சிதறும் சில்லறைகள் - 20 (பாரதியும் ரஜனியும்)

டிசெம்பர் 11
எட்டயபுர விற்பன்னன். தமிழ்மொழியின் சிற்பி. பெண்விடுதலைக் கவி என்றெல்லாம் ஆன மகாகவி சுப்பிரமணியபாரதியாரின் ஜனன தினம். எட்டயபுரத்திலே  1882 ஆம் ஆண்டு பிறந்து எத்தனையோ தமிழிலக்கியத்தின் இலேசுத்தன்மையையும் தமிழ்வீரத்தின் திறனையும் ஒரு முழுமையான மொழியில் இருக்கவேண்டிய பண்புகளையும் சொல்லிச்சென்றார் சுப்பிரமணியபாரதியார்.
"ஓடி விளையாடு பாப்பா நீ
ஓய்ந்திருக்க லாகாது பாப்பா."
என்ற பாப்பா பாட்டே நான் கற்றுக்கொண்ட முதல் பாடல் என நினைக்கிறேன். அதற்குப்பிறகு "சின்னஞ்சிறு கிளியே கண்ணம்மா" என்றும் பிறகு "நல்லதோர் வீணை செய்தே என்ற பாடலை எனது நண்பனின் அண்ணன் புனிதன் அண்ணா(போர்களவீரனானான்) பாடிய பின்னர் உதடுகள் உச்சரிப்பில் எழுந்தது.
சில பாடல்கள் கேட்கும்போது பிடித்துவிடும் பின்னர் யார் எழுதியது என்று பார்க்க பாரதியார் என்றதும் இன்னுமின்னும் உள்ளுர இனிக்கும். ஆனாலும் கடந்தவருடமே சொந்தமாக 13-12-2010 அன்றுதான் சொந்தமாக பாரதியார் கவிதைகள் என்ற புத்தகம் வாங்க என்னால் முடிஞ்சது. அதற்குமுன் இரவலாய் பெற்று வாசித்திருக்கிறேன். ஆயினும் சொந்தமாக வந்தபின்பு வாசிப்பது குறைவாகத்தான் இருக்கிறது. இவரது புதுமையும் எழுத்து வன்மையும் தன்மையும் ஈர்த்துக்கொண்டே இருக்கும்.
பாரதியார் பற்றி விக்கிப்பீடியாவில் இங்கு காண்க.

கார்த்திகைவிளக்கீடும் சந்திரகிரகணமும்
இவ்வருடத்தின் இறுதிசந்திரகிரணம் கார்த்திகை விளக்கீடு அன்று சேர்ந்து வந்தது. நான் எப்போதும் இந்நிகழ்வைக் கொண்டாட மறுப்பதில்லை. காரணம் அம்மா தயிர்,வாழைப்பழம், பால் என்பன சேர்த்து ஒன்றாக வெண்பொங்கலில் கலந்து பிசைந்துதரும் பாற்சோறு. அதனை அம்மாவே ஊட்டிவிடுவதும் எங்கவீட்டின் சிறப்பு. சின்னப்பருவத்தில் மெழுகுதிரி கொழுத்திக்கொண்டு வீதிகளில் குறிப்பிட்ட தூரங்கள் இரவுப்பொழுதை "கார்த்திகைக்காரோ பாலுஞ் சோறும் தின்னவாடோ" என்று கத்திக்கொண்டு திரிந்து கார்த்திகைக்காரனைக் கூப்பிடும் நிகழ்வு தித்திக்கும் உணர்வு.
இவ்வருட கார்த்திகை மற்றும் சந்திரகிரகணப்படங்கள் சில.

அம்மாவின் கார்த்திகை நிலாச்சோறு தின்ற திமிரில் மருகள்

நிலவைமறைத்த பூமி

வீட்டு சுற்றுமதில் சுவரில் கார்த்திகைத்தீபங்கள்.

டிசெம்பர் 12
தனது வித்தியாசமான சுப்பரான நடிப்பு. உதவும் நோக்குடன் செயல்படும் தன்மை என்றெல்லாம் தமிழ்சினிமாத்துறையில் என்றும் பதினாறாக "சுப்பர் ஸ்டார்" ரஜினிக்காந்தின் பிறந்தநாள். வாழ்த்துக்கள் தலைவா. ரஜினிகாந்தின் இணையத்தளம் இங்குகாண்க இவர்பற்றி விக்கிப்பீடியாவில் இங்கு செல்க

அண்மையில் வந்ததில் பிடித்த பாட்டு


ஆனாலும் இன்று இன்னொரு நண்பனின் ஸ்டேடஸ் முகநூலில் பாருங்க.

டிசெம்பர் 12 இல் ஓவியம்

"நாம் எமது வீட்டுச்சுவரில் தொங்குவதற்காக இயற்கையின் புகைப்படங்களை விட அழகான படங்கள் வண்ணப்பூச்சு ஓவியங்கள் வரையாமல் குறைந்தபட்சம் ஒரு கலையின் அடித்தளங்களை அமைத்து,நாம் உருவாக்க வேண்டும் ஒரு கலை மனிதநேயத்தையும் சொல்லும். ஓர் இதயத்தின் உட்புறத்தில் கலை உருவாக்கப்படும்."
இவ்வாறு சொன்னவர் தான் நோர்வே நாட்டைச் சேர்ந்த குணச்சித்திர ஓவியர் எட்வர்ட் மண்ச்.(Edvard Munch, டிசம்பர் 12, 1863 - ஜனவரி 23, 1944) இவரது படைப்புகள் அற்புதமானவை. இவருக்கான இணையத்தளத்தை உருவாக்கியவர் றோம் ஜெஷ்டர் (Roman Jaster)இங்குசென்று எட்வர்ட் மண்ச்சின் கைவணங்களைக் காண்க.

பிடித்த ஒரு ஸ்டேடஸ்
அண்மையில் முகநூலில் பிடித்தது.

டிசெம்பர் 13
நாளைய தினமும் 13-12-11 என வரும் ஒரு தினமே.

சிதறும் சில்லறைகள் - 19 (மீண்டும் நான்.)

எழுத எழுத நினைத்து
எழுதாமல் போனேன். ஆனாலும் இன்றைய ஸ்டேடஸ்
"நீ இருந்தால் பிறந்தநாள் வாழ்த்துக்கள். இல்லை என்றால் உனது நேரான தலைமைத்துவ நினைவுகளுடன் நான்."

அதற்காக உன்னை முழுமையாக ஏற்கிறேன் என்று அர்த்தப்படவில்லை.

தலைமைத்துவம் என்பது எவ்வளவு கஸ்டம் என்பது அந்த இடத்திலிருந்து பார்த்தால் தான் தெரியும். 'தலையிடியும் காய்ச்சலும் தனக்குத்தனக்கு வந்தால் தான் தெரியும்' என்று சொல்வுவோமே. அதேபோலத்தான் தலைமைத்துவமும், தலைவர் பதவியும், பொறுப்புக்களும், கடமைகளும் அதனை ஏற்றுக்கொள்ளும்போதுதான் தெரியும் அந்தக் கஸ்டங்களும் நமது பலமும் (Strength), பலவீனமும்(Weakness), வளமும் வாய்ப்புக்களும் (Opportunity and resources), அச்சுறுத்தல்களும் (Threats). நீங்களும் அந்த இடங்களை இடம்பிடித்துப்பாருங்கள் எங்கே நாம் 'நரம்பில்லாத நாக்கால்' காசில்லாததால் வார்த்தைகளை உளறித்தான் விட்டமோ என்று பல ஏக்கங்களும் தப்பு அல்லது தவறுகளும் உணர்த்தப்படும் எதிர்மறையான சிந்தனையுடன். அதேபோல் பலமும் வெற்றி முனைப்புகளும் திறமைகளும் தெரிந்துகொள்ளப்படும் நேர்சிந்தனையாக.

நாளைய நாள்
எனது மெளனங்களுடன் கூடிய அஞ்சலி விளக்குகளை ஏந்திக்கொள்கிறேன் மனதிலும் காயப்பட்ட உள்ளங்களுடன் அழுதுகொள்ளும் நெஞ்சங்களுடன்.

1997/98 பருவகாலங்களில் எழுதியது. வாசியுங்கள் இம்மாதத்துக்கு பொருந்தும்.சில சொற்களை தவிர்த்து சில மாற்றங்களுடன்


வீழ வாழும்

மஞ்சமதில் வீரத் தாலாட்டு கேட்டுற்ற
நெஞ்சமிது வீழாது
நெஞ்சமதில் ஈரத் தமிழ்கேட்டு
வஞ்சஞ்கொண்ட மனது
வஞ்சகனை கண்டுற்று வாசனைகள்
கொண்டு போற்றுவது
பிஞ்சுகளிடமு மில்லை அஞ்சாத்
தமிழன் நெஞ்சுரமுடையான்

தமிழுக்குயிராகி உடல் போர்த்து
உளந்தமிழ்ப் பயிராகி
தமிழுக்குயிராகி உடல் விதைத்து
உடல் தமிழுறவாகி
தமிழுக்குடலாகி உயிர்பிணைத்து
எம்மை தமிழுறவாக்கி
தமிழுக்குறவாகி தமிழ் தளைகட்டி
தமிழான வீரர்களே வாழ்க

கழிபகலும் கங்குற் பொழுதும் களநில
வரம் கண்டு மனம் கறங்கும்
விழிக்கின்ற பொழுது போதும் அவன்
விதிமுடிக்கின்ற தின மின்றென
விடிகின்ற எந்த பொழுதும் தமிழ்
தாய் உதிக்கின்ற நிலமென
விரிகின்ற நிலம் போதும் இருளிடத்து
விடுவிக்க வீரர் மாழும்

