் பிள்ளைகள் ஏனைய பாடங்களை சரியாகக் கற்க முடியாது. மேல்வகுப்புக்களில் பிள்ளைகள் எதிர்நோக்கும் பாரிய சவாலாக இது காணப்படுகின்றது.

பிள்ளை தரம் ஒன்பதிற்கு உயரும்போதே, அடுத்தது க.பொ.த. சாதாரண தரப்பரீட்சை. அதன்பின்னர் பிள்ளையின் எதிர்காலம், எதிர்காலத்தில் எந்தத்துறையில் பிள்ளைகள் முன்னேற முடியும், தெரிவுசெய்கின்ற துறையில் பாடங்களின் தெரிவு எவ்வாறு அமையவேண்டும் என்றெல்லாம் பிள்ளைகளுக்கு, பெற்றோர் ஆசிரியர்களுடன் சேர்ந்து இதுபற்றிய கூடுதலான அறிவுறுத்தல்களையும் அனுபவப் பகிர்வுகளையும் பெற்றுக்கொள்ளவேண்டும்.

இது பெரும்பாலும் நடைமுறையில் இல்லை காரணம் தற்போதைய நிலையில் தரம் பத்தில் மூன்று வகை தொகுதிப்பாடங்கள் காணப்படுகின்றன. இவற்றை பிள்ளை என்ன என்ன பாடம் இப்பாடத்தை என்னால் கொண்டுசெல்ல முடியுமா என்கிற எண்ணம் எல்லாம் இல்லாமல் படித்து, பின்னர் குழப்ப நிலையடைவது கண்கூடு. இதற்காக தமது பிள்ளையின் கல்விநிலையை கண்காணிப்புடன் இருக்கவேண்டியது அத்தனை பெற்றோரினதும் தலையாய கடமை.

இதற்கு மேலதிகமாக பிள்ளைகள் தரம் ஒன்பதிலே கற்கும் போதே, தமது எதிர்கால உயர்தரக் கல்வி பற்றிய மேலெழுந்தவாரியான விளக்கமாவது பிள்ளைக்கு இருக்கவேண்டும். இதில் ஆசிரியர்களும் பெற்றோர்களும் கவனம் செலுத்தவேண்டியது கட்டாயம்.
உயர்தரம் பற்றிய பரந்த எண்ணப்பாங்கு பிள்ளைகளுக்கு வழங்கப்படவேண்டும்.
ஏனெனில் க.பொ.த சாதாரண தரத்தில் பிள்ளைகள் பரீட்சை எழுதியவுடனேயே உயர்தரப் பரீட்சைகளுக்குரிய பிரத்தியேக வகுப்புக்கள் ஆரம்பமாவதால் திடீரென முடிவெடுத்து (அனேகமாக நண்பர்களுடன் கூட்டாக) ஏதாவது ஒரு துறையில் (கலை, விஞ்ஞான,வர்த்தக) உயர்தரக் கல்வியைத் தொடருகின்றனர்.

இதனால் பிள்ளைகள் சரியான துறையைத் தெரிவுசெய்யாததால் பிள்ளைகள் க.பொ.த. உயர்தரப் பரீட்சையில் மிகச் சிறப்பான முடிவுகளை அதாவது பெறுபேறுகளை ஈட்டிக்கொள்ளத் தவறுகின்றார்கள். சிலபிள்ளைகள் உயர்தரவகுப்பில் முதலாம் வருட இடைநடுவே தமது கற்கை நெறியை மாற்றிக்கொள்வதும் இவ்வாறன சரியான தெளிவின்மையே.

இதன்காரணமாக மீண்டும் பெற்றோர் பிள்ளைகள் மீது தங்களது வெறுப்புணர்வுகளைச் சித்தரிக்கின்றனர். பிள்ளைகள் மீது குற்றம் சொல்லி கவலைப்படும்போதும், பிள்ளைகள் தங்களுக்கு தெரியாமல்போயிற்று இப்படியெல்லாம் பல்வேறுவிடயங்கள் இருக்குதென்று இப்பதான் எல்லாம் தெரியுது என்று சொல்லியழுவதற்கு முன்னரே திட்டமிடுங்கள் பெற்றோரே.

இதற்காக பிள்ளைகளை தரம் ஒன்பதுக்கு பிறகு சுயமான கற்றலுக்கும் கூடுதலான வாசிப்புப் பயிற்சிக்கும் ஒவ்வொரு பாடங்களின் வினாக்களுக்கான கூடுதல் பயிற்சிகளுக்கும் தெளிவான கற்றல்லுக்கும் ஆன வாய்ப்புக்களை வழங்குங்கள். அதிக நேரம் பிரத்தியேக வகுப்புக்களுக்கு பிள்ளைகளை விட்டு படித்த விடயங்களை படிப்பதற்கு நேரம் இல்லாமை என்கிற நிலைமை ஏற்படா வண்ணம் பிள்ளைகளை படிப்பியுங்கள்.

பிள்ளைகளுடன் அன்பாகவும் ஆறுதலாகவும் இருக்கக் கற்றுக்கொள்ளுங்கள். மிகவும் கஸ்டமானதும் எளிதுமானவிடயம் கற்றலே என்று கற்றுக்கொடுங்கள். விசாலமான எண்ணப்பாங்குகளை பிள்ளைகளுக்கு ஊட்டுங்கள். பிள்ளைகளோடு சேர்ந்து பிள்ளைகளுக்காக நீங்களும் படியுங்கள். உங்களுக்கு தெரியாத பாட விடயங்களை பிள்ளைகளுக்கு வேறு சரியானவர்கள் மூலம் சொல்லிக்கொடுக்க உதவுங்கள்.

"பிள்ளைகளின் கல்வி என்பது உங்களுக்கு மட்டுமல்ல சமுதாயத்துக்கும் நாட்டுக்கும் அவசியமாக இருக்கின்றது."

ஒரு சமூகம் அபிவிருத்தி காணவேண்டுமெனில் முதலில் சிறுவர்களின் கல்வி விருத்தியடைய வேண்டும். ஒரு பிள்ளை தனது ஆரம்பக்கல்வியை தனது ஐந்து,ஆறு,ஏழு,எட்டு வயதுகளிலாவது மேற்கொள்ளவில்லையாயின் தனது வாழ்க்கையின் கல்விகற்றலின் பெருமான்மையை இழக்கநேரிடுகிறது.

ஆக, பெற்றோர்களும் ஆசிரியர்களும் சேர்ந்து பிள்ளைகளுக்கு கல்வியில், வெறுப்புணர்வு ஏற்படா வண்ணம் ஆர்வமான முறையில், கல்விகற்றலின் சில பொருத்தமான நுணுக்கங்களை சொல்லிக்கொடுக்கவேண்டும். இது ஒவ்வொருவரின் கடமை. எங்களிடம் எஞ்சியிருக்கின்ற ஒரே ஒரு ஆயுதம் கல்வி. வளருங்கள்.

வேலைத்தளங்களும் மாற்றங்களும்

ஒவ்வொரு மாற்றம் எப்பொழுதும் வந்துகொண்டே இருக்கும். இருக்கவேண்டும்.
வாழ்க்கையின் ஒவ்வொரு படிகளும் கற்றுத்தரும் இந்த மாற்றங்கள் வாழ்வில் மாற்றங்கள் தேவை என்பதை உணர்த்தும்.

மாற்றங்கள் சிலவேளை சந்தோசச் சாரல்களைத் தூவிச்செல்லும். சிலநேரம் கண்ணீர்ப்பூக்களால் அர்ச்சிக்கப்பட்டுக்கொண்டிருக்கும்.

ஒரு ஸ்டேடஸ்,
"ஒவ்வொரு கூலியாளும் கவனமான படிப்பினைகள் மூலம் என்றோ ஒரு நாள் முதலாளியாகணும். மாற்றங்கள் எப்பொழுதும் தேவை."
ஒரு நிறுவனத்தில் அல்லது ஒரு வேலைத்தளத்தில் வேலைசெய்யும்போது ஒரு முதலாளி அல்லது முகாமையாளர் போன்ற ஒருவர் மூலமே அதிக கட்டளைகள் பிறப்பிக்கப்பட்டு பலவேலையாட்களால் அந்நிறுவனம் அல்லது வேலைத்தளம் இயங்கிக்கொண்டிருக்கும். பல்வேறானவர்களின் மனிதஉழைப்பு அதாவது அடிமட்ட வேலையாட்களாலே உயர்மட்ட முகாமைத்துவம் சிறக்க நிறுவனம் திறனாக இயங்கும்.
இங்கு மூளையைச் சலைவை செய்து தொழில்வாண்மைமிகு அனுபவமுள்ள முகாமையாளராலேயே நிறுவனத்தை மிகச்சிறப்பாக கொண்டுசெல்ல முற்படமுடிகிறது. ஆனால் பல்வேறு அடிமட்டங்களில் சிந்தும் வியர்வை உண்மையில் சிவப்பு இரத்தங்களாலே இயங்கப்படுகிறது என்பதை ஏற்றுக்கொண்டும் ஏற்றுக்கொள்ளாததன்மையால் நகர்கிறது.

இதற்காகவேண்டி மாறங்கள் அவசியம். அந்த வேலைத்தளத்தின் அடிமட்டத்தில் வேலைசெய்பவன் அல்லது அவனது பிள்ளை உயர்மட்டம்வரை செல்லவேண்டிய அவசியமும் தேவையும் இருக்கிறது. இங்கே மாற்றங்கள் ஒரு வஞ்சனையோடு அல்லது வாஞ்சியோடு வளரவேண்டியதில்லை. மாற்றங்கள் உணர்ந்து சிறப்பான சேவையாற்றி பல்வேறு திறமைகளை வெளிக்காட்டுவதன் மூலம் கொண்டுவரப்படவேண்டியதே.

ஏனெனில்,
'அரசசேவையில் 20 வருட சேர்விஸ் 30 வருட சேர்விஸ் என்றெல்லாம் பலர் சொல்லுவதைக் கேள்விப்பட்டிருப்பீர்கள்.
இஙகு அவர்சொல்லிய அந்த வருடங்களில் உழைத்த உழைப்பு வினைத்திறனாய் அமைந்திருக்காது. திறனாக இருக்கலாம். அதற்காக அதற்காக முழுமையானவர்களாக அவர்களை ஏற்றுக்கொள்ள முடியாது. அதேபோல் மிகத்திறமைசாலிகள் என்றும் தம்பட்டமடிக்க முடியாது.

எந்தவொரு வேலையிலும் மாற்றங்கள் தேவை. ஆக அந்த மாற்றம் தான்வேலைசெய்யும் தளத்தில் உயர்வடையச் செய்யும் மாற்றங்கள் வரவேற்கப்படவேண்டிதும், அவர்களை அதே வேலைத்தளத்தில் சிறப்பான முன்னெடுப்புகளையும் முயற்சிகளையும் சிறப்பாக மேற்கொள்ளத்தூண்டும்.

ஆனாலும் ஏறத்தாழ 5 - 8 வருடங்கள் வரையே ஏதாவது ஒரு துறையில் இருத்தல் சிறப்பாக, நமது வேலைகளையும் நமது திறமைளையும் வினைத்திறனாகவும் (Efficiency), விளைதிறனாகவும் (Productivity) வெளிக்காட்டமுடியும்.

இதன்பின்னர் வேறுதுறையில் அல்லது முன்னேற்றகரமான நிலையில் வேலையைச் செய்வோமானால் இதோ வினைத்திறனையும் விளைதிறனையும் பெற்றுக்கொள்ள முடியும் நல்ல படிப்பினைகள் (Lesson Learning) மூலம்,
இதனால் எந்நவொரு வேலையிலும் கூடியகாலம் இருந்து அலுப்பறைகளைக் நமக்கும் மற்றவர்களுக்கும் கூட்டிக்கொள்ளாமல் நாங்கள் களைப்படையாமல் மகிழ்ச்சியான சிந்தனையுடன் மிகச்சிறப்பாக பணியாற்றலாம் இல்லையா? ஒரே வேலைத்தளத்தில் தொடர்ந்திருக்கும் போது பல்வேறு மனஉழைச்சலுக்கும் அழுத்தங்களுக்கும் உள்ளாக வேண்டியேற்படும். இதனைத்தவிர்ப்தற்கு மிகச்சிறந்த மருந்தே "மாற்றங்கள் உணரப்படவேண்டும்"(Feel the change) என்பதாகும்.


இதற்காக 'இத்தின வருச சேர்விர்ஸ்' என்று மொக்கை போடாம இந்தக்காலம் என்னுடைய காலம் என்று சொல்லக்கூடியவாறு செயலாற்றல் சாலச்சிறந்தது எனக்கருதுகிறேன்.
மாற்றங்கள் அவசியம் தேவையல்லவா,??

செட்டியூர் கண்ணகை அம்மன் ஆலயம் - சடங்கும் வழக்குரையும் 02

வைகாசி பொறந்தாலே( பிறந்ததும்) வெயில் நீங்கி இதம் குளிரும் குளிர்த்திப்பாடல்களால் நிலம் நனையும் என்று ஆதங்கப்பட்டு வாழும் ஈழத்திருநாட்டார்.

கிராமங்கள் தோறும் கண்ணகை அம்மன் கோயிலும் அதன் திருவிழாவாக பெயர் பெறும் சடங்குமுறைகளும் சிறப்புப்பெயர் கொண்டழைக்கின்றோம்.
தமிழ் இலக்கிய வரலாற்றின் மரபிலக்கியங்களாக இந்த சிற்றிலக்கியங்களின் நீட்சியாக அம்மன் பாடல்கள் மண்சார் வெளிப்படையாகவும் காணப்படுகின்றன. இங்கு குளித்திப்பாடல்கள், காவியப்பாடல்கள், தாலாட்டு, மான்மியம், ஊஞ்சல் என்று பலவகையான பொக்கிசங்களாக மரபுவழிச் சின்னங்களாக இருக்கின்றன.

"அன்று தொட்டுப் பாண்டியநாடு மழைவறங்கூர்ந்து வறுமை எய்தி வெப்பு நோயும் குருவும் தொடரக்கொற்கையிலிருந்த வெற்றிவேற்செழியள் நங்கைக்குப் பொற்கொல்லராயிரவரைக் கொன்று களவேள்வியால் விழாவோடு சாந்திசெய்து, நாடுமலிய மழைபெய்து நோயுந் துன்பமும் நீங்கியது"
- சிலப்பதிகார உரை

இந்த சிலப்பதிகாரத்திலேயே கண்ணகி காரணமாக வெம்மைநோய் வந்துநீங்குதல் பற்றி கூறப்பட்டுள்ளது. வைசூரி, குக்கல், வெப்பு, சின்னம்மை, வயிற்றுக்கடுப்பு, கண்ணோய, பெருஞ்சுரம், மங்கமாரி போன்ற சூட்டுநோய்கள் கண்ணகி அம்மனின் கோபத்தினால் பரவுவதான எண்ணப்பாடு ஐதிகம் இங்கு உள.

இதனால் காளியின் அம்சமான கண்ணகித் தாயிக்கு நேர்த்திக்கடன் செய்தலை வழக்கமாகக் கொண்டு வழிபாடு செய்தல் இன்றும் இருக்கும் மரபு.

இதற்காக மற்றும் குழந்தைப்பேறு, மாங்கல்ய வரன் என்றும் பல்வேறு வேண்டுதல் என்றும் அவைகளுக்கெல்லாம் நேர்த்தி வைத்து மடிப்பிச்சை எடுத்தல், காவடி எடுத்தல், அலகிடுதல், கற்பூரச்சட்டி எடுத்தல் என்றும் சடங்கு காலத்தில் பொன்னாலும் வெள்ளியிளாலும் செய்யப்பெற்ற கண்ணுருவங்குளம் கண்மணிகளும் அம்மனுக்குக் காணிக்கையாகச் சமர்ப்பித்தல் அடயாளப்பொருட்கள் என்றழைப்பர்.

இரவுவேளையிலும் நேர்த்திக்கடன் செலுத்த வந்த ஆசான்

அடயாளப்பொருட்களை பெறுவதில் மக்கள்

திராவிடப்பண்பாட்டில் முக்கியத்துவம் பெற்ற சக்தி வழிபாட்டினையே கிழக்கிலங்கையில் பிரசித்திபெற்ற கண்ணகியம்மன் ஆலயங்களில் காணலாம்.

நமக்கு செட்டிபாளையம் கண்ணகை அம்மன் ஆலயமே மிகப்பிரசித்திபெற்று விளங்குகிறது. எங்கள் ஊரில் ஒவ்வொரு ஆலயம் இருந்தாலும் இக்கண்ணகி அம்மன் ஆலயம் மிகச்சிறப்புப் பொருந்தியது காரணம் இவ்வாலயத்தில் கிரான்குளம், குருக்கள்மடம்,செட்டிபாளையம், மாங்காடு, தேத்தாத்தீவு, களுதாவளை ஆகிய ஊர்களைச்சேர்ந்தவர்களும் ஒன்றாகச் சேர்ந்து சடங்குகளை நடத்துதே.

இச்சடங்கு காலகட்டத்தில் கிராமங்களில் மஞ்சள் தட்டக்கூடாது; மாவிடிக்கக்கூடாது2 புலால் உண்ணக்கூடாது; இப்படி பலத்த பாரம்பரிய கட்டுப்பாடுகள் உள்ளன.அவை இன்றும் பண்பாடு ரீதியாகக் கடைப்பிடிக்கப்பட்டுவருகின்றமை அம்மனிலுள்ள பயபக்தியைக் காட்டுகிறது என்றே சொல்லத்தோன்றுகிறது.

கண்ணகை அம்மன் சடங்கு என்றாலே மனசுக்கு என்னமோ இதமான மகிழ்ச்சியான உணர்வு இப்பிரதேச ஊர்மக்களுக்கு வருவது இயல்பு. காரணம் கண்குளிரும் மனம் மகிழும் பல நிகழ்வுகள் நடந்தேறுவதே.

முதல்நாள் - கதவு திறத்தல்

முதல் நாள் கதவு திறத்தல் என்று அழைப்பர். அம்மன் கோயில் சடங்கு ஆரம்பம் என்பதைக்குறிக்கும் நாள். இந்நாள் எப்போ வரும் என்று ஏங்கிக் கேட்டு அம்மாவைக் குடைதலே இவ்விழாவின் சந்தோசத்தை அதிகரிக்கும். எங்கட செட்டியூர் கண்ணகை அம்மன் ஆலயச்சடங்கின் கதவுதிறத்தல் கிரான்குளம் மக்களால் நிகழ்த்தப்படும்.

சடங்கு

சடங்கு என்ற சொல் அம்மனுக்கு நடக்கும் பூசையைக்குறிக்கும். இங்கே உடுக்கு வாத்தியங்களோடு அம்மன் காவியம் பாடுதல்,உடுகுச்சிந்து பாடுதல் அம்மானைக்காய், சிலம்பு என்பவற்றை கிலுக்குதல் (குலுக்குதல்), குரவைபோடுதல், அவ்வேளையில் ஆலத்தி எடுத்தல் என்பனவைகளும் அடங்குகின்றன.
நாள்தோறும் மதியம்(பகல்), இரவு பூசைகள் சடங்குப்பூசையாக கொள்ளப்படும்

கல்யாணக்கால் சடங்கு

கல்யாணக்கால் சடங்கு தேற்றாத்தீவு மக்களுக்கு உரிய சடங்காக அமைகிறது செட்டிநகர் கணணகை அம்மன் ஆலயத்தில்.
கல்யாணக்காலினை பூவரசுகம்பம் ஒன்றினை ஆலயமண்டபத்தினுள் நட்டு ஆடை அலங்காரம் அணிகலன்காலால் ஒரு பெண்ணென கோலம் செய்து கண்ணகை அம்மனாகப் பாவித்து கோவலனார்க்கு திருமணம் செய்துவைத்தல் அதற்குரிய பாடல்களோடு வழிபட்டு சடங்கு செய்தல் இன்றும் வழக்கு.

குளுத்தி
தினமும் முறையான சடங்கு நடந்தேற இறுதிநாளில் நடைபெறும் நிகழ்வே "குளுத்தி" என்று அழைப்பர். குளித்தியிரவு சடக்கும் சடங்கிலே பொங்கலிடுதல் முதன்மையாகவும் பொங்கல் விழா முடிவுற சுண்ணமிடித்தல் இதமான நிகழ்வாக அமையும். பின்னர் குளுத்திப் பாடல் படிக்கத் தொடங்கி அம்மனின் கோபங்கள் தணியச்செய்து "வாழி" எனும் பாடல்கள் பாடப்படும். அம்மனை வரம்வேண்டிப் வாழ்த்தும் சேர்ந்து பாடும்பாடல்களாக அமையும்.
கடைசியில் "பாணக்கம்" வழங்கப்படும் இதனை குளுத்திப்பாணக்கம் என்றழைப்பர். இது ஓர் அமிர்தமாக சுவையேறியதாக இருக்கும்.
இவ்விழா செட்டியூர் கண்ணகை அம்மன் ஆலயத்தில் களுதாவளைவாழ் மக்களால் நிகழ்த்தப்படுகிறது.


வழக்குரை

மட்டக்களப்பிலே கண்ணகி கோயில்களில் கண்ணகி வரலாற்றுரைப்பதாக அவள் பெயராலோ, இளங்கோவடிகள் பெயராலோ, அவள் உரைத்த வழக்கின் பெயராலோ கொண்டமைந்த "வழக்குரை" என்றும் "வழக்குரைக் காவியம்" என்று அழைக்கபடும் காவியம் தினந்தோறும் பகலில் பாடுவது சிறப்பு.
மட்டக்களப்பின் இலக்கியச் செல்வமாக இந்த வழக்குரைக் காவியமானது சிலம்பிலே காணும் கண்ணகியை பிறப்பிலிருந்தே தெய்வநிலைசேர்ந்து வளர்ந்துவரும் ஒன்றாய் பல வேறுபாடுகள் கொண்ட கதையாய் உடையதாய் காணப்படுகிறது.

இன்று காலையில் பாடும் போது..

வசந்தன் ஆடல்

"வசந்தன்", "வசந்தன் கூத்து" என்று அழைக்கப்படும் கூத்து மரபு இன்றும் வழக்கில் உள்ளது. அனேகமாக கண்ணகை அம்மனின் சடங்கிலே இவ்வாடல் நிகழ்த்தப்படுவது வழக்கம்.
செட்டியூர் கண்ணகை ஆலயத்தில் தேற்றாத்தீவு மக்களின் பூசை நாளில் தேற்றாத்தீவு பிள்கைகளால் ஆடப்படுவது இயல்பும் சிறப்பும்.

தண்ணீர்ப்பந்தல்

ஒவ்வொரு கிராமத்திலிருந்து நடைநடையாக வரும் அடியார்களுக்கு வெயிலில் தாகத்தைப்போக்கும் முகமாக வீட்டுக்கு முன் வேலியோரங்களில் தண்ணீர் குடங்கள் வைத்திருக்கும் தன்மை இம்மக்களின் தொன்றுதொட்டு வாழவைக்கும் தன்மையை எடுத்துக்காட்டி நிற்கும். இதைவிட சந்திகளிலும் கோயில்களிலும் தாகசாந்தி செய்யும் நிலையமாக தாகசாந்தி நிலையம் அமைக்கப்பட்டிருக்கும்.

மடிப்பிச்சை எடுத்தல்
மடிப்பிச்சை எடுத்தல் அம்மன் ஆலயம் என்றாலே பெண்களுக்கு நேர்த்திக்காகவும் அம்மனுக்கு வேண்டுதலுக்காகவும் வீடு வீடாய் சென்று ஒற்றைப்படை இலக்கத்தில் 5 அல்லது 7 அல்லது 9 வீடுகளுக்குச் சென்று "கண்ணகை அம்மன் பேரால மடிப்பிச்சை போடுங்கோ" என்று அம்மனுக்கு தமது சேலையின் முந்தனையில் எடுத்து வேப்பிலையின் துளிரிலைகளை தலையில் சூடி கையிலும் எடுத்துக்கொண்டு நெல்லைச் சுமந்து வெற்றுக்கால்களுடன் கோயிலுக்கு சென்று அவற்றை கொடுத்தல் இப்பொழுதுகளிலும் நடைபெறுகிறது.
இம்மடிப்பிச்சை எடுப்பதற்கு சிறுபிள்ளைகளும் ஆயத்தம்கொள்வது அவர்களுக்கு அளப்பரிய சந்தோசத்தை ஏற்படுத்தும்.
இன்று காலையே நமது மருமகளொருத்தி ஆரம்பிச்சுட்டாள் பாருங்க

தோரணம் கொண்டுவருதல்

கோயில் அலங்கார வேலைகளில் ஈடுபடும் இளைஞர்

கடைத்தெரு

மனதை உருக்கும் பறவைக் காவடிகள்

காலையில் காவடி எடுத்தல்

செட்டியூர் கண்ணகை அம்மன் காவியம் நேற்று (12-06-2011) எமது சண்.இன்பராஜனால் பாடப்பட சிவகுரு தணிகசீலனால் இசைக்கோர்வை செய்யப்பட்டு இந்து இளைஞர் மன்ற செயலாளர் த.விமலானந்தராஜாவினால் அம்மன் ஆலயத்தில் வெளியிடப்பட்ட இறுவட்டிலில் உருவான பாடலை கேளுங்கள்.




இன்று இரவு குளுத்தி நிகழ்வுடன் இனிய நாட்கள் விடைபெறும் அடுத்தவருடம் வரை தித்திக்கும் நினைவுகளுடன்.