கங்குல் மணி யடிக்க கசை யடி
கொடுக்க மனம் கடுவளியா
பொங்கும் மணி யடிக்க கடிது
பூங்குழலேந்தி தாக உளமாய்
வெங்கள மணியடிக்க எம்மின
வீறுசிறக்க வெற்றியென்று
வீழிகிடைக்க மங்கலம்
உலமறிய தமிழெழும்

காப்பிழந்த தாமரையாய் தமிழ்
கற்பிழக்க பொறுக்குமோ
காப்பாள் கொப்பிழக்கா தாமரையாய்
குழல்பிடித்து கடிமரம் நட்டதே
காவிழந்த பலமரமாய் தமிழ்போ
வதோ அவன் வீழவே
காப்பிழக்கா வீரம் வீழுமே
தமிழ் வாழுமே

அதிவேக நெடுஞ்சாலையும் அபிவிருத்திகளும் சில சோகங்கங்களும்

ஆனாலும் நாளைய தினம் 27-11-2011 இலங்கையின் புதிய பரிணாமங்களின் வளர்ச்சியாக 7000 கோடி ரூபாய்களின் செலவில் அதி(???) வேக பாதை கொட்டாவவிலிருந்து மாத்தறையின் கொட்டகம வரையான இலங்கையின் நீண்டதும் பெரியதுமான அதிவேக நெடுஞ்சாலை மாண்புமிகு ஜனாதிபதியினால் திறந்துவைக்கப்பட இருக்கிறது. வரவேற்கிறேன். வெவ்வேறாக பல்வேறு முன்னேற்றங்கள் அவசியம் தேவை மாற்றங்களுடன்.
ஆனாலும் நாளைய தினம் தமிழ்மக்களின் உயிர்நாள் அப்பேர்ப்பட்ட நாட்களில் அனேகமாக பல அபிவிருத்தித்திட்டங்களின் திறப்புவிழா நடைபெறுவது அண்மைய காலங்களில் நிகழ்வதன் மூலம் தமிழ்மக்களின் உணர்வுகளில் ஊசிஏற்றுவதாக உள்ளதாய் இருக்கிறதல்லவா.
ஆனபோதும் "எரிகின்ற காயத்துக்கு அமிலம் ஊற்றாமல் மருந்துகளும் ஆறுதல் வார்த்தைகளும் தந்தால் என்ன"....

மாண்புமிகு ஜனாதிபதியின் ஆட்சியில் என்னைப்பொறுத்தவரையில் சொல்லக்கூடிய உள்ளங்கை நெல்லிக்கனியாக இருப்பது பாதை/வீதிகளின் அபிவிருத்தி. முதல்ல கஸ்டப்பட்டு பல மணித்தியாலங்கள் செலவிட்டு அலுப்படைந்து போனபோது நேரங்களை மிச்சப்படுத்தியபோதும் வாகன விபத்துக்கள் அதிகளவில் நடைபெறுவதை தவிர்க்கமுடியாத நிலைகாணப்படுகிறது. இதற்காக கட்டாயம் மக்களுக்கு சரியான பாதை ஓட்டுதல் பற்றிய விளக்கப்பயிற்சி வழங்கப்பட வேண்டும். ஆனால் நீங்கள் கேட்கலாம் இவர்கள் என்ன கள்ள அனுமதிப்பத்திரங்களுடனா ஓட்டுனராகிறார்கள் என்று. என்னதான் ஊழல் ஒழியவேண்டும் என்று கத்தினாலும் அரசாங்க அலுவலகங்கள் அதிகாரிகள் மட்டத்தைப் பார்த்தால் அனுமதிப்பத்திரங்கள் வழங்கும் திணைக்களங்கள், பாதுகாப்புத் திணைக்களங்கள், அனர்த்த முகாமைத்துவ திணைக்களங்கள், நிவாரணப்பணிகளில் இலஞ்ச ஊழலை தவிர்க்க முடியாமல் இருப்பது கண்கூடு.

வரவேற்கிறோம்
நேற்றுமுதல் முன்னணி பத்திரிகையொன்று தனது விஸ்தரிப்புகளில் ஒன்றாக "டிஜிட்டல் யுகம்" எனும் பகுதியில் வலைப்பூக்களின் வலுவை அதிகரிக்கும் நோக்குடன் "வலைப்பூக்களோடு விளையாடுவோம்" என்று மிக நேர்த்தியாகவும் வெளிப்படையான பல்திறமையான ஊடகத்துக்கேற்ற மிகத் திறமையினராக தனது வலைப்பூவை எழுதுவதுபோல் வித்தியாசமான பாணியில் எழுத்துக்களை கையாண்டு பெருமிக்கிறார் நண்பர் மருதமூரான் (இவரது வலைப்பூவுக்கு இங்கு செல்க)இவரது இந்த முயற்சிக்கு ஆயிரம் கைதட்டல்கள் நெஞ்சுநிமிர்த்தி.வாழ்த்துக்கள் நண்பரே.

ஒரு பாடல்
ஒவ்வொரு பாடல்களில் ஒவ்வொரு சுவை. இந்தப்பாடலில் தவில் மற்றும் கிளரினட் அற்புதமாய் விளையாடியிருக்கிறது. வைரமுத்துவின் வரிகளும் அருமை. அதைவிட நான் ரசிக்கிறேன் ஏ.ஆர். ரஃமானின் அந்தக்கால இனிய படைப்பாய். புதியமன்னர்கள் படத்தில் மனோ மற்றும் குழுவினர்

வானில் ஏணி போட்டு
ஹோய் கட்டு கோடி கட்டு
சொர்க்கம் வந்ததென்று
ஹோய் தட்டு கை தட்டு
மின்னல் நமக்கு தங்க சங்கிலி
விண்மீனேல்லாம் சின்ன மின்மினி
வானவில்தான் நம்
வாலிப தேசிய கொடி



கடைசியாக

"கைகொடுங்கள் கையால் அடிக்காதீர்கள் கையாலாகாதவனில்லை.
தோள்கொடுங்கள் தலை கொடுப்பேன் தலையாலடிக்காதீர்கள்.
தலைக்கனமானவன்."

"உனக்குக் கீழே இருப்பவர் கோடி நினைத்துப் பார்த்து நிம்மதி நாடு" என்று கண்ணதாசன் சொல்லிய வரிகள் நம்மட விதி அவ்வளவுதான் என்று ஏக்கப் பெருமூச்செறிய மட்டுமே உதவும். இவ்வசனம் எங்களை வளர்காது. "நமக்கு மேலே இருப்பவர் கோடி நினைத்துப்பார்த்து முன்னேறு" அதாவது முன்னேற்றத்தின் பாதையில் இருப்பவர்கள் நாம் எப்போதும் எங்களுக்கு இருப்பது அல்லது எங்களது தகமைகள் அல்லது திறமைகள் போதும் என்று எண்ணாமல் எங்களை விட உயர்வான நிலையில் உயர்வான பதவியில் உயர்வான இடத்தில் இருப்பவர்களைப் பார்த்தாவது முன்னேற்றத்தின் பாதையைத் திட்டமிட்டு வளர்ச்சியின் போக்கில் நாம் இருக்கவேண்டும். இதற்காக அவர்கள் எவ்வாறு கஸ்டப்பட்டு அந்த இடத்தை அடைந்தார்களோ அந்த கஸ்டங்களான அனுபவங்கள் எங்களை இன்னுமின்னும் வழிப்படுத்தி முன்னேற்றத்துக்குக் கொண்டுசெல்லும் இல்லையா?.

சிதறும் சில்லறைகள் - 18

நேற்றைய நாள்
2003 ஆம் ஆண்டு ஆரம்பித்து 2008 ஆம் ஆண்டு நிலத்துக்கடியில் கட்டிமுடிக்கப்பட்ட நியுத்திரன் அலைவுகளுக்கான ஒபேரா (OPERA) பரிசோதனையில் தகவல் சேகரிப்பு நடைபெற்று பரிசோதனையின் ஒரு முடிவாக " அணுவின் உபதுணிக்கைகளில் ஒன்றான நியுத்திரன் (Neutron) கற்றைகளின் வேகம் ஒளியின் வேகத்திலும் (3x10^8 m/s) அதிகமாய் இருப்பதாக" உறுதிசெய்த நாள்.
இங்கு செல்க மேலும் விபரங்களுக்கு
1
2

பாடலும் காட்சியும்
இது நண்பரொருவர் முகப்புத்தகத்தில் பகிர்ந்ததுதான். ஏனோ இத்தனைதூரம் என்னைக் கொண்டுசெல்லுது என்று தெரியல. அற்புதமாய் அத்தனையுமாய் சிறப்பாக இருக்குது. பாருங்க.

வாங்க பறந்திடுவோம் எங்குஞ்சுகளா வாங்க பறந்திடுவோம்
வாங்க பறந்திடுவோம் எங்குஞ்சுகளா வாங்க பறந்திடுவோம்




ஏழாம் அறிவு.
அண்மையில் வெளிவந்த பாடலில் ஏழாம் அறிவுப்பாடலும் மொக்கையாய் ஹரிஸின் அதே சொதப்பலாக அமைந்தாலும். இந்தப்பாடல் "இன்னும் என்ன தோழா என்று பால்ராம் ஆரம்பிக்கும்

யாருமில்லை தடைபோட உன்னைமெல்ல எடைபோட
நம்பிக்கையில் நடைபோட சம்மதமே..
என்ன இல்லை உன்னோடு ஏக்கம் என்ன கண்ணோடு
வெற்றி என்றும் வலியோடு பிறந்திடுமே.
வந்தால் அலையாய் வருவோம்
வீழ்ந்தால் விதையாய் விழுவோம்..
மீண்டும் மீண்டும் எழுவோம்
....