இங்கு செட்டிபாளையம் கண்ணகை அம்மன் படங்களைக் பாருங்கள்


உசாத்துணை நூல் : மட்டக்களப்புத் தமிழகம் வித்துவான் வீ.சி.கந்தையா

சடங்கும் வழக்குரையும் 01

கண்ணகை அம்மன் என்றாலே மட்டக்களப்புக்கு மிகவும் சிறப்பும் பெருமையும் அமைவது மகிழ்ச்சி.
கண்ணகி என்று சிலம்பினுள் வரும் இங்கே கண்ணகை என்ற சிறந்த பொருளாக திரிபுற்றது காண். கண்- நகை என்ற இரு சொற்களின் சேர்க்கையான கண்ணின் ஒளி கண்ணுக்கு அணிகலன் ஆக பொருள்பொதிந்து வழிபாட்டுக்கும் சடங்கு என்ற பதங்களால் ஆன கிராமத்து மண்ணின் பெருமையும் சிறப்புமாய் அமைகின்றது. "சடங்கு" என்றுரைத்தல் அம்மன் கோயில்களில் நடக்கும் பூசையினைக் குறிக்கும் இதனால் கண்ணகையம்மன் சடங்கு என்று அழைக்கப்படும் இவ்விழா வருடந்தோறும் வைகாசி வளர்மதி நாட்களில் இடம்பெறும்.
கதவு திறத்தல், என்ற சொற்பதத்தால் ஆரம்ப விழா முதல்நாள் சடங்காக அமையும். நாள்தோறும் மதியம்(பகல்), இரவு பூசைகள் சடங்குப்பூசையாக கொள்ளப்படும். உடுக்கு வாத்தியங்கும் சிலம்பு ஓசையும் சேர்ந்து அம்மன் காவியம் உடுக்குச் சிந்து பாடுதல், கல்யாணக் கால் சடங்கு, என்பனவும் இங்கு சிறப்பானவை. சடங்கு நாட்களில் நேர்த்திக்கடனாக பல சிறப்பான பக்திபூராக அடியார்கள் வழிபடுவர் அம்மனை.
செட்டிபாளையம் அம்மன் கோயில் என்றாலே எங்கள் பிரதேசத்தில் ஊரில் வெகு சிறப்பாக ஒரு கொண்டாட்டம். இங்கு கண்ணகை அம்மன் காவியம் சிறப்பு இங்கு போய் காண்க இந்த பாடல்
இப்பாடல் எமது மண்ணின் சிறப்புப் பொருந்திய ச.இன்பராஜன் அவர்கள் பாட இசைச்சேர்க்கை ஒலிப்பதிவை தணிக சீலன் அவர்கள் உருவாக்கத்தில் அமைந்தது சிறப்பே..

"கா" கொண்ட செந்தமிழ் நாடு...

ஏய் பல்லேலக்கா பல்லேலக்கா
சேலத்துக்கா மதுரைக்கா மெட்ராசுக்கா
திருச்சிக்கா திருத்தணிக்கா
ஏய் …பல்லேலக்கா
ஒட்டு மொத்த மக்களுக்கா

இந்த சிவாஜிப் பாடல் கேட்கும் போதே இந்த "கா" பற்றி ஒரு அருமை இருக்கு என எண்ணலாம்.

"இலங்கைப் பேச்சுத்தமிழ் பிரதேச அடிப்படையிலேயே பல கிளை மொழிகளாக ஆராய்ப்படுகின்றது. யாழ்ப்பாணத் தமிழ், மட்டக்களப்புத் தமிழ் என்பன எவ் வகையான நோக்கினும் அக்கிளை மொழிகளுள் முக்கியமானவை. இந்திப்பேச்சுத் தமிழோடு ஒப்பிடும்போது இலங்கைப்பேச்சுத் தமிழ் செந்தமிழுக்கு மிகவும் அண்மையில் உள்ளது. இலங்கைப் பேச்சுத் தமிழில் எந்தக்கிளைமொழி செந்தமிழ் பண்புடையதென்ற வினா எழுகின்றது. யாழ்ப்பாணப்பேச்சுத் தமிழே மிகவும் செந்தமிழ்ப் பண்புடையதென்ற கருத்து 1918 ஆம் ஆண்டு ஹோர்னல் (Hornell) என்பவரால் வெளியிடப்பட்டுள்ளதாக கூய்ப்பர் (Kuiper) தெரிவித்துள்ளார். மட்டக்களப்புத் தமிழே மிகவும் செந்தமிழ்ப் பண்புடையதென்ற கருத்து 1966 ஆம் ஆண்டில் கமீல் சுவெலபில்லினால் (Kamil Zvrelebil) வெளியிடப்பட்டுள்ளது. இத்தகைய பெருமையுடையது மட்டக்களப்புத் தமிழ்" என்று பேராசிரியர் ஆ. வேலுப்பிள்ளை குறிப்பிடுகிறார்.

பேராசிரியர் ஆ. வேலுப்பிள்ளை அவர்கள் பற்றிய குறிப்புக்களை முனைவர் மு.இளங்கோவன் குறிப்பிடுவதை இங்கே காண்க.


மிகப்பழைய விளிப்புப் பெயர்களையும் அசைச்சொற்களையும் கொண்டுள்ள மொழிவழக்கு இன்றும் மட்டக்களப்புத் தமிழ்வழக்கில் காணலாம். பேச்சுவழக்கிலே தமிழ் எழுத்து வழக்கையும் இலக்கியச் செம்மையையும் காணலாம்.

"இலக்கிய வழக்குச்சொற்களில் இடம்பெறும் சில ஒலிகளுக்குப் பதிலாக பேச்சுவழக்கில் வேறு சில ஒலிகள் இடம்பெறுவது "இருவழக்கு" மொழிகளிற் சாதாரணமாகக் காணப்படும் ஒரு மொழியியற் பண்பாகும். தமிழ் இலக்கியவழக்குச் சொற்களிலும் படுவான்கரைத் தமிழ்ச் சொற்களிலும் இடம்பெறும்" என முனைவர் அ.சண்முகதாஸ் படுவான்கரைத் தமிழ் பற்றி கட்டுரையில் குறிப்பிடுகிறார்.

"புள்ளலெக்கா புள்ளலெக்கா - உன்ர
புருசனெங்க போனதுகா
கல்லூட்டுத் திண்ணையில
கதைபழகப் போனதுகா"

என்று மட்டக்களப்பு நாட்டுக்கவி வழக்கில் "கா" என்னும் அசைமொழி இரு பெண்களின் வினாவிலும் விடையுமாய் வந்திருக்கிறது. இங்கு "வீடு" என்ற சொல் மருவி "ஊடு" என கல்லூடு என்ற தொடரில் வருகிறது.

"யா, கா, பிற, பிறர்க்கு, அரோ, போ, மாது என வரூஉம்
ஆயேழ் சொல்லும் அசைநிலைக் கிளவி" - சொல் 279

என்னும் தொல்காப்பியர் சூத்திரத்தில் காட்டப்பட்டுள்ள ஏழு அசைச் சொற்களும் பண்டை செய்யுள் வழக்கில் இருக்கிறது.

நன்னூலில் கலித்தொகையுள் "காண்டி" என்னும் முன்னிலைவினை சேர்ந்து "கா" என்ற அசைநிலைச் சொல் இருந்தது எனவும் பின் மருவியதாகவும் சொல்லப்படுகிறது.
ஆயினும் மட்டக்களப்புத் தமிழகத்திலே செய்யும் வழக்கிலும் பேச்சுவழக்கிலும் "கா" காணலாம். "கா" என்ப உயர்ந்தோர் வழக்காக அமைக்கப்பட்டதை நன்னூலில் காணலாம்.
"காண்டிகா கால்கள் கழலுமே" என்பது மட்டக்களப்பு புலவர்மணி அவர்களின் 'பகவத் கீதை வெண்பாவின் ஓரடி ( மட்டக்களப்புத் தமிழகம் - பண்டிதர் வீ.சி. கந்தையா)

தமிழில் தொல்காப்பியர் காலத்து அசைநிலை இடைச்சொற் பிரயோகம் இன்றும் வழக்த்திலுள்ளது இம்மொழிவளம் இன்னும் சங்கத்தின் தொடர்பாய் அமைவது சிறப்புப்பொருந்திய தமிழின் சிறப்பு.

"மட்டக்களப்பிலே ஆடவர் தோளிலும் கா
அரிவையர் நாவிலுங் கா" என்ற ஒரு தமிழறிஞர் குறிப்பிட்டுள்ளார் (பக்.19, மட்டக்களப்புத் தமிழகம்)
"மறுகா" - மறுகால், பிறகு என்று பொருள்படும்.

இன்னும் இப்பொழுதும் தாயை விளிக்கும் " கோ" "கா" என்று காணலாம்.
'அம்மா! கோ!! வாவங்கா...வாகா! " என்பது அம்மா வா அம்மா என்பதைக்குறிக்கும்.

அரிசிக்காரி குத்தரிசி மூடையைச் சுமந்த வண்ணம் " அரிசிரிக்கே அரிசி" என்று சொல்ல வாங்கும் பெண்ணொருத்தி "பச்சரிசாகா.. செவப்பரிசாகா.. " என்பர்.

இங்கே அரிசி விற்கும் பெண் - அரிசிக்காரி எனவும்
பச்சரி - வெயிலில் காய வைத்து அவிக்காதல் குற்றப்படும் அரிசி ஆகவும்
செவப்பரிசி - செந்நிற அரிசி தவிட்டு அரிசி ஆகவும் கொள்ளப்படும்.

மேற்குறிப்பிட்ட பாடலில் வரும் "புள்ளலெக்கா" என்பதில் "பிள்ளை" என்பது புள்ள என்று வந்திருக்கிறது. அனேகமாக ஆண்பிள்ளைகளை 'பிள்ளை்' என்றழைப்பர் ஆயினும் மட்டக்களப்பிலே பெண்களையே பிள்ளை என்றழைப்பது பெருமை.

இதனாலேயே மட்டக்களப்பில் தாய்வழிப் பரம்பரையில் தாய் பிள்ளையுடன் சேர்ந்து வாழுதல் வழக்கு. இதனால் தாய்வழிக் குடியே பிள்ளையின் குடியாக குடிப்பரம்பரை வளர்கிறது. பெண்மைக்கு பெருமை சேர்த்து கல்யாணத்தின் பின்னர் தாயுடன் மகள் அதாவது பிள்ளை மருமகனும் சேர்ந்து வாழும் குடும்பமுறை இன்றும் மட்டக்களப்பிலே இருக்கிறது.

இன்றும் பண்பாடு கலாசார விழுமியங்களை வெளிக்காட்டும் தமிழ் கொண்ட வளம்மிகு நாடு.

பாடல் இங்கே...வாழ்த்துகிறோம் சகோதரர்களே.

படுவான்கரையும் எழவேண்டிய விடயங்களும் - 01

"நெஞ்சாலி விளைவேலி ஆயிரமூர் புரக்கும்
திருவோங்கி நிறைவுடைய செல்வமெல்லாஞ் சுரக்கும்
அஞ்சாயல் மடவார்க்கட் கறநெறிஆர்மனமு முருக்கும்
துஞ்சாம லிரவுபகல் மள்ளர்குரல் களிக்கும்
சுவாமிவிபு லாநந்தர்யா ழிசைநின் றொலிக்கும்
மஞ்சாரும் பொழில் மட்டு மாநாட்டி னினிய
மண்வளம்போல் வாழ்வாரின் மனவளமு மினிதே"

என்று புலவர்மணி ஏ. பெரியதம்பிப்பிள்ளை அவர்கள் மட்டக்களப்பின் பெருஞ்சிறப்பைப் பற்றி எழுதிய பாடல்.

விக்கிபீடியாவில் மட்டக்களப்பு இங்குகாண்க

மட்டக்களப்பின் இயற்கை வனப்பையும் இருப்பையும் பற்றி யாழ்நூற் புலவர் இவ்வாறு குறிப்பிடுகிறார்
"மட்டகளப்பிலே முப்பது மைல் நீள் வாவி ஒன்றுள்ளது. இது கடலோடு கலக்கும் வடகோடி அமிர்தகழி என்னும் புண்ணியப் பழம்பெருபதிக்கு அணிமையானது.
அழகிய தெற்குக் கோடிக்கு அணிமையாக மேற்குக்கரையிலே மண்டூர் என்னும் புண்ணிய பழம்பதியுமுளது. வாவியின் மேற்குக்கரை முழுவதும் மருதத்தண்பணைகளாகும். கிழக்குக் கரையிலுள்ள ஊர்கள் தெங்கு, மா, பலா முதலிய மரங்கள் செறிந்து கண்ணுக்கும் மனதுக்கும் உவகை தருவன. புலியன் என்னும் வேடர்குலத் தலைவன் அரசுபுரிந்த இடமாதலினால் முன்னாளில் 'புலியன்தீவு' என வழங்கப்பெற்றதும் இந்நாளில் 'புளியந்தீவு' என வழங்கப்படுவதும் மூன்று மைல் சுற்றளவுடையதுமான அழகிய நகரம் ஒன்று காவிரி நடுவணமைந்த திருவரங்கம் போல மட்டக்களப்பு வாவியின் நடுவணமைந்துள்ளது. இந்நகர் மட்டகளப்புப்பிரிவுக்குத் தலைநகராகும்" (மட்டக்களப்புத் தமிழகம் - பண்டிதர் வீ.சி. கந்தையா)

மட்டுநகரத்திலிருந்து "எழுவான்கரை" அதாவது வாவியின் கிழக்குக்கரை சூரியன் எழும்திசையிலுள்ள கரை, அதன் வழியே தென்முகமாக நெடிய வீதி கிராமங்களினூடு செல்கிறது.
"படுவான்கரை" என்பது பொழுதுபடும் மேற்குத்திசைக்கரை. இதன்வழியே பயணஞ்செய்தாலே கண்ணுக்கும் மனதுக்கும் இனிய புதிய உயிர்க் காட்சி. பழந்தமிழ்ப் பண்புடன் இன்றும் வாழும் உழவர் அங்கே உளர். உழவர்தம் உயிர்போன்றே செல்வமான மந்தைகள் மேயும் முல்லை நிலத்தைச் சார்ந்துள்ள வயல்களும் தனியழகுடன் தனித்துவமாய் தோற்றமளிக்கும். முதிரை, கருங்காலி முதலிய மரங்கள் நிறை சோலைக்காடுகளும் சிள்வண்டின் ஓசையும் காடுகளிலிருந்தும் மலைச்சாரல்களிலிருந்தும் எடுக்கப்படும் நறுந்தேனும் " பாலொடு தேனாறு பாயந்தோடு நன்னாடு" என்று மட்டக்களப்புக்கு புகழையும் தரும் நிலமாகும்.(மட்டக்களப்புத் தமிழகம் - பண்டிதர் வீ.சி. கந்தையா)

மட்டக்களப்பின் நிருவாகக் கட்டமைப்புபடத்தைஇங்குகாண்க
இதில் படுவான்கரை கீழே பார்க்க

மட்டக்கப்பு வாவியே எழுவான் கரையையும் படுவான் கரைரையும் பிரித்துகோடிட்டுக் காட்டுகிறது. படுவான்கரையில் நிருவாகப்பிரிவிலே போரதீவுப்பற்று, மண்முனை தென்மேற்குப்பற்று, மண்முனை மேற்குப்பற்று ஆகிய பிரதேசங்கள் அடங்குகின்றன. எழுவான் கரைக்கும் படுவான் கரைக்கும் இடையிலான போக்குவரத்து மண்முனை, குருக்கள் மடம் ஆகிய துறைகளினூடாக வாவியைக்கடந்து செல்லமுடிகிறது. ஆயினும் பட்டிருப்பு பாலம் மற்றும் வவுணதீவுப் பாலம் என்பன மட்டுமே தரைவழிப்பாதையில் உள்ளன.
தொன்று தொட்டு வாழும் இந்நிலமக்களின் போக்குவரத்துக்கு இன்னமும் சரியான பாதைகள் மற்றும் பாலங்கள் புனரமைக்கப்படாமல் அவர்களின் இயல்புவாழ்க்கைக்கும் தேவைகளை பூர்த்திசெய்வதற்கும் எப்பொழுதும் எழுவான்கரையை நாடவேண்டியவர்களாக உள்ளாக்கப்பட்டுள்ளனர்.

பேராசிரியர் சு.வித்தியானந்தன் அவர்களின் மட்டக்களப்புக் குறிப்பு;
"மட்டக்களப்பு வீரம் படைத்த தமிழ்நிலம். அதற்கு கவித்திறன் உண்டு. கலைவளம் உண்டு. பொருள் வளம் உண்டு. ஈழம் முழுவதற்கும் தேவையான நெல்லை அளிக்கக்கூடிய வளமுண்டு. மரபுவழி வந்த கலைகள் நிறைய உண்டு. யாரோடும் தலை நிமிர்ந்து நிற்கும் ஆற்றல் உண்டு."
இந்தக்குறிப்பிற்கே முழுப்பொருத்தப்பாடு உண்மையில் படுவான்கரைக்கே உள்ளதெனலாம். இன்றும் வழக்கிலுள்ள அத்தனை செல்லவச் செழிப்புமிக்க வளம்பெறு நிலமாக இருக்கும் இந்நித்திலம் வீரம் விளைநிலமாக கொள்ளப்பட்ட இந்நிலம் கடந்த கால போர்ச்சூழல் காரணமாக மற்றும் இதர பிரச்சனைகள் காரணமாகவும் இன்னமும் நிமிர்ந்து வளரமுடியாத தன்மையில் இருப்பது வேதனையான விடயம்.
ஆயினும் இங்கிருந்து பல்வேறு துறைகளில் துறைபோந்த திறன்வாய்ந்தவர்களும் இடம்பெயர்ந்து மட்டக்களப்பு எழுவான் கரை மற்றும் நகர்ப்புறங்கள் ஏன் புலம்பெயர்ந்து வெளிநாடுகளிலும் வாழ்ந்து வருகின்ற ஒரு அசாதாரண சூழ்நிலையினால் இப்பொழுது வறுமை என்பதையும் முன்னேற தவிக்கும் மக்களையும் காணக்கூடியதாக இருப்பதற்கு என்னைப்பொறுத்த வரையில் போர்ச்சூழலும் திட்டமிட்ட அபிவிருத்திகள் மேற்கொள்ப்படாமையுமே காரணமாகும்.

இம்மக்களில் படித்தவர்களைத் தேடிப்பிடிக்கவேண்டிய துர்ப்பாக்கிய நிலையில் இருக்கிறது. ஆக இப்பிரதேசத்துக்கு பெருமளவில் கல்வியறிவையும் எதிர்கால நம் சந்தததிகளுக்கு உரிய பொறுப்புக்களையும் வழங்கவேண்டிய நிலை காணப்படுகிறது.

இதனால் இப்பிரதேசத்துக்கு முதலில் போக்குவரத்து ஒழுங்குகளை செவ்வனே நிறைவேற்றுதல், ஏற்கனவே திட்டமிட்ட அம்பிளாந்துறை- குருக்கள்மட, மற்றும் மண்முனை பாலங்களை அமைத்தல் என்பன இப்பிரதேசத்தில் கல்விபயிற்றுவிக்கும் ஆசிரியர்களுக்கும் மக்களின் அவசர தேவைகளுக்கும் வியாபாரவிருத்திக்கும் உரிய கடமையாகும்.

மற்றும் இன்னமும் இப்பிரதேச மக்களின் கல்வியில் முழு அக்கறை செலுத்தாமல் அவர்களின் கல்வியில் காட்டும் அசமந்தப்போக்குகளையும் எதிர்மறைச்சிந்தனைகளையும் களைந்து இப்பிரதேச பிள்ளைகளின் வளர்ச்சிக்கு வெளிச்சம் காட்ட அனைவரும் முன்வரவேண்டும்.
இப்பிரதேசத்தில் கலைத்துறையிலும் வணிகத்துறையிலும் ஆங்காங்கே பட்டதாரிகளின் அதிகரிப்பு இருந்தாலும் விஞ்ஞான கணித துறையில் பாரிய வெற்றிடம் காணப்படுகிறது.

மற்றும் இப்பிரதேச மக்கள் அதிகமானோர் விவசாயிகளாகவும் கூலி விவசாயிகளாகவும் காணப்படுகின்றனர். இதற்கடுத்ததாக மீன்பிடித்தொழிலாளர்கள், செங்கல் உற்பத்தியாளர்கள், சிறு வியாபாரிகள் ஆகியோரே காணப்படுகின்றனர். இதனால் அரச தொழிலில் ஈடுபடுவோர் மிக்குறைந்த சதவீதத்தினரே இதற்கு பிரதான காரணமே இப்பிரதேச கல்வியறிவில் கல்விகற்றலில் குறைவும் தாழ்வும் ஏற்பட்டதே. ஆதலால் இனிவரும் சமுதாயத்தில் இக்கல்வியறிவியலில் உயர்ச்சியைக் கொண்டுவரவேண்டியது அவசியமாகிறது.

வாழ்க்கை தவறும் படிப்பு

மேலுள்ள படம் இலங்கையின் கல்வி முறையால் சழுதாயத்தில் ஏற்பட்டுள்ள மாற்றத்தை ஓரளவு சித்திரக்கிறது. ஒரு மாணவன் பரீட்சையை மட்டும் நோக்காகக் கொண்டு படித்து தனது முயற்சியினாலும் திறமையினாலும் தேடலினாலும் வெற்றிகாண்கிறான். அதேவேளை இதற்கு மாறாக வளரும் பிள்ளை என்ன மாற்றத்துக்குள்ளாகிறது என்பதை ஒரு பார்வைக்கு சொல்லியிருக்கிறேன். இதில் எவ்வாறு மாற்றங்களைக் கொண்டுவரவேண்டும். பெற்றோர் பிள்ளை மற்றும் ஆசிரியர்கள் எவ்வாறு கல்வியால் சமுதாய சிந்தனைகளை சமுதாய மாற்றங்களை கொண்டு வரலாம் வரமுடியும் என்பதை அடுத்த பதிவில் இடுகையிடுகிறேன். அதுவரை உங்களை மேலான கருத்துக்களுக்கும் பார்வைக்கும் மட்டுமே.

சில பிடித்த ஸ்டேடஸ்கள்

"மாற்றம் ஒன்றே மாறாதது."

"எதுவும் செய்யாமல் இருப்பதை விட ஏதாவது செய்தல் பெரிது."

"நீங்கள் அசலாக பிறந்தீர்கள் ஒரு நகலாக இறக்காதீர்கள்"

" பார்வையற்ற ஒருவரிடம் நிறத்தின் பொருளை விளக்க முடிந்தவரால் வாழ்க்கையில் எதைப்பற்றியும் யாரிடமும் விளக்க முடியும்"

நேற்று வாசித்த ஒரு புத்தக வரிகள்
என்னை மிகவும் பாதித்தது
:
""என்னை வெறுப்பவர்களுக்கு நன்றி - நீங்கள் என்னை வலிமையடையச் செய்தீர்கள்.
என்னை நேசிப்பவர்களுக்கு நன்றி - உங்களால் என்னுடைய இதயம் விசாலமடைந்தது.
என்னைப் பற்றி கவலைப்படுபவர்களுக்கு நன்றி - யார் உண்மையான அக்கறை உள்ளவர்கள் என்பதை எனக்கு புரியவைத்தீர்கள்.
என்னை விட்டுச் சென்றவர்களுக்கு நன்றி எதுவுமே நிலைப்பதில்லை என்று காட்டுவித்தீர்கள்.
என் வாழ்வில் பிரவேசித்து இன்று நான் இருக்கும் நிலைக்கு என்னை ஆளாக்கியவர்களுக்கு நன்றி.."""

அன்பில் ஆரத்தழுவலும் நம்பிக்கையும்

நம்பிக்கைதான் வாழ்க்கை என்பது யாவரும் உணரக்கூடியதாக இருக்கும். வாழ்க்கை என்பது நாம் வாழும் போதுதான் இரு(னி)க்கும். நமது வாழ்க்கையின் ஏதோ ஒரு இடத்தில் உயிரோட்டம் என்ற சொல்லால் நிரப்பும் மூச்சுக்காற்றில் நம்பிக்கை மிதந்துகொண்டுதான் இருக்கும்.
இருந்தாலும் "நம்ப நட நம்பி நடவாதே" என்றும் சொல்லுவர்.
நாம் வாழும் சமுதாயத்தில் ஒவ்வொரு மனிதரையும் நம்புவதுதான் நல்லது என்று கருதும் போதே அதுவே நமக்கு வில்லனாக அமைவதும் உண்டு. ஆனாலும் நிம்மதியான வாழ்க்கைக்கு துணைநிக்கும் இந்த மந்திரச்சொல் "நம்பிக்கை".

பரஸ்பர துணையான வாழ்க்கை, அதாவது அது காதலாக இருக்கலாம், அது நட்பாக இருக்கலாம், ஏன் தாம்பத்திய குடும்ப உறவாக இருக்கலாம். இதைவிட நாம் பேசிகொள்ளும் யாரோ ஒரு நபரோடு இருக்கும் இனம்புரியா நல்லுறவாக இருக்கலாம். அத்தனை உறவுகளிலும் தித்திக்கும் நினைவுகளைப் பகிர்வதற்கு நம்பிக்கை அவசியம் தேவை.

வாழ்க்கையின் நம்பிக்கை பிழையாகும் தருணம் அவநம்பிக்கையாகிறது. அதாவது நமது சிந்தனையின் நடுவுநிலமையிலிருந்து சிந்திக்கத் தவறி, ஒரு குழப்ப மனதுடன் சிக்கல் உணர்வுடன் தீடீரென எடுக்கப்படும் முடிவுகள் இந்த நம்பிக்கையின் எதிரியாகின்றன. நாம் எப்பொழுதும் நமக்கு சார்பாக நமது எண்ணத்தோடு மட்டுமே சிந்தித்து ஒருதலைப்பட்சமாய், வாழ்க்கையின் நம்பிக்கையை இழந்து மற்றவர்கள் மீது சரியான நல்ல அபிப்பிராயத்தை விடுத்து நமது பார்வையில் நடைமுறைகளை எடைபோட்டுகொள்வது தவறான செயலாக அமைகிறது.