பனிமூட்டம் வந்து படுத்தென்ன சுடும் பகலவன் மறையுமா...
அந்த
பகை மூட்டம் படியாமல் எங்கள் இருவிழி உறங்குமா.

தெரிந்த பழகிய வரிகளாய் அமைந்தாலும் இதயத்தில் இணைந்திருக்கும் இசையாய் வரிகள் துவம்சம் செய்யுது.
அப்படியே கேட்டுப்பாருங்கள்.



கவிதை

எந்த அவசரப்பொழுதுகளிலும்
நீ மறக்கலாம்
ஏன் யார் என்ற நினைவே
இல்லாமல்போகலாம்.
ஆனாலும் என் "முதல்" என்ற ஒன்றில்
நீ மட்டுமே இருப்பதால்
நீ என்னுள் நிரந்தரமாய்
உயிர்ப்பித்திருப்பாய்.

ஸ்டேடஸ்
தவறிய என்னுடைய ஸ்டேடஸ்கள் சில .......

"எந்தமனக்குழப்பமான பிரச்சனைகளையும் இன்பமாக பேசி அலசுவதால் குறைத்துவிடலாம். பேசாமல் இருப்பதால் என்னபயன்? உன்னையும் இழக்க நான் தயாரில்லை. விதண்டாவாதங்களால் ஏற்படும் விரிசல்களை விட புன்னகைக்கு ஆயிரமாயிரம் மடங்கு வலிமை அதிகம்."

"யார் யாரோ எல்லாம் நன்றி சொல்லிக்கொண்டு
நானும் யாருக்கோவெல்லாம் நன்றி சொல்லிக்கொண்டு..
இப்படியே நீளுகிறது அன்பென்னும் அட்சயம்"

"உன் பேனா முனையிலே
நீ எழுதப்படுவாய்
உன் எழுத்துக்களால் உன்
பெற்றோர் ஆசிரியர்களினது
பெயர்கள் எழுதப்படும்.
வாழ்த்துக்கள் ஆசிர்வாதங்களுடன்... Wish u all the best for AL Students"

"ஆயிரம் மாற்றங்களை செய்திடணும் என்று எண்ணிக்கொண்டிருப்பதை விட ஒரு மாற்றத்தையாவது ஆரம்பித்துவிடுவதும் வெற்றி தான்
##எண்ணியகருமமாற்றல்##"

"நீ (நீங்கள்) நேசிக்க மறந்தாலும் உன்னை (உங்களை) நினைக்கத் தவறுவதேயில்லை.
நினைவுகளும் கனவுகளும் சேர்ந்த கலவையில் நான் அருட்டப்பட்டுக்கொண்டே இருக்கிறேன்.
ஓ... நான் சுயாதீனமானவன்.."

"உங்கள் இறந்தகாலம் இழந்தகாலம் என்பது உங்கள் குழந்தைகளின் எதிர்காலம் அல்ல! அல்ல!! ##அண்மையில் வானொலியொன்றில் கேட்டது## பிடித்தது"

"பேர் கேட்கும் இடங்களிலே கால் வைத்து சிரிக்கும் தலைகள் வளர்ந்துகொண்டே இருக்கும்... அந்தப் "பெயரில்" ஒட்டிக்கொண்டு... ##பிறநம்பிகள் = தன்னம்பிக்கையிலிகள்##"

"அத்தனை உயரங்களையும் தாண்டுவேன், நீ என் ஊன்றுகோலை வெட்டிவிடலாம். உணர்வுகளை களவாட முடியாது
அவை எனக்குச் சொந்தமானவை."

"சில கனவுகள் காணவேண்டுமென்றே பல கனவுகள் காணாமல் போகின்றன. மொத்தத்தில் எல்லாமே கனவு வாழ்க்கையடா இது"
"மற்றவர்களினதும் எனதுமான கடினவேலைகளால் அன்பான பல உறவுகளின் அழைப்பைக்கூட மதிப்பளித்து கதைத்துக்கொள்ள முடியாத நிலமை கொஞ்சம் கஸ்டமானதுதான். ##தவறிய தொலைபேசி அழைப்புக்கள்##

ஒரு படம்

மாமா என்று சொன்னவள் "மாம்" என்று அழைக்கிறாளே.. ஒருவேளை இவளை நான் 'மருகள்' என அழைப்பதாலா?
ஆனாலும் இவளின் ஆள்காட்டி விரலில் இருப்பது நான்.
அந்த புன்சிரிப்பில் விழுந்துவிடுவது எல்லோரும்.
நீ தேவதை தான்.

சிதறும் சில்லறைகள் - 17

இன்றைய நாள்

உலக புகையிலை எதிர்ப்பு நாள்
வருடந்தோறும் மே 31 ஆம் நாள் கொண்டாடப்பட்டு வரும் இத்தினம் உலக சுகாதார நிறுவனத்தின் உறுப்பு நாடுகள் சேர்ந்து 1987ம் ஆண்டில் சிறப்பு நாளாக அறிவித்த நாள் புகைத்தலின் பாதகவிளைவுகளுக்காக அதனை எதிர்க்கும் ஒரு விழிப்புணர்வாக இத்தினம் புகையிலை எதிர்ப்பு நாளாகிறது.

உலகில் மனித இறப்புகளைத் தோற்றுவிக்கும் முக்கிய காரணிகளில் புகையிலை இரண்டாவது இடத்தை வகிக்கிறது.

நல்லதொரு விடயம் வீரகேசரியில் வந்தது இங்கு சென்றுபார்க்க



Anti Tobacco Day 2011 from Bariq Sabzwari on Vimeo.

படம்

இங்கே ஆவணமாக்கபட்டுள்ளது போல் உள்ளது சினிமாவும் புகைத்தலும் அதன் தாக்கமும்..

பாடல்..
கடைசியில் இந்த பாட்டு உங்களுக்கு என்னத்தை சொல்கிறது. வா வா அன்பால் படி கட்டு..
நீ பிரிந்திருப்பது என்பது ஒன்றும் விசயமல்ல. ஆனால் சேர்ந்திருப்பதன் மகிழ்ச்சியையும் இன்பத்தையும் இழக்கநேரிடும் அல்லவா.. இங்கே வா இதயம் இணைந்து அன்பு காட்டு. இதற்கும் விளக்கம் தராதே மீண்டும் நாங்க நல்லவங்க நீங்க யோசிக்கிறதுக்கு என்னப்பா செய்ய. அன்பு நிரந்தரம் உனக்கும் தெரியும் எனக்கும் தெரியும். ஆனால் அதைக்கட்டிக்காப்பது தொடர்ந்து பேணுவது எவ்வளவு கஸ்டம் தெரியுமா..
எனக்கு சின்னவகுப்பில் படிப்பிக்கும்போது ஒர் ஆசிரியர்(சமூகக்கல்வி பாடம் படிப்பிப்பவர்)"டேய் நல்லவனா ஆகிறதோ சுலபம் ஆனால் அதைக்கட்டிக்காப்பது அதைவிடக் கடினம். இது எப்படி எண்டாடா சிறிய போக்குக்குள் புகுந்துபோயி வெளியேறுவது போல, பெரிய போக்குக்குள் இலகுவாக நடந்துபோகலாம் ஆனால் முன்னயது பெரும் கஸ்டம்" (அவர் போக்குக்குள் என்றது மதகு என்று சொல்லுவோம் அதில் சிறிய பாலங்களில் இருக்கும் நீர் வெளியேற்றும் குழாய்கள்)
அவர் சொன்னது அப்ப விளங்கல ஆனா இப்பவும் அவர் வந்து சொல்லிப்புட்டு போறது போல இருக்கு. ஆசிரிய ஐயாவே வணக்கம் என்றும் உங்களுக்கு




ஒரு ஸ்டேடஸ்
"அன்பு அளவிடலில் அலகு இல்லை
உணர்வுகளால் மட்டும் கலக்கும் உறவு அது..."

சிதறும் சில்லறைகள் - 16 ( செலவழியுங்கள்)

இன்றைய தினம்

"சர்வதேச குடும்ப தினம்"
குடும்பங்களில் ஏற்படும் உளப் பிரச்சனைகளை தீர்க்கும் ஒரே மருந்து குடுப்பத்வர்கள் சேர்ந்து கதைத்து பரஸ்பர தன்மையினூடு உல்லாச நிலையை மனதுக்குள் சேமித்துக்கொள்ளும் தன்மைதான்.
இதற்காகவே இத்தினம் கொண்டாடப்படுகிறது.

ஒரு கதை: "அம்மா வாங்கிய செல்போன்..."

"அவசர அவசரமாய் தேடிக்கொண்டிருந்தாள் சுமி செல்போனைக் காணல என்று தனது மகளும் கணவரும் அவளுமாய் மூலைமுடுக்கெல்லாம் தேடியும் செல்போன் கிடைக்கல. அந்த சீனத் தயாரிப்பான சிவப்பும் கறுப்புமாய் வர்ணம் பூசிய விலைகுறைந்த பார்க்க ஏதோ நல்ல மார்க்ட் உள்ள செல்போனாய் தனது அத்தனை அவசரங்களையும் வேகத்தையும் கொண்டுசெல்ல உதவிக்கொண்டிருந்த அது இப்ப அவசரமாய் தேவைப்பட்டது உயர்கல்வி நிலையத்திலிருந்து இப்ப உடனடியாக அழைப்பொன்று வரும் என்று பதறிக்கொண்டிருந்ததையெல்லாம் மெளமாய் பார்த்துக் கொண்டிருந்தான் தேசிகன்.

ஒரு தரமிக்க போனுக்கு இவ்வளவு கஸ்டப்படுறாங்களே... சே.. அம்மா உழைக்கிற உழைப்பில் ஏன் புதிசா ஒரு நல்ல தரம் கூடிய உடல்நலத்துக்கு பாதிப்பில்லாத ஒரு செல்போனை வாங்கினால் என்ன?? என்றெல்லாம் தனக்குள்ளே கேட்டுக்கொண்ட தேசிகன் நேற்று தனது அக்கா பாடசாலையில் செல்போன் சம்பந்தமாக நடந்த கருத்தரங்கில் சொன்னவற்றை அம்மாகிட்ட சொல்லும்போது கேட்டுக்கொண்டதை மீட்டுப்பார்த்துக்கொண்டான் மறுபடியும்.

அவள் " அம்மா இப்ப மிகவேகமாகவும் அதிமாகவும் பயன்பாட்டிலிருக்கும் செல்போனால் தான் வருத்தங்களும் பிரச்சனைகளும் அதிகரிக்கிறது. இப்பொழுது மலிவாகக் கிடைக்கும் செல்போன்களினால் உடல்நலத்துக்கு கேடும் காது மற்றும் பல உறுப்புக்களுக்கு பாதிப்பும் மூளையில் கட்டி இன்னும் புற்றுநோய் போன்ற பல நோய்கள் உருவாவதற்கும் காரணமாக இந்த தரமற்ற செல்போன்களே காரணமாய் அமைவதாய் .... என்று விரிவுரையில் நடந்த அத்தனை விடயங்களையும் சொல்லிக்கொண்டிருந்ததை கவனமாய் கேட்டுக்கொண்டிருந்த தேசிகன் அடிக்கடி அம்மாட செல்போனை பார்த்து அவள் சொன்னவற்றை பரீட்சித்துப் பார்த்துக்கொண்டே இருந்ததை வீட்டிலிருந்த யாரும் கவனிக்கல.

அப்படியே தேசிகன் வீட்டின் மேல்மாடியில் ஏறி பலமாக அம்மாவின் அந்த செல்போனை தரையை நோக்கி தனது பன்னீரெண்டு வயதுசக்திக்கேற்ப வீசி எறிந்தான் இனிமேல் அம்மாவோ யாரோ இதைப் பயன்படுத்தப்படக்கூடாதென்று...
அப்பா "தேசிகன் நீ ஏன் தேடல போனை நாங்கள் எல்லோரும் தேடும் போது நீ மட்டும் பேசாம இருந்தா "..
"அப்பா... அப்பா.... அம்மா.... நான் சொன்னா நீங்க என்னை அடிப்பீங்க..." கண்ணீரை பொலபொலவென விழுத்திக்கொண்டிருந்தான். "ஏன்டா என்ன.. என்ன பிழை செய்த"
"நான்.. நான் " . "சொல்லுடா".. " நான் அதை உடைச்சு எறிஞ்சிட்டேன்.. " அடிக்காதீங்கப்பா.. அப்பா"

என்று தான் அறிந்த அக்கா சொன்னவற்றையெல்லாம் சொல்லி " அம்மா எனக்கு நீங்க வேணும் அம்மா.. வீட்டில அதிக அழைப்புக்களும் தொலைபேசிக்கான அதிகமாகச் செலவழிப்பதும் நீங்க தானே அம்மா... உங்களுக்கு புற்றுநோய் அல்லது மூளைக்கட்டிகள் வந்தா நான் எப்படிமா வாழுற.. எனக்கு அம்மா என்று சொல்ல வேற யாரம்மா இருக்கிறா .. அம்மா .. அம்மா நான் பிழைசெய்யலம்மா... எனக்கு நீ வேணும்... "

வந்த கோபத்துக்கு அவனைத் திட்டித்தீர்த்துக்கொண்டு அந்த உடைந்த செல்போனைத் தேடி சிம்கார்ட்டை தேடிஎடுத்துட்டு அந்த இரவு கனமான இராத்திரியாகவும் வேனையாகவும் அமைந்தது அவர்கள் நால்வருக்கும்..
அடுத்த நாள் காலையில் தேசிகன் எழுந்து " அம்மா எனக்கு இரவெல்லாம் நித்திரையில்ல..என்னால நல்லா தூங்கிக்கொள்ள முடியல.. எனக்கு நீ வேணும்மா.."என்றவனை மீண்டும் ஏசிவிட்டு பாடசாலைக்கு கூட்டிக்கொண்டுவிட்டுட்டு அவளும் பாடசாலைக்கு போய் கண்கலங்கியவளாய்.. " அவன் செய்த அத்தனை செயல்களும் எனக்காகத் தானே என்வாழ்வு அவனோடு இருக்கவேணும் என்றுதானே இவன் அப்படிச் செய்திருக்கிறான்.. நான் மிகவும் அவசரமான விரைவான வாழ்க்கை நடத்தி உழைத்து வருகிறேன். யாருக்காக எல்லாம் எம்புள்ளைகளுக்குத் தானே.. அவன் யோசித்ததெல்லாம் என்னால் யோசிக்கவோ அவனோடு அளவளாவவோ நேரத்தை ஒதுக்கிக்கொள்ளாமல் நான்... என்ன வாழ்க்கை.. ஏன் அவ்வளவு ஏச்சு அவனுக்கு.. அவன் என்மகன்.. அவனுக்கு நான். அவன் ஆசை நான்.. .. "

பின்னேரம் தேசிகன் வந்து வீட்டிலே ஒரு பையில் அழகிய பெட்டி "அம்மா அம்மா" என்று பெருமிதத்தால் அவளைக்கட்டி அணைத்துக்கொண்டு அழுது இந்த போன் அழகானதும் பாதுகாப்பானதும்.. நீங்க என் அம்மா"... என்று அந்த புதிய போனை மீண்டும் பார்த்துக்கொண்ட தேசிகனை ஓரமாய் பார்த்துக்கொண்டிருந்தார் அப்பா....


செலவழியுங்கள்

பிள்ளைகளுக்காக நேரத்தை செலவழியுங்கள். குடும்ப உறவில் ஏற்படும் அத்தனை மனக்கஸ்டங்களுக்கும் காரணம் நாம் அனைவரும் மனம்விட்டு கதைப்பதில்லை. பணம், உழைப்பு, பொருளாதார பெருக்கம் அத்தனை சுகத்தைத் தராது நமது சுகபோக வாழ்க்கை என்கிற நினைப்பிலே அவை நிலைநிறுத்தப்பட்டிருக்கும். ஆனால் மனசு நலம்பெற அத்தனை குடும்ப உறவுகளோடும் ஒன்றிணைந்து கதைத்து பிரச்சனைகளுக்குத் தீர்வுகண்டு மகிழ்ந்து குலாவும் பொழுதிலே வாழ்க்கை இனிக்கும். எவ்வளவு செலவழித்தாலும் பணத்திலே நிம்மதி இல்லை. குறையுது என்ற நினைப்பே எண்ணத் தோன்றும். இல்லையே என்ற எண்ணமும் வாழ்க்கை வாழப்படாமல் போகும். ஆனால் அதற்கு பதிலாக பெற்றோர் பிள்ளைகளுடன் நேரத்தை செலவழித்து மகிழ்ச்சியை சேமிக்கலாம் இல்லையா..

"இன்றைய ஸ்டேடஸ்"

"அவசர யுகத்திலே மணித்தியாலங்களை செக்கன்களில் கடக்கும் வாழ்க்கை வாழும் நாம் ஆண்டுச் சந்தோசங்களை தவறவிடுகிறோம். "

எப்போதும் எதிர்காலத்துக்காக வாழுகிறோம் நிகழ்கால சுகத்தையும் இப்பொழுது கரைத்துக்கொண்டு வேதனைகளை தேக்கிக்கொண்டு.. வாழும் பொழுதுகளில் இனிய சொற்களையும் பரஸ்பர இன்பங்களையும் சேமியுங்கள் நேரத்தை செலவழித்து எதற்காக வாழ்கிறோம் என்பதன் அர்த்தமுணர்ந்து ...

குறும்படம்
last bell

சிதறும் சில்லறைகள் - 15

இன்றைய நாள்
பாவேந்தர் பாரதிதாசன் நினைவுநாள் - 21-04-2011
இதை எனக்கு ஞாபகப்படுத்தியது முனைவர் மு. இளங்கோவன். நன்றி அவருக்கு. அவர் வலைத்தளத்தில் எழுதியதை இங்குபோய்க் காண்க முனைவர் மு. இளங்கோவன்

இதுகூட இப்பொழுதுகளில் ஞாபகத்துக்கு வருவதில்லை. அவ்வளவு தமிழ்ப்பற்றாளர்கள் நாம்.

அவர்கவிதையில் யாவரும் அறிந்த அந்த தமிழுக்கு என்ன பெயர்?