ஒருவரைப்பற்றிய முழுமையாக நமக்கு விளங்கிக்கொள்ள நிச்சயம் முடியாது. ஒருவருடன் பழகும் போது அவரது அந்த பழகும் தருணத்தில் அவரது நிலமையை புரிந்கொள்வதால் அவரை முழுமையாக அறிந்துகொண்டோம் என்ற எண்ணத்தில் நாம் இருப்பது இயல்பு. மாறாக அவர்கள் பற்றிய முழு விபரங்கள் தெளிவாக்கப்படுவதில்ல. அத்தோடு நமது எதிர்பார்ப்புகளுக்கு ஏற்ப மற்றவர்களும் இருக்கவேண்டும் என்று சிந்திப்பது நமது பிழைகளில் ஒன்று.

இருந்தபோதும் மற்றவர்கள் கஸ்டப்படும் போதும், கண்ணீரின் காயத்தை உணர்கின்றபோதும் கட்டாயம் ஒரு உறவு நம்பக்கையோடு தேவையாகிறது. நமது வேதனையை துடைக்கும் யாரோ ஒருவருடைய விரல்களாய் இருக்கும் உணர்வுகள் நமக்கும் வேண்டும் மற்றவர்களுக்காக. ஆனால் அந்த உறவு வாழ்நாள் வரைக்கும் துணையாக இருக்கலாம் இல்லாமலும் போகலாம். அன்பில் ஆரத்தழுவும் எல்லை மீறாத அந்த உணர்வின் விரல்களுக்கு எப்போதும் சரண். உள உணர்வோடு உரசும் அன்பு வார்த்தைகள் போதும். வாழ்க்கை அர்த்தப்படும்.

பேசுவதற்கு காசுகொடுப்பதில்லை ஆக இருக்கும் போது, நல்வார்த்தைகளால் அன்பொழுகும் அந்த கண்களுக்கு எப்போதும் நன்றி சொல்லும் மனது இருக்கும் இல்லையா. என்னைப் பொறுத்தவரையில் எதிர்ப்பால்ய நண்பர்கள் இந்த உறவுகளை கட்டிக்காத்துக் கொள்ள கஸ்டப்படுவார்கள். அதாவது ஒரு ஆணுக்கு ஏற்படும் பிரச்சனைகளுக்காய் இரங்கும் ஒரு பெண்ணையோ அல்லது மறுதலையாக ஒர் ஆண்ணையோ சந்தேகப் பேர்வழியாய் சமுதாயம் பார்க்கும் போதுதான் இந்த வாழ்க்கை வேண்டாவெறுப்பாகும். இதற்கு கலாசாரம், சமயம், நமது வாழ்க்கைப்பாங்கு போன்ற பல விடங்கள் இடியப்பச் சிக்கலாகிறது.
இது நமது கலாசாரத்தில் இருக்கும் ஒரு தவறான சிந்தனை என்று தோன்றுமளவுக்கு உண்மைச்சம்பவங்கள் சான்று பகர்க்கின்றன.
நாம் எப்பொழுதும் இயல்பாக சிந்திப்போமானால் நம்பிக்கையான வாழ்க்கை தித்திக்கும் அளவாக.

இந்தக்கவிதையும் நம்பிக்கையின் வெளிப்பாட்டில் உருவாகிய பழைய சிதறல்.

போய் வா

சில நினைவுகள்
நெஞ்சை அழுத்திய போது
கண்ணீரில் நீந்துவேன் - உன்னுடன்
போன் பண்ணி கதைக்கும் போது
உள்ளத்தின் கனம் குறைந்து
இதயம் இலேசாகும்
சந்தோசப்படுவேன் .......

உன்னைப் பிரியப்போகிறேன் என்ற
எண்ணத்தைக்கண்டு
இதையத்தின் வலி உணர்ந்து
கவிதை எழுதும் பேனாவை விட
கண்ணீர் முந்திக்கொள்கிறது
கனவுகளை நச்சரித்துக்கொண்டு ............
நினைவுகளை சுமந்துகொண்டு

இனி
நான் கஷ்டப்படும் போது
இங்கு நீ இல்ல
ஆறுதல் சொல்ல எனக்கு.........

இளமையில் கொடிது வறுமை

ஒருவாறு மீண்டு(ம்) வந்திருக்கிறேன். கழுத்துவலியும் வாழ்க்கை வலியும் நெம்புகோலை எனக்குள்ளே தொலைத்து விட்டு கண்டுபிடித்து வந்திருக்கிறேன்.
கணணித் திரைப்பக்கம் அவ்வப்போது வந்துகொண்டிருக்கிறேன். கீழ் காணும் செய்தி என்னை இப்பதிவை எழுதத்தூண்டியது.
நன்றி battinews, இதுதான் தலைப்பு
கிழக்கு மாகாணத்தில் மூவாயிரத்து ஐநூறு குழந்தைத் தொழிலாளிகள்

இந்த செய்தி எவ்வளவு உண்மையாக இருக்கிறது என்பது கருத்துக் கணிப்பாக இருக்கலாம்

ஆயினும் இந்நிலைமை நமது மக்களுக்கும் எதிர்கால சந்ததிகளுக்கும் எதிர்காகல நமது நாட்டுப்பொருளாதாரத்துக்கும் வீழ்ச்சியையும் தொடர்ந்து ஏற்படுத்திக்கொண்டிருக்கிறது என்பதை ஏற்றுக்கொண்டுதான் ஆகவேண்டும்.
வறுமை என்ற தோரணையில் பொதுவாக பிள்ளைகள் தங்களையும் தங்கள் குடும்பத்தையும் பாதுகாத்து வாழ்க்கையை எவ்வாறு கொண்டுசெல்லவேண்டும் என்ற முனைப்பில் தாங்கள் வருமானம் ஈட்டும் தொழில்களைத்தேடி தங்கள் கல்வி மற்றும் கற்றல் முயற்சிகளிலிருந்து நழுவிப்போவது கண்கூடாக தெரியும் உண்மை.
எனது பாடசாலையில் பந்தாந் தரத்தில் கல்வி பயிலும் மாணவன் ஒருவனை அடிக்கடி அவதானித்தேன் நான் அவர்களுக்கு பாடம் எடுப்பதில்லை, இருந்தாலும் அவன் நடவடிக்கைகள் இவனும் பொருளாதார தேவை உள்ள மாணவனாக இருப்பான் என நினைத்து அவனை அணுகினேன். அவன்

"எனது அப்பா போர்ச்சூழலில் எனக்கு சின்னவயசாக இருக்கும்போது ஆமிகாரக்காரக்களால் கொல்லப்பட்டுவிட்டார். எனக்கு ஒரு தங்கச்சி மட்டும் அம்மாவோடு மாங்கேணியில் (வாகரை பிரதேசம்)வசிக்கிறார்.நான் இங்கு விடுதியில் (hostel) தங்கியிருந்து ஆறாந்தரத்திலிருந்து படித்துவருகிறேன். காசு அம்மா தருவா லீவுக்கு கூட்டிக்கொண்டு போவாவு. நான் காசு கொண்டுவார இல்ல அதால தான் கன்டீன்ல(Canteen)சாப்பிடுற இல்ல"

எனக்கு குபுக்கென்று அழவேண்டும் போல இருந்தது. பின்னர் அவனது கடந்தகால பாடங்களில் எடுத்த புள்ளிகளையும் மேலும் சில தேவைகளையும் கேட்டறிந்துகொண்டேன்.அவன் 45- 60 வரையில் அவனது புள்ளிகள் இருந்தன. ஆனாலும் அந்த இலவச பாதிரியாரின் விடுதியில் படித்து வளரும் அந்தபிள்ளையிடம் கேட்ட சில கேள்விகளுக்கு அவன்:

"எத்தனை நாளைக்கு சேர் பாதர்(பாதிரியார்) பார்ப்பார். நான் படிச்சு என்தங்கச்சியை பார்க்கணும். அம்மாவோடு இருந்து உழைச்சுக்கொடுக்கணும்"
என்றதும் போதும் இந்த பிள்ளையின் ஏக்கமும் வாழ்க்கைக்கோலமும்.

வாழ்க்கையின் இளைமையில் வறுமை ஏதோ ஒரு காரணத்தினால் ஏற்பட்டுக்கொண்டே இருக்கிறது. இதனால் பிள்ளைகள் தங்கள் படிப்பை நிறுத்திக்கொண்டு உழைக்கவேண்டும் என்ற எண்ணம் புகுத்தப்பட்டுக்கொண்டிருக்கிறது. யாரவாது படிக்கக்கூடிய பிள்ளைக்கு அதன் பொருளாதார நிலைமை முட்டுக்கட்டையாக இருக்கிறது என்றால் அவற்றில் சிறிதளவேனும் நிவர்த்தி செய்து அப்பிள்ளைகளை படிக்கச்செய்து அவர்களுக்கு ஒரு முன்னேற்றப்பாதை காட்டி அவர்களை தொடர்ந்து அவர்கள் குடும்பத்தையும் வாழவைப்பது கடவுளுக்குசெய்யும் தொண்டாக இருக்கும் அல்லவா.
நமது நாளாந்த செலவில் சிறுதொகைப் பணத்தை இவர்களுக்காகவாவது கொடுத்துதவும் போது அவர்கள் வாழ்க்கையில் வெளிச்சம் ஏற்றும் தீபங்களாக இருக்கலாம்.

அதற்காக அவர்கள் நமக்கு மீண்டும் உதவவேண்டும் நாங்கள் சொல்லும் வேலைகளைச் செய்யவேண்டும் என்றில்லாமல் உதவிதேவைப்படும் போது அவர்களுக்கு உதவிசெய்து அவர்கள் சந்திக்கும் வேறொரு பொருளாதார தேவைப்படும் பிள்ளைக்கு உதவச் செய்ய வைத்து நிலைத்து நிற்கச் செய்தல் காலத்தால் அழியாத சேவை. கடவுள் பார்வை அது அல்லவா.
பொருளாதார தேவையுள்ள பிள்ளைகள் அனேகம் பேர் இருக்கிறார்கள். ஆயினும் அவர்கள் வயிற்றை நிரப்பிக்கொண்டால் போதும் என்ற நிலைமையும் இருக்கிறது. அப்பேர்ப்பட்ட பிள்ளையால் எவ்வாறு படிக்கமுடியும் படிப்பு பற்றி எவ்வாறு சிந்திக்கமுடியும்.????

எங்களால் எல்லாப் பிள்ளைகளுக்கும் உதவமுடியாது ஆனால் ஒரு பிள்ளைக்காவது உதவலாம் இல்லையா. அப்பிள்ளையும் பொருளாதார தேவை இப்பொழுது இருக்கலாம். ஆனால் பிற்காலத்தில் அப்பிள்ளையே மற்றவருக்கும் உதவும் பிள்ளையாக இருக்ககூடியதாக இருக்கலாம் தானே. எதையும் எதிர்மறை எண்ணத்தோடு பார்க்காமல் பிள்ளைநலச் சிந்தனையோடு அவர்கள் கல்வி, எதிர்கால வாழ்க்கை பற்றி சிந்திப்போமானால் கண்களின் ஓரத்தில் இதயத்தின் ஆழத்தில் சில ஈரவிழுதுகள் நெஞ்சனை நனைத்துக் கொள்ளும்.

இதற்காக தற்பொழுது எங்கள் கிராமத்தை சேர்ந்து புலம் பெயர்ந்து வாழும் நமது உறவுகள் எங்களது பொருளாதாரதேவையுள்ள பிள்ளைகளுக்கு உதவிக்கொண்டு வருகிறார்கள். நன்றிகள் உறவுகளே.
இதில் கனடா வாழ் நமது "இராஜேந்திரம் ராஜன்" அண்ணா அவர்களின் முயற்சியால் கடந்தவருடம் பெப்பிரவரி 2010 இல் ஆரம்பிக்கப்பிக்கப்ட்ட பணவுதவித்திட்டம் ஒருவருடம் கடந்து பிள்ளைகளின் கல்வி வாழ்க்கைக்கு உதவிக்கொண்டிருக்கிறது.இதில் கடந்த வருட க.பொ.த. சாதாரண தரத்தில் இத்திட்டத்துக்குள் உள்வாங்கிய மாணவன் திறமையாக சித்தியெய்தி இருப்பது மட்டற்ற மகிழ்ச்சி.
இதேபோல் இன்னும் பல நமது உறவுகள் உதவுவதற்கு காத்திருக்கிறார்கள் என்பது சந்தோசம்.

பிள்ளைகள் தங்கள் பொருளாதார நிலைமை குறைவு என்பதால் மற்றவர்களிடம் கைநீட்டிக்கொள்ள மாட்டார்கள். கேட்கவே அச்சப்படுவார்கள். தங்களுக்குள்ளே அழுது பெற்றோரை கஸ்டப்படுத்தி படிப்பை தொடரமுடியாமல் இடைவிலகி தொழிலுக்கு செல்ல சிந்திப்பார்கள். இந்நிலைமையே குழந்தைத் தொழிலாளர்கள் அதிகரிப்பதற்கு காரணமாக இருக்கிறது.
இதனால் நீங்கள் யாருக்காவது பணஉதவி செய்யும் போது, செய்யப்படும் இந்த உதவி பிள்ளைகளின் மனம் பாதிக்கப்படாமல், அவர்கள் உளரீதியாக ஒரு கல்வி ஊக்கப்படுத்தலுக்கு மாத்திரம் இருக்கவேண்டும் என்பதில் கவனமாக இருக்கவேண்டும். நீங்கள் யாராவது யாருக்கூடாகவாவது உதவுங்கள் ஆனால் சரியான தேவை தேவைப்படும் பிள்ளைகளை இனங்கண்டு அவர்கள் வாழ்க்கைக்கு உன்னத ஒத்துழைப்பு நல்குங்கள். கடவுளின் கருணையும் எல்லா ஆசிர்வாதமும் உங்களுக்கு நிச்சயம் கிடைக்கும்.
பிள்ளைகளின் கல்வி சமுதாயத்தின் வெளிச்சம். அதுவே நமக்கு விடிவு.

லா -நினாவும் மாற்றங்களும் (La - Nina)

அண்மைக்காலங்களில் இலங்கை உட்பட அவுஸ்ரேலியா பிரேசில் பிலிப்பைன்ஸ் போன்ற நாடுகளில் ஏற்பட்ட வானிலைக் குழப்ப நிலைக்கு காரணங்களை விஞ்ஞானிகள் வெளியிட்டுக்கொண்டடிருக்கிறார்கள்.
இதற்கு முழுக்காரணம் காலநிலைமாற்றம் (Climate Change) என்பதை ஒத்துக்கொண்டும் இதனோடு இயற்கையான வளிமண்டலத் தோற்றப்பாடும் அதாவது எல்- நினோ (தெற்கத்திய அலைவு)வும் லா - நினோவும் காரணமாகும் என தெரிவிக்கின்றனர்.

எல் நீனோ-தெற்கத்திய அலைவு (El Niño-Southern Oscillation) என்பது ஒரு இணைப் பெருங்கடல் வளிமண்டலத் தோற்றப்பாடு ஆகும். எல் - நினோ, லா - நினா எனப்படும் இவை கிழக்குப் பசிபிக் பெருங்கடல் மேற்பரப்பில் இடம்பெறும் முக்கியமான வெப்பநிலை ஏற்றத்தாழ்வுகள்.
"எல் நினோ" (El Niño is Spanish for "the boy" and refers to the Christ child) என்பது இஸ்பானிய மொழியில் "சிறு பையன்" என்னும் பொருள் கொண்டது. இப்பெயர் பாலன் யேசுவைக் குறிப்பது. இத் தோற்றப்பாடு தென்னமெரிக்காவின் கரையோரப் பகுதிகளில் நத்தார் காலங்களில் ஏற்படுவதால் இப்பெயர் ஏற்பட்டது.

எல் நீனோ-தெற்கத்திய அலைவு, ஆனது சமுத்திர வளிமண்டலத்தில் தளம்பல்கள் ஏற்பட்டு பூகோள வளியோட்டங்களில் மாறுதல்கள் ஏற்படுவதால் உலகம் முழுவதற்குமான வானிலை பாதிக்கப்படும் தோற்றப்பாடாகும். உலகின் பல பகுதிகளிலும் ஏற்படும் வெள்ளம், வரட்சி போன்ற பல இடையூறுகளுடன் தொடர்புள்ளது. இத் தாக்கங்களும், இதன் ஒழுங்கற்ற தன்மையும் இவற்றை எதிர்வு கூறுவது தொடர்பில் மிகுந்த ஆர்வத்தை ஏற்படுத்துகிறது. ஸ்டீபன் செபியாக், மார்க் கேன் போன்றோர் இதனைஎதிர்வு கூறுவது தொடர்பில் பெரும் பங்களிப்புக்களைச் செய்துள்ளனர்.
(விக்கிபீடியா)

இதேபோல "லா நினா" (La Niña - from Spanish as "the girl-child")என்னும் சொல் "சிறிய பெண்பிள்ளை" என்னும் பொருளுடையது. 1923 ஆம் ஆண்டில் சர். கில்பர்ட் தாமஸ் வாக்கர் என்பவர் இவற்றை முதன் முதலாக விளக்கினார்.

"லா நினா" தோற்றப்பாடு பொதுவாக அதிகரிக்கும் குளிர்நிலையாக கருதப்படுகிறது. இதனால் பின்வரும் மாற்றங்கள் வளிமண்டலத்திலும் சமுத்திர சுற்றுவட்டத்திலும் ஏற்படுகிறது.
* மத்திய மற்றும் கிழக்கு வெப்பப்பசுபிக் சமுத்திரத்தில் கடல்மேற்பரப்பு வெப்பநிலையில் வழமையானதை விட அதிக குளிர்ச்சியை ஏற்படுத்தும். இதனால் மேற்குநோக்கி வளிமண்டல காற்றோட்டம் மேற்குநோக்கி தள்ளப்படும்.
* வெப்ப ஓட்டம் அல்லது மழைக்காலநிலை அவுஸ்ரேலியா, பப்புவா குனியா மற்றும் இந்தோனேசியா போன்ற நாடுகளில் ஏற்படும்
* வழமையைவிட கடுமையான காற்றோட்டம் கிழக்குப்பக்கமாக பசுபிக் சமுத்திரத்தைக் குறுக்கறுக்கும்.ஆனாலும் இது அவுஸ்ரேலியாவை எட்டவேண்டிய அவசியமில்லை.

இதனால் லா-நினாவானது சிலநேரங்களிர் தெற்கத்தைய எதிர் அலைவாக (anti-ENSO: anti-El Niño-Southern Oscillation)கருதப்படுகிறது.

பசுபிக் சமுத்திரத்தில் லா -நினா தோற்றப்பாடு மற்றும் அதன் வளிமண்டல சுற்றோட்டத்தில் அதன் விளைவு வரைபடம்

சாதாரண சுற்றோட்ட நிலைமை

லா -நினாவினால் ஏற்படும் உலகளாவிய சில தெளிவான விளைவுகளைப் பின்வரும் வரைபடம் காட்டுகின்றன. நிறந்தீட்டப்பட்ட பரப்புகளில் வெப்ப அல்லது குளிரான காலநிலைலைக் காட்டுகின்றன.

ஆயினும் இப்பொழுது அவுஸ்ரெலியா, பிரேசில் மற்றும் நமது நாட்டில் ஏற்பட்டுள்ள மழைவெள்ள நிலமைக்கு காரணமான லா -நினோ தோற்றப்பாடுகளைப்பற்றி காலநிலை விஞ்ஞானி டாக்டர் அடெம் ஸ்கைவ் (Dr Adam Scaife)கருத்துத்தெரிவிக்கையில் பின்வருமாறு குறிப்பிட்டுள்ளார்.
அவுஸ்ரேலியாவில் ஏற்பட்டுள்ள இந்த கடுமையான வெள்ளப்பெருக்கு ஒரு வரலாற்றுச்சாதனையாக லா -நினாவினால் ஏற்பட்டதெனவும்,1984 ஆம் ஆண்டு இலங்கையில் ஏற்பட்ட காலநிலைமாற்றத்திற்கு் பிறகு வரலாற்றில் பதியப்படவேண்டிய இந்த வெள்ளப்பெருக்கு லா -நினாவினால தான் ஏற்பட்டதென்பதை குறிப்பிடுவதென்பது கடினமாக இருக்கிறது. காரணம் இலங்கை இந்த லா நினா குளிர்ச்சியான வளியோட்டத்தின் விளிம்பில் காணப்படுவதால் குறிப்பிட்டுச்சொல்வது கஸ்டமாக அமைந்தாலும் இதனை ஏற்றுக்கொள்ள முடியும் காரணம் எல்-நினோதோற்றப்பாடு இலங்கையில் ஏற்படுவதால் லா -நினா ஏற்படலாம்.
ஆயினும் காலநிலை மாற்றங்களின் விளைவும் இந்ததோற்றப்பாடுகளுக்கு காரணம் என்பதையும் கூறுகிறார்.

மூலம்: இங்கு காண்க metoffice

தலை வளருதல்

நாம் என்பது நான் என்கிற பல சேர்ந்ததே. ஆயினும் நான் வெற்றிபெறவேண்டும் என நினைப்பது தவறில்லை. ஆனால் அவனோ அவளோ முன்னேறுகிறாள் ஆகவே நான் முன்னேறியாகவேண்டும் என்பது சற்று ஒப்பீட்டுத்தன்மையைக் காட்டுகிறது.
அவனோ அவளோ முன்னேறும் போது, நானும் முன்னேறவேண்டும் என நினைப்பதற்கும் முன்சொன்னதற்கும் சில வேறுபாட்டை உணரக்கூடியதாக இருக்கும்.

என்னைப் பொறுத்தவரையில் நாம் ஒப்பிட்டுப் பார்க்கும் போது அவர் எவ்வாறு எவ்வாறான முயற்சிகளை மேற்கொண்டார்? எவ்வாறான செயற்பாடுகள் மூலம் ஒரு தனித்துவத்தைக் கையாண்டு முன்னேறினார். இவ்வாறான எண்ணங்களை எண்ணிக்கொள்ளுவது சாலச் சிறந்தது.

இதற்கு மாறாக இவர் இன்ன பிரதேசக்காரர், இந்த வம்சக்காரர், இவர் இப்படியான எண்ணப்பாங்கை விடுத்து முன்னேற்றம் காணுதல் அழகு. முன்னேறுபவர் யாராகவாவது இருந்துட்டுப்போகட்டும். நமக்கென ஒவ்வொரு முன்னேற்றப்பாதைகளை வகுத்துக்கொள்வது சிறப்பு.

அதேபோல் எப்போதும் ஒரு முன்னோடி அல்லது முன்மாதிரியாக (Role model) வெற்றியாளர்களை, மக்களால் அதிகம் நேசித்தவர்களை மனதுக்குள் புகுத்திக்கொண்டு அவர்கள் அளவுக்கு வராவிடினும் அவர்கள் செயல்களின் வெற்றிகளைக் குறைந்தளவுக்கேனும் செய்து முன்னேறவேண்டும் என்கின்ற எண்ணம் எல்லோருக்கும் இருக்கும் பண்பு.

இதற்காகவும் நாம் அவர்களோடு எங்களை ஒப்பிட்டுப்பார்ப்பது அழகல்ல. அவர்களின் செயற்றிறனை அவர்களின் அனுபவப்பாங்கினைப் பெற்று நாமும் முன்னேற்றத்தின் வழியில் நிற்றல் நல்லது.

இங்கு ஒரு காணொளி. பாருங்கள் தலைவர்களான முன்மாதிரிகள்.

இதேபோல் நாம் எப்பொழுதும் முடியாது வெற்றி என்பது தூரத்தில் இருக்கும் நமக்கு நல்லது எட்டாக்கனி என்ற எதிர்மறையான எண்ணங்களே வெற்றியின் முன்னேற்றப்பாதைகளிலிருந்து சறுக்கல்களை ஏற்படுத்தும். இங்கு ஒரு கபடிக்குழு வெண்ணிலாவைத் தொட்டு நிக்குது பாருங்கள்.



இந்த பஞ் வசனம் கூட நல்லாத்தான் இருக்கு..
கஸ்டப்பட்டு இஸ்டப்பட்டு உழைப்போம்

பால்நிலை (Gender)

பால்நிலை (Gender) என்றால் என்ன?

பால்நிலை என்பது சமூகத்தினால் ஆணுக்கும் பெண்ணுக்கும் கொடுக்கப்பட்ட சமூகப்பாத்திரங்கள் அவை பின்வரும் விடயங்களை அடிப்படையாக வைத்து தீர்மானிக்கப்படுகின்றன
வேலை பெறுப்புக்கள்
தீர்மானம் எடுத்தல்
வெளிச்செல்லுதல்
வளங்களை அடையும் வழிகள்
சமூகவியல், சமூகப்பொருளாதார, அரசியல் மற்றும் கலாசார நடவடிக்கைகள் மற்றும் அதிகாரங்கள்.

இதனால் எமது அன்றாட வாழ்க்கை மேற்கூறப்பட்ட விடயங்களினால் பால்நிலை மிகைப்படுத்தப்பட்டுள்ளது.

எமது யதார்த்தத்திலிருந்து சில கேள்விகள்:
- சம அளவான வேலைக்கு ஆண் தொழிலாளர்களைவிட பெண் தொழிலாளர்களுக்கு ஊதியம் குறைவாகக் கொடுக்கப்படுவது ஏன்?