தமிழுக்கும் அமுதென்று பேர் - அந்தத்
தமிழ் இன்பத் தமிழ் எங்கள் உயிருக்கு நேர்!
தமிழுக்கு நிலவென்று பேர் - இன்பத்
தமிழ் எங்கள் சமூகத்தின் விளைவுக்கு நீர்!
தமிழுக்கு மணம் என்று பேர் - இன்பத்
தமிழ் எங்கள் வாழ்வுக்கு நிருமித்த ஊர்!
தமிழுக்கு மதுவென்று பேர் இன்பத்
தமிழ் எங்கள் உரிமைச் செம்பயிருக்கு வேர்
தமிழ் எங்கள் இளமைக்குப் பால் - இன்பத்
தமிழ் நல்ல புகழ்மிக்க புலவர்க்கு வேல்!
தமிழ் எங்கள் உயர்வுக்கு வான் - இன்பத்
தமிழ் எங்கள் அசதிக்குச் சுடர்தந்த தேன்!
தமிழ் எங்கள் அறிவுக்குத் தோள் - இன்பத்
தமிழ் எங்கள் கவிதைக்கு வயிரத்தின் வாள்!
தமிழ் எங்கள் பிறவிக்குத் தாய் - இன்பத்
தமிழ் எங்கள் வளமிக்க உளமுற்ற தீ!

------பாரதிதாசன் கவிதைகள்

பிடித்த பாடல்
அண்மையில் ஒரு நண்பர் அண்மைய புதுப்பாடல்களில் நல்லபாட்டு எது என்று கேட்க வேறொரு நண்பர் பகிர்ந்தார் குள்ளநரிக்கூட்டம் திரைப்படத்தில் கார்த்திக் சின்மயி பாடிய பாடலை. கேட்டேன் பிடிக்குது அந்த மெல்லிசை. புதியதொரு இசையமைப்பாளர் செல்வகணேஸ் (எனக்கு புதுசு) இவரது இந்த விழிகளிலே என ஆரம்பிக்கும் இந்த பாடலின் வரிகளுக்கு அற்புதமான குரலால் வசியப்படுத்தியிருக்கிறார்கள் பாடகர்கள். இசை இனிமை.

விழிகளிலே



ஒரு ஸ்டேடஸ்

"எனக்குதவணும் என்று யாருக்கோவுக்காக கஸ்டப்படாதே.
யாருக்கோவாக உன்னை இழக்க நான் தயாரில்லை.
எனக்கான அன்பை நான் தவறிவிடுவேன்.
அன்பு நிரந்தரம்"

நாம் யாரோ ஒருவருடன் நட்பு வைத்திருப்போம். ஆயினும் சில நேரங்களில் குறித்த நண்பரிடம் யாரோ ஒருவருக்காக நாம் ஒரு உதவி கேட்போம். அவ்வுதவியை செய்ய ஒப்புக்கொள்வதா இல்லையா? ஒப்புக்கொள்ளாவிட்டால் நம்ம நண்பர் நம்மளை வெறுத்துவிடுவாரே அல்லது நட்பின் இடைவெளி கூடிவிடுமே என்றெல்லாம் யோசிக்கத்தோன்றும். சிலவேளை அதுவே நட்பின் முறிவுக்கு காரணம் கூட ஆகலாம். ஆனால் இடையில் வந்த யாரோ ஒருவருக்காக நாம் ஏன் நமது நண்பரின் நட்பை இழக்கவேண்டும். ஆதலால் நண்பர்களிடம் உதவிகேட்கும் போது கவனமாகவும் அவதானமாகவும் வெளிப்படையாகவும் இருத்தல் வேண்டும்.
தெளிவான மனதுடனும் சிந்தனையுடனும் நட்பின் முகவரிகளை அடயாளம் கண்டுகொள்ளவேண்டும். ஒரு முறை உதவிசெய்யாவிட்டால் ஒருமுறையேனும் உதவிசெய்யாமல் போய்விடுமா என்ன. பின்னர் நாம் கேட்ட உதவியைவிட பன்மடங்கு உதவி பரிமாறிக்கொள்ளலாம் இல்லையா.
அன்பு நிரந்தரம்.

புத்தகம்

இந்திரா பிரியதஷ்சினியின் இரண்டாவது நிழல் புத்தகம் வாசித்தேன்.ஒரு குடும்ப நாவல். நல்லதொரு எழுத்தாடல். வித்தியாசமாக இயல்பான விடயங்களை இலகுவாக சொல்லியிருக்கிறார். அங்கங்கே கொஞ்சம் அலசல். இன்னும் அழகாக நகர்த்தியிருக்கலாம் முடிவை. காரணம் முடிவில் அவசரமாக்கப்பட்ட உணர்வு. ஆனாலும் நெஞ்சில் நிற்கும் ஒரு கதைவடிவம். அன்பும் அரவணைப்பும் இல்லாதபொழுதுகளில் குடும்பத்தில் ஏற்படும் பிரச்சனைகள் பற்றி சொல்லும் நாவல். குற்றங்களில் கூடியது அடுத்தவரை துன்புறுத்தி இன்பம் காணுதல் என்பதையும் அன்பின் தேவையையும் சொல்லியிருக்கும் விதம் அழகு.

ஒரு குறும்படம்
நண்பேன்டா....

சிதறும் சில்லறைகள் - 14

இன்றைய நாள்:
இந்தியத் தமிழக சட்ட சபைத் தேர்தல் இன்று. இதற்காக நண்பரொருவர் முகப்புத்தகத்தில் எழுதிய குறிப்பு எனது எண்ணத்தையும் ஏற்றுள்ளதால் இங்கு பகிர்கிறேன்.(நன்றி மரூ)

"அடுத்த ஐந்தாண்டுக்கான ஆட்சியாளர்களை தேர்ந்தெடுக்கும் தமிழக வாக்காளர்களுக்கு மனவருத்தத்துடனான வாழ்த்துக்கள். பில்லியன் சனத்தொகை கொண்ட நாட்டில் கோடிகளில் ஊழல் செய்தால் யார் மதிப்பது, பில்லியன்களிலேயே ஊழல் செய்வார்கள் வருகிற ஆட்சியாளர்களும்."

இன்றைய குறும்படம்:
தற்போது வேலையில்லாப் பிரச்சனை அதிகரித்துச்செல்கிறது. இந்தக் குறும்படம் எதை எதையே ஏதோ பல விடயங்களை கூறிச்செல்கிறது.
பாருங்கள்.


மாற்றம் ஒன்றே மாறாதது
நாம் பேசும் பேச்சிலும் நடையிலும் மாற்றம் வேண்டும். இல்லையேல் வாழ்க்கையின் பல பகுதிகளை வாழாமல் போகும் வெறும்பக்கங்கள் அதிகரித்துவிடும்.

நாம் பயன்படுத்தும் சொற்களுக்கு உண்மையில் எவ்வளவு மதிப்பு இருக்கிறது என்பது நமக்கு தெரிவதில்லை. அதேபோல் அதுவே நமக்கு எவ்வளவு விபரீதமான தன்மையை ஏற்படுத்தும் என்பதும் தெரியமறுப்பது இயல்பு. நமக்கு தெரிந்த எத்தனையோ சொற்களை பேசாமல் விடுவதும் பேச வேண்டிய விடயங்களை தவிர்த்து வேண்டாத விடயங்களை அலசுவதும் நமது வழக்கமாகியிருக்கிறது. ஆயினும் ஒவ்வொரு படியிலும் எம்மால் மாற்றம் கொண்டுவரமுடியும் அதுவே நமது முன்னேற்றத்திலும் வெற்றியிலும் வாழ்க்கையில் கொண்டுவரும். இதுவும் நமது நண்பரொருவர் பகிர்ந்த குறும்படம் ஹாய் அரும்பாவூர் நன்றிங்க.



கவிதை:

நான் இருட்டில்
வாழ்கின்ற போதும்
பகல்களாய் இருக்கும்
உன்
கடைசி சிரிப்பு

நன்றி
அண்மையில் நமது சகோதரம் புலம்பெயர் உறவு நமக்கு ஒரு புகைப்படக்கருவியை(Camera)அனுப்பிருந்தார். மிகவும் மகிழ்ச்சி. நன்றி அண்ணா. இயற்கையை ரசித்து புகைப்படம் பிடிப்பதில் ஒரு ஆர்வம். இததை எப்போதும் என்மனம் விரும்பும். இதற்கு துணைநிற்கும் இக்கமெரா.

சித்திரைப் புத்தாண்டு
உண்மையில் எனக்கு இருக்கும் நீண்டகால சந்தேகம் இந்த சித்திரைப் புத்தாண்டு "தமிழ் சித்திரைப் புத்தாண்டு" என்று சொல்லுவர். உண்மையில் இது சமய சம்பந்தமான பண்டிகையா இல்லை இனம் அல்லது மொழி சார்ந்ததா? ஏனெனில் சமய சம்பந்தமானதென்றால் இது " இந்து அல்லது சைவ சித்திரைப் புத்தாண்டு" என்று வரவேண்டுமே. தமிழ் என்று வருவதனால் யார் யாரால் கொண்டாடப்படவேண்டும்.?? விவாதிக்கும் நோக்கில் அல்ல. இதையும் சேர்த்து அரசியல் லாபம் கொள்வோருக்காக கேட்டுக்கொள்வது.
என்னைப்பொறுத்தவரையில் இதை சித்திரைப் புத்தாண்டு என்று ஏற்று ஒரு இன்பநிறைப் பண்டிகையாக கொண்டாடவேண்டியதே. இதற்காக புது ஆடை புது பானை பொங்கல் என்று ஏராளமான ஏற்பாடுகள் இருந்தாலும், கொண்டாடும் போது பக்கத்து வீட்டிலும் அடுப்பெரிகிறதா என்று சற்று பார்த்துக் கொள்ளுங்கள். உங்கள் மகிழ்ச்சியில் மற்றவர்களையும் மகிழ்வுற செய்வதில் பன்மடங்கு சந்தோசம் வரும் என்பது உண்மை.