- குடும்பத் தலைவராக ஒரு பெண்ணை ஏன் குறிப்பிடுவது இல்லை? ( பெண் மட்டுமே குடும்பத்தில் வருமானத்தை ஈட்டுபவராக இருப்பினும் ஆண்களை மாத்திரமே குறிப்பிடுகின்றனர்.)

- ஆண்மை பெண்மை பற்றிய எமது விளக்கம் என்ன?

பால்நிலை வேறுபாட்டின் முக்கியத்துவம் யாது?

ஆண்களினதும் பெண்களினதும் அனுபவங்கள் வித்தியாசமானது! அவர்களின் தேவைகள் வித்தியாசமானவை! அவர்கள் பாவிக்கும் வளங்களும் வித்தியாசமானவை!

பால்நிலை பாரபட்சங்களை அடையாளப்படுத்தி, வெளிக்கொணர்ந்து தீர்ப்பதனால் மாத்திரமே வேலை செய்யும் சமூகத்திலுள்ள அனைவரும் பயனடைவார்கள். இவற்றை கவனத்தில் எடுத்துக்கொள்ளாவிட்டால் பலவீனமான குழுக்கள் மீண்டும் மீண்டும் குரல் கொடுக்க முடியாமல் பலவீனப்படுத்தப்பட்டுக் கொண்டே இருப்பார்கள்.
(வயது முதிர்ந்தோர், பிள்ளைகள், விசேட தேவை உள்ளவர்கள்). இதனால் தங்களது தேவைகளை உரிய முறையில் வெளிக்கொணர முடியாதவர்களின் தேவைகள் நம்மை வந்து அடையாது.
ஆகவே அபிவிருத்திட்டத்திற்குரிய பயன் பெறப்பமாட்டாது. முயற்ச்சி வீணாகும். இவர்களும் இச்சமூகத்தை சேர்ந்தவர்களே! ஆகவே அவர்களை அடையாளம் கண்டு முன்கொண்டுவர முயற்சி செய்வோம்.

பால்நிலை பகுப்பாய்வு என்றால் என்ன?
Joan W. Scott ('பாலியலானது வரலாற்று பகுப்பாய்வுக்கு ஓர் பிரயோசனமான வகை'The American u;istorical Review, Vol. 91, No. 5, Dec. 1986, pp. 1053-1075), historian;
இவரின் நூலிலிருந்து

- ஆண்களுக்கும் பெண்களுக்கும் இடையில் வேறுபாட்டை (தனிப்பட்டதும் குழுவாகவும்) ஏற்படுத்துவதுடன் பால்நிலை வேறுபாடானது பால்நிலை கோட்பாட்டுச் சமூக அமைப்பை அடிப்படையாகக் கொண்டுள்ளது.
- பால்நிலை வேறுபாட்டுக்கிடையேயான இடைவெளி சமூக உறவுகளுடன் தொடர்புபட்டதாக அமையும் (சமூக வாழ்வின் கோட்பாட்டை உருவாக்கும்) மற்றும் பால்நிலை வேறுபாடு ஓர் பகுப்பாய்வுப் பகுதியாகும்..

இப்பகுப்பாய்வு பின்வருவனவற்றின் அடிப்படையில் அமையும்
1. அடையாளங்கள்
2. நிறுவனங்கள் அல்லது அமைப்புக்கள்
3. அடையாளக் குறியீடுகளின் விளக்கப்படுத்தல்கள்

இதை நாம் எவ்வாறு நடைமுறைப்படுத்தலாம்?
1. உங்கள் கவனத்திற்குக் கொண்டுவரப்படும் பிரச்சினைகளை ஆழமாக பகுப்பாய்வு செய்யவும்;. இதில்; பால்நிலை பாரபட்ச நிலைப்பாடுகளும் தாக்கங்களும் கவனத்தில் கொள்ளப்பட வேண்டும்.
2. பெண்களின் பங்களிப்பை அதிகரித்தல். பாதிக்கப்பட்டவர்களின் குரல்கள் கவனத்தில் கொள்ளப்பட வேண்டும்.
3. பால்நிலை தொடர்பான விழிப்புணர்வும் வேறுபாட்டுத் தன்மையும் எமது சமூகத்திற்கிடையே அதிகரிக்கப்பட வேண்டும்;.
4. பால்நிலை பகுப்பாய்வை உங்கள் வேலைத்தளங்களில் மற்றும் தனிப்பட்ட வாழ்வில் நடைமுறைப்படுத்தவும்.

இது ஒரு பகிர்தல். ஒரு பயிற்சிப்பட்டறையின் போது பெற்றுக்கொண்ட விடயம். பால்நிலை சம்பந்தமான உங்கள் கருத்துக்களை பகிருங்கள் முடிந்தால்.விரிவாக பின்னர் எழுதுகிறேன்.

தேனூரானும் நாட்டாரியலும் (சேர்ந்திருப்பது வறுமையும் புலமையும்)

தேனூர் எனும் பெயர் எங்கட ஊர் தேற்றாத்தீவுக்கு வரக்காரணமே கவிஞர் தேனூரான் தான். தருமரெத்தினம் என்ற இயற்பெயர் கொண்ட இவர் ஊர் மேல்கொண்ட இலக்கியப் பாசத்தால் இப்புனைபெயரை தனதாக்கிக்கொண்டார். இவரை தேனூரான் மாமா என்று சிறுவயதுகளிலிருந்து அழைத்து வருகிறோம்.இலக்கியத்தில் மிகுந்த வல்லமைவாய்ந்த இவரைப்பற்றிய பதிவு இது.

இவருக்காக நான் எழுதிய கவிதை கலாபூசணம் விருதுபடைத்தபோது; இங்கு காண்க.

கிழக்கிலங்கை தமிழ்பேசும் மக்களின் நாட்டார் வழக்காறுகள் (ஆய்வரங்கக் கட்டுரைகள்) என்ற புத்தகம் அண்மையில் கிழக்குமாகாண கல்வி அமைச்சின் பண்பாட்டலுவல்கள் திணைக்களத்தின் வெளியீடாக அமையப்பெற்றதை ஒர் ஆவணப்படுத்தலாகவே உணரலாம். இதில் நாட்டாரியல் பற்றி பல்வேறு ஆய்வுக்கட்டுரைகளில், கிழக்கு மாகாண தமிழ் பேசும் மக்களின் தொன்மையையும் நாட்டுவழக்காறுகளையும் தெளிவாக எழுச்சிபெறச் செய்திருப்பது மகிழ்ச்சி.

கிராமத்து மண்ணின் மகிமையை அதன் நாட்டுவழக்கை தொன்றுதொட்டு வரும் பண்பை தமிழின் தொடர்ச்சித்தன்மையை அதிகளவில் படம் போட்டுக்காட்டும் புத்தகம் அது. அதைவிட ஆவணம் என்றே சொல்லலாம். ஆனாலும் அங்கே குறை (சொல்ல வேண்டியது ).
இப்புத்தகம் பல்வேறு சமூகத்தையும் மக்களையும் சென்றடையும் நோக்கு குறைவாக இருக்கிறது.பல்கலைக்கழக அல்லது இன்னொரு ஆய்வாளர்களுக்காக மட்டும் இருப்பதாக உணர்கிறேன். காரணம் இப்புத்தகம் விற்பனைக்கு கிடைக்குமா என்பது சந்தேகப்படுத்துகிறது. தமிழ் இலக்கிய விழாவின் ஆய்வரங்கில் அறிஞர்களால் உணர்த்தப்பட்ட ஆய்வரங்கக்கட்டுரைகளையே இப்புத்தகம் கொணர்ந்திருக்கிறது. ஆனாலும் பல்வேறு ஆய்வுகள் கருத்தரித்தும் பிள்ளை பெற்றுக்கொள்ளாமல் இருக்கும் கர்ப்பிணிகளாய் இன்னும் நூல்வடிவம் பெறாமல் இருப்பது கவலைக்குரிய விடயம்.
இப்புத்தகத்தினூடு எமது ஊரின் பெருமைசேர்க்கும் கவிஞர் தேனூரான் நாட்டார் அறிவியல் என்ற ஆய்வுக்கட்டுரையைத் தொகுத்துத்தந்துள்ளார்.

"ஒரு நாட்டான் நாட்டார் அறிவியில் பற்றி கூறுவது சிறப்பு, தான் உண்டவற்றை, உண்டு ரசித்தவற்றை அதனால் ஏற்பட்ட மகிழ்வை, பிறருக்குக் கொடுப்பது சொல்வது பொருத்தம், ஆண்டவனின் செல்வப்புதல்வர்கள் கிராமங்களில்தான் வாழ்கிறார்கள். அவர்கள் ஏழையாயினும் சந்தோசச் செல்வம் பெரிதும் படைத்தவர்கள். அறிவியல் மேதைகள் தாம் பட்டினிகிடந்தும் தமது வீட்டுவாயிலில் வரும் விருந்தினர்களை இதயபூர்வமாக வரவேற்பார்கள். அழகிளராக இருந்தும் தமது அழகைப்பற்றி அகந்தை சிறிதும் அற்றவர்கள்......"
என்று முன்னுரைக்கும் போது நாட்டாரியலின் மேன்மை விளங்கும்.

வழமையான ஆய்வாக இல்லாமல் ஒரு வித்தியாசமான ஆனாலும் நாட்டாரியல் தொடர்பாக பல்வேறு அணுகுமுறைகளை சிந்தனைகளை கவிஞரின் எளிமைத்தன்மையைப் போலவே நுண்ணிய முறையில் தெளிவாக்கியிருப்பது அவருக்குரிய அந்த எழுத்தாற்றலை எல்லாருக்குமாக கொண்டுவந்திருப்பது தெளிவு.

நாட்டாரியலின் தொன்மையை எழுத்துலகில் தடம்புரளச்செய்வதில் இவருக்கு எப்போதும் பெருமையான விடயமும் இவருக்குரிய திறமையையும் வெளிக்காட்டுகிறது. பல்வேறு ஆய்வுகளுக்காக இவரின் துணையை நாடும் பல்கலைக்கழக பேராசியரியர்களும் மாணவர்களும் அவரிடமிருந்து தேனைப் பெற்று வெறும் கூடாக இவரைப் பார்ப்பது நமது மனதுக்கு கவலையாகவும் வெட்கப் படவேண்டிதொன்றாகவும் காணப்படுகிறது.
தமிழ் இலக்கிய விழா - 2010 சிறப்பு மலர் கிழக்குமாகாண கல்வி பண்பாட்டல்வல்கள் அமைச்சின் வெளியீட்டுநூலிலும் நமது மண்ணின் சிறப்புப் பேணும் மட்டக்களப்பு பிரதேச சடங்குசார் கூட்டுக்கலை வசந்தன் - கொம்புமுறி என்ற தலைப்பில் வசந்தன் கூத்து மற்றும் கொம்புமுறி விளையாட்டு என்பற்றை கலைநுட்பத்தின் வெளிப்பாட்டாக அற்புதமாக எவ்வாறு இக்கலைகள் நடைபெறுகிறது என பல்வேறாக ஆய்வெடுத்து எடுத்துரைக்கிறார். கொம்புமுறி விளையாட்டு எமது ஊரின் பெருமைசேர்க்கும் பழைமையான விளையாட்டு ஆதலால் தான் எமது கிராமத்தின் நடுநாயகமாக வீற்றிருந்து அருள்பாலிக்கும் பிள்ளையார் கோயிலுக்கும் பெயரானது கொம்புச்சந்திப்பிள்ளையார் ஆலயம் என்று. அத்தோடு மட்டுமில்லாது வசந்தன் கூத்து என்ற எமது மற்றுமொரு பாரம்பரிய ஆடல்வகையைபற்றிய எழுத்தாடலும் அருமையாக விளக்கி எழுதியுள்ளார்.

(அண்மையில் எமது கிராமத்தின் பாலமுருகன் கோயிலுக்கு பால்குடபவனி விழா நடைபெற்றபோது கவி தேனூரானும் வசந்தன் குழுவின் சில பாலகர்களும் பவனிவரும் போது)

ஆனாலும் வறுமையும் புலமையும் சேர்ந்திருப்பது இவரது வாழ்க்கைக்கும் பொருத்தம் என்பதற்கு இவரும் ஒரு சான்று. வசந்தன் கூத்துப்பற்றிய அச்சேற்றப்படாத பல்வேறு ஆய்வுகள் கட்டுரைகள் இன்னமும் கையெழுத்துப்பிரதியாக்கி வைத்திருப்பது மகத்தானது.

அவற்றுள் ஆய்வுப்பார்வையில்.....

• வசந்தன் பாடல்கள் - என்ற கையெழுத்துப்பிரதியில் வசந்தன் எனும் பெயர் வரக்காரணம், தோற்றப்பின்னணிச் சுருக்கம், கண்ணகி இலக்கியங்கள், வசந்தன் பாடல்களின் அமைப்பும் கண்ணகி வழிபாடுகளும், வேளாண்மைச் செய்கையில் வசந்தன் என்று பல்வேறு அங்க இலக்கணங்களை வசந்தன் பாடல்கள் தாங்கி நிற்கின்றன.