"அனைவருக்கும் இனிய சித்திரைப் புதுவருட நல்வாழ்த்துக்கள்"
இந்நாளையும் இனிய நாளாக்குக.

மற்றொரு ஆரம்பம்
எனது நண்பனொருவன் சிங்கப்பூரில் வசித்துவரும் இந்திய நண்பன். வெறும் வலைப்பதிவில் இதயம் இணைந்தவன். நல்லவன். வல்லவன். கிராமத்துக்காரன். இதுபோதும் இவனுக்கு.
கருப்புசாமி என்னும் கருப்பு, நமது கிராமத்து மாணவனொருவனுக்கு பணஉதவிமூலம் அவரது கல்விக்கு ஒரு உந்துசக்தியாக இருப்பதாக உதவுவதற்கு முன்வந்துள்ளான். இம்மாதம் முதல் இதை ஆரம்பிக்கவேண்டும் என்ற முனைப்பில் இருக்கிறோம். நன்றி நண்பனே.
"நீ யாருக்கோ செய்யும் உதவி உனக்கு யாராலோ வந்து சேரும்"

சிதறும் சில்லறைகள் - 13

கடந்த மாதம் எழுத முடியாமல் போயிற்று. சிக்கித் தித்திக்கும் உள்ளங்களுக்கு தலைவணங்குறேன் மன்னியுங்கோ..

இன்றைய நாள்

கிறிக்கட் விளையாட்டின் உலகக்கிண்ணம் 2011 ஐ வெல்லப்போகும் அணியைத் தீர்மானிக்கும் இறுதிப்போட்டி நடந்து வரலாற்றில் பதிவாகும் நாள்.

இரு அணிகளும் மிகப்பெரிய அணி என்று சொல்லுமளவுக்கு என்னால் முடியல. ஆனாலும் திறமையான வீரர்களையும் கொண்டுள்ள அணி என்பது எனது கருத்து. ஆனாலும் இலங்கை அணிக்கு அண்மைக்காலமாய் தோள் கொடுக்கும் எனது விருப்பத்துக்குரிய அஞ்சலோ மத்தியூஸ் விளையாடாதது கவலையளிக்கிறது.

ஆனாலும் முரளி, சச்சினின் இறுதி உலகக்கிண்ணப் போட்டி என்பது பார்வையாளர்களாகிய நமக்கு சற்று உற்சாகத்தை தரும். ஒவ்வொரு ஆரம்பத்துக்கும் முயற்சிகளுக்கும் திறமைகளுக்கும் வெற்றி இலக்கை எட்டி சாதனைகளோடு விடைபெறும் வீரர்களுக்கு வணக்கம்.
இவ்விளையாட்டில் விளையாட்டை விட அரசியலாய் தமிழினமாய் எடுத்துநோக்கப்படுவதை கண்டிக்கிறேன். யாரோ தெரியாத என்னவென்று கூட புரியாத நிலை வந்தாலும் கால்பந்து போட்டியை ரசித்து ஏதோ ஒரு அணிக்கு சார்பாக இருக்கும் நமது மனது கீழ்த்தர அரசியலை ஒரு விளையாட்டின் வியர்வைக்குள் கொண்டுவருவதை வன்மையாக எதிர்க்கிறேன்.

பாடலாஞ்சலி

கடந்த மாத ஆழிப்பேரலையில் சிக்கி நிலைகுலைந்து உறவுகளுக்காக இந்தப்பாட்டை சமர்பித்து அவர்களின் மீண்டுமொரு முயற்சிக்கு வெற்றிக்கு உதாரண புருஷர்களாக அமைய இருக்கவேண்டுமென்று பிராத்திக்கிறேன்.



Lyrics:-

Pray for me brother
Pray for me brother
Pray for me sister
Are you searchin’…
Pray for me brother

Lookin’ for the answers To all the questions In my life
Will I be alone Will you be there By my side
Is it something he said Is it something he did
I wonder why He is searchin’ For the answers
To stay alive

Could you ever listen Could you ever care
To speak your mind
Only for a minute For only one moment
In time

The joy is around us But show me the love
That we must find
Are you searchin’ For a reason to be kind, to be kind…
He said… Pray for me brother

Pray for me brother Pray for me sister
Pray for me brother Say
what you wanna say now
But keep your hearts open
Be what you wanna be now
Let’s heal the confusion
Pray for me brother

Don’t let me take When you don’t wanna give
Don’t be afraid Just let me live
Don’t let me take When you don’t wanna give
Don’t be afraid Say what you wanna say now
But keep your hearts open

Be what you wanna be now Let’s heal the confusion
Pray for me brother Pray for me brother
I’m ashamed ah, brother be dying of poverty
when he down on his knees its only then he prays
And it’s a shame ah, brother be dying of ignorance
cos the world is a trip and everybody’s a hypocrite
Need to stop ah , taking a look at the other
I’m not ashamed of poverty
need to be making his life better
So think about it, think about it once more
cos life is a blessing and it’s not justa show, ah
Round and round the world is spinning around

We need to be singing a prayer, we need to be singing it now
Round and round the world is turning around
We need to be singing a prayer, we need to be singing it now
Need to be feeling the power, need to be feeling the faith
We need to coming together just to win this race

Need to be feeling the power, need to be feeling the faith
We need to coming together just to win this race (2)

Are you searching for a reason to be kind ?



ஒரு ஸ்டேடஸ்
டோக்கியோ பஸ் நிலையத்தில் காணப்பட்ட வாசகம்

"இங்கே பேரூந்துகள் நிற்கும்
காலம் நிற்பதில்லை
எனவே நேரத்தை வீணடிக்காமல்
உங்கள் வேலையைக் கவனியுங்கள்.

ஒரு இணையம்

புவிநடுக்கம் பற்றிய தகவல்களை அறிய இத்தளத்துக்கு சென்றே பார்த்துக்கொள்ளுங்கோ
நிலநடுக்கம்

சிறிதாக சிதறியிருக்கிறது. மன்னிக்க..

சிதறும் சில்லறைகள் - 12 (நினைவுகள்)

இன்றையநாள்
சார்ல்ஸ் டார்வின் தினம் (Charles Darwin Day)
இயற்கைத் தேர்வு மூலம் கூர்ப்புக் கொள்கையை வெளியிட்டு மனிதனுக்கு உணர்த்தப்பட்ட உயிரிகளின் அடிச்சுவடுகளுக்கு காரணம் கற்பித்த அறிஞர் சார்ல்ஸ் றொபேட் டார்வின் (CHARLES ROBERT DARWIN)அவர்கள் பிறந்த இந்நாளை சார்ல்ஸ் டார்வின் தினம் அல்லது டார்வின் தினமாக வருடந்தோறும் கொண்டாடப்படுகிறது.
விக்கிபீடியாவில் இருந்து
டார்வின் நாள் (Darwin Day) என்பது ஒவ்வோர் ஆண்டும் பெப்ரவரி 12 ஆம் நாளன்று கொண்டாடப்பட்டு வருகிறது. இந்நாளிலேயே 1809 ஆம் ஆண்டில் பரிமாணத் தத்துவத்தை உலகுக்கு அளித்த சார்ல்ஸ் டார்வின் பிறந்தார். அறிவியலையும் அறிவியலை மேம்படுத்தவும் உதவிய டார்வினின் பணிகளை இந்நாளில் நினைவு கூருகிறார்கள்.

இத்தினத்துக்காக சர்வதேச டார்வின் தின நிதியம் (The International Darwin Day Foundation) உருவாக்கப்பட்டு தனது இணையத்தளத்தில் உலகளாவிய ரீதியில் இத்தினத்தை விஞ்ஞான மற்றும் மனிதநேய வளத்திற்காக கொண்டாடுகிறது. உலகில் இத்தினக் கொண்டாட்டம் தொடர்பான விடயங்களை வெளியிடுகிறது. இத்தளத்தை இங்கு காண்க

ஒரு ஸ்டேடஸ்

பல நாட்களுக்குப்பிறகு எங்கட ஊர் கடற்கரைக்கு சென்று திரும்பினேன். இதன் பின்னர் எனது டுவீட்டரில் இட்ட இஸ்டேடஸ்
##நீண்ட நாளைகளுக்குப் பிறகு கடற்கரையில் கால்தடங்களை பதிவு செய்தேன்.
அலைகள் வந்தது நினைவுகளுடன்.
அடித்துநொருக்கிச்சென்றது தடங்களை,
இன்பநிலை##

சில காட்சிகள்

ஊரின் இன்றைய கடற்கரை பின்னேரப் பொழுதில் சில காட்சிகளை பிடித்துக்கொண்டேன்

ஒரு புத்தகம்
காதலர்களுக்காக ஒரு புத்தக அறிமுகம். முன்னைய கவிஞர்களில் மு.மேதா மற்றும் வைரமுத்து காதல் கவிதைகளுக்காக புதுக்கவிதைகளை (காதலர்களுக்கும்) தந்து பல கவிஞர்களுக்கு ரோல் மொடலாக இருந்தனர். பின்னர் காதல் மொழிபேசிய தபு சங்கர் வழிமொழிந்த கையோடு அனேக புத்தகங்கள் ஒரு காதலுக்குள் மூழ்கிய நிலைதந்துகொண்டிருக்கின்றன. இங்கு "காதல் கேளாய் தோழி" என்று கவிஞர் தமிழ் சத்தியனின் புத்தகத்தை படியுங்கள். இங்கு

"உன்னைப் பற்றி
நான் எப்படி சொல்ல
என்தோழியிடம்
சொல்ல சொல்ல
தீர்ந்துவிடும் சொல்"

அவரின் இந்தக்கவிதையே அந்தப்புத்தகத்துக்கு நான் சொல்லிக்கொள்ளுவதும். கிடைத்தால் படியுங்கள்.

முன்னைய காதல்
காதலர் தினத்துக்கு முன்னதாக சிதறல்களில் சிதறிய சில காதல்களைப் பாருங்கள் காதல் என்றால் என்ன என்பதை சொல்லியிருக்கிறேன். வாசிக்கத்தவறியவர்களுக்காக

காதல் சாதல்

ஒரு ஆணாய்:
பதின்மவயது அந்தா இந்தா என்று ஆணாய் இருந்து அர்த்தம் தேடும் பருவம். காதல் என்றால் என்ன என்று விழுந்து புரள எண்ணும் மனது. காதல் பாடல்கள் பிடிக்கும் ஐட்டம் அல்லது பிகருகள் என்று எதிர்ப்பால் தேடும் பருவம்.

"பருவம் படர்ந்து
பார்வைகளில் சிதைந்து
காதல் மொழி
எதுவென தேடும் மனது"

மரண ஊர்வலம்

சிதறும் சில்லறைகள் - 11

இன்றைய நாள்

உலக சதுர்ப்புநில தினம்

வருடம் தோறும் பிப்ரவரி 2ஆம் தேதி உலக சதுர்ப்புநில தினமாக கடைப்பிடிக்கப்படுகிறது. சதுப்பு நிலங்களின் அவசியம், சூழலியல் மாற்றங்களால் சதுர்ப்பு நிலங்களுக்கு ஏற்பட்டுள்ள அச்சுறுத்தல், அதனால் உலகில் வாழும் அனைத்து உயிர்களுக்கும் ஏற்படும் பாதிப்புகள் குறித்து மக்களிடம் விழிப்புணர்வை ஏற்படுத்துவதற்காக இத்தினம் கடைப்பிடிக்கப்படுகிறது. இதுபற்றி உங்கள் சிநேகிதன் என்று தனது வலைப்பதிவில் jayasrimahi பதிவிட்டிருக்கிறார். பாருங்கள்
உலக சதுப்பு நில நாள் -பெப்ரவரி 2

மழைவீழ்ச்சியும் நாங்களும்

மழை நாள் மீண்டும் துளிர்க்கிறது. உண்மையில் இது வெறுப்புணர்வைத்தான் தருகிறது. இன்றைய மழைவீழ்ச்சியின் அளவு மட்டக்களப்பு வானிலை ஆராய்ச்சி நிலையத்திலிருந்து (பி.ப 5.30 மணியளவில்)09.1 mm ஆனால் இது மட்டக்களப்பு நகரில் பதிவாகியது. ஆயினும் இவ்வளவு மட்டக்களப்பு மாவட்டத்தின் சராசரி மழைவீழ்ச்சியைத் தராது. காரணம் ஒவ்வொரு பிரதேசத்திலும் வெவ்வேறாக அதிளவும் குறைந்தளவாகவும் மழை தொடர்கிறது. இதுபற்றி வானிலை தகவல் நிலையத்து கடமைதரு பொறுப்பாளரிடம் உரையாடியபோது அவர் இதுபற்றி தமது திணைக்களத்துக்கு அறிவுறித்தியிருப்பதாகவும் ஓரளவு சராசரியான மழைவீழ்ச்சியின் அளவைப்பெற்றுக்கொள்வதற்கு ஒவ்வொரு பிரதேச செயலகத்துக்கும் ஒரு கிளை அலுவலகம் மாதிரி ஒரு ஒழுங்கமைத்து அதிலிருந்து பெறப்படும் மழைவீழ்ச்சியைக்கொணர்ந்து சராசரி கணித்தல் நல்லது என்று இவர் கூறியிருக்கிறார். ஆயினும் இது உழைப்பு சார்ந்த துறையாக இது அமையாததால் அரசு இதற்காக இம்முயற்சியை செவ்வனே செய்யுமா என்பது கேள்விக்குறியே! காரணம் இலங்கையில் அனர்த்த முன்னாயத்தங்கள் சரியான முறையில் நடைமுறைப்படுத்தப்படவில்லை. மாறாக வானொலிகளே (தனியார்) இதற்காக நம்பிக்கைக்குரிய தகவல்களைப் பெற்று பொறுப்பான செய்திகளை வழங்கிவருகிறது கொஞ்சம் மனசுக்கு திருப்தியைத்தருகிறது.
ஆயினும் ஒவ்வொரு அனர்த்தத்தைப்பயன்படுத்தி வயிறுவளர்ப்பவர்களும் அரசியலில் இல்லாமல் இல்லை. இவ்வனர்த்தங்களை அரசியலாக்குவது தான் வருத்தமளிக்கிறது. மாறாக மக்களின் வாழ்வை வயிற்றுப்பசியை வாழ்வாதாரத்தைப்பற்றி சிந்திக்கத் தவறுகின்றனர்.

வெள்ளமும் திட்டமிடாத திட்டங்களும்

மழைவீழ்ச்சி அதிகரித்த போதும் வெள்ள நிலைமை தோற்றுவிக்கக் காரணமாக அமைந்தது எங்களது கிராமம் போன்று அனேக இடங்களில் முறையாகத் திட்டமிடப்படாத கொங்கிறீட் வீதித்திட்டங்களும் பிரதான வீதியின் காப்பெற்(carpet)வீதித்திட்டமுமேயாகும். இவ்வீதிகளில் கொங்கிறீட் வீதிகள் அமைக்கம் போது இங்கு மதகுகள் அல்லது நீர்வழிந்து செல்லக்கூடிய முறையில் அல்லது நீர் இடமாற்றப்படக்கூடியதாக அமைக்கப்படவில்லை. மாறாக திட்டத்தை செலவுச்சுருக்கமாக செய்துமுடிக்கும் எண்ணமே இருந்திருக்கிறது. மக்கள் நலன் சூழலியல் தாக்கங்கள் அனர்த்த முன்னாயத்த விபரங்கள் பற்றிய விடயங்கள் கருத்திற்கொள்ளப்படவில்லை.
இதேபோல் காப்பெற் வீதியமைக்கும்போது இயற்கையாக நீர் வழிந்தோடும் இடங்கள் மூடப்பட்டு குறிப்பிட்ட இடங்களில் மாத்திரம் இம்மதகுகள் கல்வெட்க்கள் (culvert) அமைக்கப்பட்டன. இவ்வீதிகள் அமைக்கும்போது மக்களின் கருத்துக்கள் கூட அனர்த்தவிடயங்கள் பற்றிக்கலந்துரையாடப்படவில்லையென மட்டக்களப்பின் எல்லைக்கிராமங்களில அமைந்துள்ள வாகரைப்பிரதேச மக்கள் மற்றும் வெருகல் பிரதேச சபைக்கூட்டத்தில் தெளிவாக்கியை நினைத்துப்பார்க்ககூடியதாக அமைந்தது இந்த அனர்த்தத்தின்போது. அவர்கள் அப்போதே கூறினார்கள் எங்களுக்கு இந்த வீதியினால் மழைகாலங்களில் போக்குவரத்து செய்ய இயலாமப்போகும் என்று. அதுஅப்படியே உண்மையாகி இருக்கிறது. இம்முறை அதிகளவு மழைவீழ்ச்சியாயினும் இது அதிகூடிய அனர்த்தமாக இருப்பதாலும் இப்பாதிப்பு அதிகரித்தது தவிர்க்கமுடியாதாகியது.

எந்தவொரு திட்டங்களும் மக்களுக்காக செய்யுமிடத்து மக்கள் கருத்து மிகமுக்கியம் அதுவும் அனர்த்தங்கள் பற்றிய விடயங்கள் மிக அவசியம்.

ஒருவீடியோ
நமது நண்பரொருவர் தனது முகப்புத்தகத்தில் பகிர்ந்த காணொளி

நாமும் செய்கை பண்ணுகிறோம் ஆனால் இவ்வீடியோவைப் பார்த்ததும் நாம்???? முன்னேறவேண்டும் அபிவிருத்தியில் தொழிநுட்பத்திறனில்

வாழ்க்கை
அண்மையில் வாசித்துக்கொண்ட விடயம்
வாழ்க்கை பற்றிய ஆங்கிலச்சுருக்கம் "X X X" ஆகும்
*நேற்று என்பது ஓர் அனுபவம் - Xperience
*இன்று என்பது ஒரு சோதனை - Xperiment
*நாளை என்பது ஓர் எதிர்பார்ப்பு - Xpectation
இதனால் உங்கள் எதிர்பார்ப்பை உங்கள் பரிசோதனையில் அனுபவத்தைப் பயன்படுத்துங்கள்.


ஒரு கவிதை
நான் கஸ்டப்படும் பொழுதுகளில் புத்தகங்களே ஆறுதலாக எனது கண்ணீரைத்துடைக்கும் விரல்களாக..
கவிஞர் மு.மேதாவின் இதயத்தில் நாற்காலி எனும் நூலிலிருந்து
தந்தைக்கு ஒரு தாலாட்டு
துருதுருத்த கவலைகளில்
தூக்கமில்லா இரவுகளில்
தவிதவிக்கும் தந்தையே!
நான் தாலாட்டுப் பாடட்டுமா,?

ஓய்வெடுக்க மனமின்றி
உழைப்பதற்கும் வழியின்றி
பாய்வெறுத்த தந்தையே
நான்
பாட்டொன்று பாடட்டுமா,,

நீதியின் பாதையிலே
நெடும் பயணம் நடத்தியதால்
பாதியாய் ஆனவரே
நான்
பாராட்டுக் கூறட்டுமா??