• வசந்தன் கூத்தின் தோற்றமும் வரவாற்றுப்பின்னணியும். - இதில் வசந்தன் கூத்தின் தோற்றம் மற்றும் சமூகப்பின்னணி, கொம்புமுறிச் சடங்கு, வசந்தன் கூத்தின் தற்கால நிலை என்று கூத்தின் தொன்மையும் தன்மையும் தற்கால நிலைமையும் என்று எழுதப்பட்டுள்ளது.

• வசந்தன் கூத்தின் அளிக்கை முறை - இங்கு தேற்றாத்தீவு மற்றும் வந்தாறுமூலைக் கிராமங்களில் வசந்தன் கூத்தின் அளிக்கை முறைபற்றிய ஆய்வாக எழுதப்பட்டுள்ளது.

• வசந்தன் கூத்துப்பற்றிய ஓர் நோக்கு - இதில் களுதாவளைக் கிராமத்தினை மையமாகக் கொண்டு ஆய்வாக்கப்பட்டுள்ளது.

• வசந்தன் கவிகள் - என்ற நூலாக்க்படவேண்டியதில் பராக்கே, ஊஞ்சல், தானானாப் பள்ளி, பிள்ளையார் வசந்தன், கள்ளியங்கூத்து, கூவாகுயில் வசந்தன், செவல்வாட்டு வசந்தன், அனுமான் வசந்தன், நாடக வசந்தன் என அத்தனை வசந்தன் பாடல்களும் கையெழுத்தாக்கப்பட்டுள்ளது

தேனூரான் பல்வேறு இலக்கியத்துறைகளில் துறைபோந்தனனாக இருக்கிறார். இயல், இசை , நாடக, மாந்திரிக, நாட்டு வைத்தியம் என்று பலவாறு திறமைகளை வெளிப்படுத்தி பல்வேறு விருதுகள் பெற்றாலும் பெருமை என்பது சிறிதுமின்றி பேரெடுக்கப் பிறந்தாலும் இலக்கியம் என்பது ஒவ்வொரு கலைஞனாலும் பயணிக்கக் கூடிதாக இருந்தாலும் அவனது ஆக்கங்கள் நூலுருப்பெறுவதில் பெருதுவைக்கும் இன்பம் அந்தந்த கலைஞனுக்கே சிறப்பு மட்டுமல்லாமல் இலக்கியத்தின் தொடர்ச்சித் தன்மைக்கும் தமிழின் நீடித்து நிலைபெறுதலுக்கும் அவசியம்.

செம்மொழித் தமிழினிச் சாகாது என்றால் ஒவ்வொரு கலைஞனின் படைப்புக்களும் வெளிப்படுத்த வேண்டும். நூலுருவாக்கம் என்பது ஆவணப்படுத்தலின் உச்சம். எனவே இந்தப் பண்படுத்தப்பட்ட தமிழ் நிலத்தை நூலுவாக்க முயற்சிக்கும் போது தமிழ் தாய் பல பிள்ளைகளைப் பெற்றுக்கொள்வாள் என்பது திண்ணம்.

இவரின் படைப்புக்களில் சில அச்சேற்றப்படாமலும் அச்சேற்றி சில மீள்பதிப்புக்கு ஆளாகமலும் என..

• "மட்டக்களப்பின் கிராமியக் கலைகள்"

• "நாட்டார் கலையில் காவடியாட்டமும் இந்துகலாச்சாரமும்"

• "மட்டக்களப்பின் மாந்திரிகைக்கலையும் ஒரு கிராமியக் கலையே"

• "தேற்றாத்தீவு பாலமுருகன் பாமாலை"

• "களுதாவளைப்பிள்ளையார் அற்புதப் பொன்னூஞ்சல்"

• வடமோடி தென்மோடி கலந்த பரிசோதனையாக "அகலிகை" என்ற நாட்டுக்கூத்து

என்று இன்னும் பல எனக்குத் தெரிந்தவை பற்றி சொல்லுகிறேன். 2003 இல் மட்டக்களப்பு மண்முனை வடக்குப் பிரதேச செயலகக் கலாசாரப் பேரவை வெளியிட்ட "தேனகம்" என்ற நூலில் கூட "மட்டக்களப்பில் பறையர் சமூகம்" என்ற ஆய்வுக்கட்டுரை அவரின் சமூகவெளிப்பாட்டின் எழுச்சியை எடுத்தியம்புகிறது.

பல்கலைக்கழக மட்டத்தில் நோக்கும்கால் இவருக்கு எத்தனையோ பட்டங்கள் வழங்கலாம். ஏன் கிழக்குப்பல்கலைக்கழகம் இவரின் பல கட்டுரைகள் உட்பட பல்வேறு ஆய்வுக்குட்படுத்தியிருக்கிறதை மறுக்க முடியாது. ஆனாலும் பல்வேறு நூல்கள் படைக்க எத்தனிக்கும் இந்தக் கிராமத்துக்காரனினால் நூலுருவாக்கம் செய்யமுடியாமல் போவது கிராமத்துக்கலைகள் பண்பாடுகளின் வெளிச்சம் என்பவறை இழந்து இருப்பது மனவேதனை தரும் விடயம்.
இதுவே தான் சேர்ந்திருப்பது வறுமையும் புலமையும்.

இவர் பற்றிய இன்னும் பல சிறப்புக்களை பிறிதொரு பதிவில் எழுதுவதற்கு ஆவலாக இருக்கிறேன். நான் இவர் பற்றிய வீடியோ மற்றும் ஆவணப்படுத்தலாக ஆரம்பித்திருக்கிறேன். இவர் போன்று இன்னும் பல இலைமறைகனிகளான பழம்பெரு இலக்கிய சமய கலாசார மூத்தவர்களைப்பறிய ஆய்வு எழுத ஆவலாக உள்ளேன். காரணம் இருக்கும் போது வாழ்த்தவேண்டும் அவர்களுக்கு புகழ்சேர்க்க வேண்டும் அவர்கள் திறமைகளை மெச்சவேண்டும். இறந்தபின் இவர்கள் பேசப்படவேண்டும் ஆவணப்படுத்தப்படவேண்டும் என்ற முனைப்போடு....

யாராகினும் நூலுருவேற்ற விரும்பினால் கிராமத்துக்காரனின் படைப்பை ஆவணப்படுத்த முனைந்தால் தமிழுக்குச் செய்யும் ஒரு தொண்டாக இருக்கும் என்பது உண்மை.

கனவும் டாக்டர் அப்துல் கலாமும்

"கனவு காணுங்கள்" என்ற மந்திரச் சொல்லின் ஆத்ம புருஷர் என்றே அழைக்கலாம் நமது டாக்டர் அப்துல் கலாம் அவர்களை. எப்போதும் புத்துணர்ச்சியையும் சிந்திக்க வைக்கும், செயல்படத்தூண்டுகிற கருத்துக்களை நமக்கு சொல்லிக்கொண்டிருக்கும் டாக்டர் அப்துல் கலாம் அவர்களின் சிந்தனைகளில் எழுந்தவைகளை (படித்தவற்றில்)பகிர்ந்துகொள்கிறேன். வாசியுங்கள் செயல்படுங்கள். செயல்படுவோம்.
இளையதலைமுறையினருக்காக அவர் சொன்ன விடயங்கள் எனக்குப் பிடித்தவைகளில் சில

தேடல்

உங்கள் மனதில் உள்ள ஆர்வத்தீயை வளர்த்துக்கொள்ளுகள். பெரியவர்களைப் போல் நீங்களும் தொலைநோக்குடையவராய் இருங்கள். அவர்கள் காட்டும் வழியில் நடக்கவேண்டும். நேர்மை என்பது மக்களின் உயரிய குறிக்கோளாக இருக்கவேண்டும்.

உயர்வு

உங்கள் எண்ணம் உயர்ந்ததாயிருந்தால்தான் நீங்கள் வாழ்வில் உயரமுடியும். கடுமையான உழைப்பு, உறுதியான இலட்சியம், அஞ்சாமை மூன்றும் உங்களிடம் இருந்தாக வேண்டும்.
ஒரு பொறியியலாளராகவோ, மருத்துவராகவோ, வழக்கறிஞராகவோ தான் நீங்கள் வரவேண்டுமா? ஏன் ஒரு தொழிலதிபராகக்கூடாதா? எல்லோருக்கும் வேலை தருவது அரசால் இயலாது. எல்லாருக்கும் அரசு வேலை கிடைத்துவிடாது. நாம் ஒரு தொழிலதிபராக வர வேண்டும் என்று கனவு காணுங்கள் பலருக்கு உங்களால் வேலை கிடைக்கும். எதையும் சமாளிக்கும் திறமையை நீங்கள் வளர்த்துக்கொண்டால் அத உங்களால் முடியக்கூடியதுதான்.

போராடுங்கள்

பிரச்சனை வரும்போது எதிர்கொள்ளத் தயங்காதீர்கள். கடுமையாய் எதிர்த்துப் போராடுங்கள். பிரச்சனையின் பிடியில் சிக்கிக்கொள்ளாதீர்கள். அது உங்கள் பிடியில் இருக்கும் பார்த்துக்கொள்ளுங்கள். பிரச்சனையை வெல்ல இதுவே சிறந்தது.


புனிதப்பணி

நான் ஆசிரியர்ப் பணியைப் பெரிதும் நேசிக்கிறேன். ஆசிரியர்கள் தாம் இளைய தலைமுறையினரின் வளர்ச்சிக்கு வழிகாட்டுபவர்கள். ஆயிரமாயிரம் பேரின் வாழ்க்கைக்கு விளக்கேற்றி வைக்கிறார்கள்.

வெளிநாட்டில் வேலை

நம் நாட்டிலிருந்து பல பொறியிலாளாகள், மருத்துவர்கள், இன்னும் பல அறிவியல் நிபுணர்களும் வெளிநாடுகளில் வேலை தேடிச் செல்கிறார்கள். இந்நிலை மாறவேண்டுமானால் இலட்சக்கணக்கில் வேலைவாய்ப்புக்களை நம் நாட்டில் நாம் உருவாக்க வேண்டும்.

கடமை

நன்கு படிப்பது மட்டும் மாணவர்களின் கடமையாகிவிடாது. தங்களுடைய சுற்றுப்புறத்தைப் பசுமையாக வைத்துக்கொள்கிற, சுற்றியிருப்பவர்களின் அறிவை மேம்படுத்துகிற கடமையும் அவர்களுக்கிருக்கிறது. ஒவ்வொரு மாணவனும் இரண்டு மரக்கன்றுகளை நடவேண்டும். படிப்பறிவில்லாத இரண்டுபேருக்கு படிப்பு சொல்லிக்கொடுக்க வேண்டும்.

மேலுள்ள விடயங்கள் நமக்கு அவசியம் ஒரு உந்துசக்தியைத் தரும் என்பது திண்ணம். கொஞ்சம் நான் இதையும் சொல்லலாம் என்று தோன்றுது.
போர் என்ற சூழ்நிலையால் எதை எதை இழந்தோம் என்று எண்ணிப்பார்க்க முடியாத வடுக்களின் காயத்தை ஆற்றிக்கொள்ள வேண்டிய நிலையில் நாம் வளர வேண்டிய தருணம் இது. நமது பிள்ளைகள் வளர்ச்சியுற்றால் நமது சமூகம் வளரும். ஆக நாம் சுற்றியிருக்கும் எங்காவது ஒவ்வொரு பிள்ளையிலும் கவனத்தை முடிந்தளவு செலுத்தி அவர்களின் கல்விக்கு வழிகாட்டி கல்வித்தேவையில் கஸ்டப்படும் பிள்ளைகளுக்கு முடிந்தளவு உதவி செய்து அவர்களை வளர்க்கவேண்டும். இதை ஒரு கடமை என்றும் கட்டாயம் செய்யவேண்டிய தேவை என்றும் கருதுவோம்.

"ஒரு பெண் கல்விபெற்றால் ஒரு குடும்பமே கல்வி பெற்றதாகும்" என்று ஒரு இடத்தில் டாக்டர் அப்துல் கலாம் சொல்கிறார். வாழ்க்கையின் நீடித்த தன்மைக்கு பெண் கல்வி அவசியம். நமது நாட்டில் பல நூற்றாண்டுகள் கல்வியில் நாம் பின்னுக்கும் பொருளாதார வளர்ச்சியிலும் குறைவாக இருக்கிறோம். மற்றைய சமூகத்தின் வளர்ச்சியிலும் நாம் பின்னிலையிருக்கிறோம் என்று நினைத்தால் நாம் நமது சமூகத்தின் சில பிள்ளைகளையாவது வளர்ச்சி பெறச்செய்தாலே போதும்.

ஒரு தனி மனிதன் ஒருவனின் சாதனையைக் கண்டு நாம் பெருமிதம் கொள்வதை விட ஒரு சமூகம் சாதனைகாணவேண்டும்.
வீட்டுக்கு வீடு வாசல் படி இருப்பது போல் கல்வியின் படி(வழி) பெருகவேண்டும் ஒவ்வொரு வாசல்களிலும்.