தேரோடும் கனவுகளைத்
தெருவொடு அனுப்பிவிட்டுப்
போராடி வாழ்ந்தவரே
நான் புகழ்மாலை போடட்டுமா?

ஒன்பதாம் வயது
உருகியதை அறியாத
மெழுகுவர்த்தி தேம்புவதை
நான் மேடைகட்டிப் பேசட்டுமா,?

சற்று நீ கண்மூடி
சாய்ந்திருப்பாய் தலையணையில் - உன்னைத்
தட்டிக்கொடுப்பதற்கு
நான் சந்திரனை அனுப்புகிறேன்!

உன் கண்ணை மூடி நீ
ஓய்வெடுப்பாய் சிறுநேரம் - நீ
தூங்கி விழித்தவுடன்
நான் சூரியனை அனுப்புகிறேன்!

பூமி உனக்களித்த புழுக்கத்தை
நீ மறந்து
கண்துயில்வாய் சிறுநேரம்
நான் காற்றை அனுப்புகிறேன்!

வாழ்க்கை உனக்குச் செய்த
வஞ்சகத்தை நீ மறந்து
சிறுபொழுது கண்ணயர்வாய்
நான்
தென்றலை அனுப்புகிறேன்!

விடிந்தால் என் வாழ்வில்
வெளிச்சம் வரும்!
வந்தவுடன்
அடைந்த வெளிச்சத்தை
நான் அப்படியே அனுப்புகிறேன்!

ஒரு ஸ்டேடஸ்
வாசித்த விடயம் ஒன்றுதான்
"யாரோ ஒருவரின் மகிழ்ச்சியை எழுதுகின்ற ஒரு பென்சிலாக நீங்கள் இல்லாவிட்டாலும் பரவாயில்லை. எல்லோருடைய வருத்தங்களையும் அழிக்கக்கூடிய அழிப்பானாகவாவது (Rubber)உங்களால் இருக்கமுடியுமே முயன்று பாருங்கள்."

சிதறும் சில்லறைகள் - 10 (திரும்பிப்பார்க்கிறேன்)

வருட ஆரம்பம்:
விடைபெறும் ஆண்டுக்காக சென்ற வருட இறுதி இடுகைக்கவிதை போ 2009 வா 2010
......
கண்ணாடி வாழ்கையை
கவனமாய்
கொண்டுசெல்ல
வா
புது வருடமே...
உன்னை விட
எனக்குத் தெம்பு
இருக்கிறது
இருந்தாலும்
உன் வரவு நல்வரவாகட்டும்

மனதுக்கு வெள்ளையடித்து
உன்னை வரவேற்போம்

கண்களில் விளக்கேற்றி
உன்னை
வெளிச்சப்படுத்துவோம்
...........

பதிவுலகில் இக்கவிதையே ஒரு வெற்றியானது. பின்பு தொடர்ந்து தொடர் பதிவுகளினால் 2010 ஆம் ஆண்டு மட்டுமே நூறு இடுகைகளை தாண்டக்கூடியதானது(இப்பதிவுடன் 106 இடுகைகள்)பதிவுலக திருப்தியாக கருதுகிறேன். அதற்காக கஸ்டப்பட்டு , மனம்கவர்ந்து, பிடித்து பிடிக்காமல் வாசித்து பின்னூட்டி எதை எதையோ எல்லாம் சாதிக்க(??) உறுதுணையான அனைவருக்கும் நன்றி. தொடர்ந்திருங்கள். இப்பதிவுகளை இணைத்த திரட்டிகளுக்கும் நன்றிகள்.

வெற்றிகள்:
எனது கிராமத்து பாடசாலை மற்றும் பிள்ளைகளின் வறுமை நிலைமை என்பவை தொடர்பாக எழுதிய பதிவுகளால் எமது புலம்பெயர் உறவுகளுக்கு ஒரு தூண்டுதலையும் எமது பாடசாலை மற்றும் பிள்ளைகளுக்கு உதவும் எண்ணத்தையும் ஏற்படுத்தியது கடந்த வருட வெற்றிகளில் ஒன்று.
கடந்த மாசி (February) மாதத்திலிருந்து பொருளாதார வசதி குறைந்த குடும்பச் சிறுவர்களின் கல்வி வளர்ச்சிக்கு நிதி உதவி வழங்கும் திட்டத்தினை மூன்று பிள்ளைகளுக்கு என ஆரம்பித்து சித்திரை மாதத்தில் இன்னும் இருவர் சோக்கப்பட்டு (வரும் தை மாதத்திலிருந்து மேலும் இரு பிள்ளைகளை இணைக்கக்கூடியதாக இருக்கும்)இச்சேவைக்கு ஒரு பாலமாக இருப்பது மகிழ்ச்சி வெற்றி. இவ்வுதவிச்சேவையை எமது உறவு கனடா வாழ் திரு.இரா. இராஜேந்திரா அவர்களுக்கு நன்றி கூறுவதில் மட்டற்ற மகிழ்ச்சி.
"கொடிது கொடிது இளமையில் வறுமை கொடிது" இதற்காக யாரோ ஒரு பிள்ளைகளுக்காக அவர்கள் கல்விக்காக ஆற்றும் உதவி எப்போதும் அவர்கள் வாழ்க்கையில் முன்னேற்றத்தை ஏற்படுத்தும் என்பது உண்மை. இவ்வுதவிச்சேவை கடவுளுக்கு செய்யும் திருத்தொண்டாகவே எண்ணுகிறேன். எங்கெல்லாம் படிப்பதற்கு பிள்ளைகள் கஸ்டப்படுவதை உணருங்கால் ஏதாவது முடிந்தளவு உதவுங்கள் நாளைய விருட்சங்கள் வளர வாழ்த்துங்கள். இது தொடர்பான எனது முந்தைய இடுகை
அதேபோல் எமது பாடசாலைக்காக எமது கனேடிய வாழ் உறவுகள் சேர்ந்து பெருந்தொகை நிதி உதவியளித்தமைக்கும் நன்றிகளை சொல்லுகிறோம். என்றும் இணைந்திருங்கள் எமது கிராமத்தோடு.

நட்பு வெற்றி:

இணையம் மூலம் யாரோ யாரோ ஆனவர்களையும் முகம் தெரியாமல் முகவரி அறியாமல் எழுத்துக்களால் இணைந்த இதயங்கள் எத்தனையோ பேர். அகத்தின் அழகு முகத்தில் தெரியும் ஆனால் அகத்தின் எண்ணம் பதிவில் நுகரலாம். இவ்வாறு எங்கோ ஆனவர்களையும் இதயம் தடவிப்பார்க்க வைக்கும். சமூகவலைத்தளங்கள் மூலம் அவர்கள், நிலைமை அறிய அவர்களுக்கு நல்லதோ அல்லது அதற்கு எதிர்மாறாவோ ஏற்படின் அவர்களை எட்டிப்பார்த்து நலம் கேட்டு பங்கெடுக்கும் தன்மை வெற்றி என்றே சொல்லலாம்.
ஒரு எழுத்துப்பிழை கண்டு அதைச்சொல்லி மின்மடல் அனுப்ப அதன் பின் இணைந்த அந்த நல்லுறவு, அறிவாளன் எனக்கு கிடைத்த கடந்த வருட நட்பு வெற்றி. வாழ்த்துக்கள் தல. உங்களால் வாசிப்புப்பழக்கத்தை அதிகப்படுத்திக்கொண்டேன். புத்தகங்களை வாங்க முயற்சிகள் மேற்கொண்டேன். மற்றவர்களுக்கும் அறிமுகப்படுத்திக்கொள்கிறேன். அதிகளவு பதிவெழுதும் எண்ணத்தை தந்தமைக்கு நன்றி. தொடர்ந்திருங்கள் என்னோடு எழுத்தோடு.

மனம் கவர்ந்த பாடல்:
எல்லோரையும் மனசு வலித்த பாடல் "பூக்கள் பூக்கும் தருணம் ..." இப்பாடல் பற்றி முன்பொரு பதிவிட்டிந்தேன். சிதறும் சில்லறைகள் - 2
அந்தப்பாடல் இங்க வீடியோவில் ஆனால் இந்த காணொளி அழகாக இருக்கு வரிகளுடன்.
பாருங்கள்


எனது வாழ்வில்
கடந்த வருட ஆரம்பகாலங்களில் கஸ்டங்களை எதிர்நோக்கியிருந்தேன். ஆனாலும் எனது மருமகள் சயுரந்திரி பிறந்த தருணம் எனக்கு தனியார் துறையில் வேலை ஒரு திட்டத்துக்காக கிடைத்தது. இரட்டிப்பு மகிழ்ச்சி. எல்லோரும் அதிஸ்டக்கார மாமா என்று சொன்னார்கள் அப்போது.
நன்றி எனது தூக்கத்தை கலைத்து இனிய மனதை தந்த எனது மருமகளே நன்றி உனது வெற்றிகளுக்கு துணையாக இருப்பேன்.
இப்பொழுது தடுமலும் இருமலுமாய் கஸ்டப்படுகிறாள்
என்தாயுடன் என் மருமகள்

பின்னர் ஆசிரியத்துவத்துக்கு போட்டிப்பரீட்சையின் மூலம் தெரிவாகி இணைந்துகொண்டேன். இவ்வாறு மீண்டும் பாடசாலையில் உருவாக உருவாக்க. மட்டற்ற மகிழ்ச்சி.

பதிவர் சந்திப்பு
அனேக உறவுகளை சந்திக்க கிடைத்தது சந்தோசம்.

கவலை:
சிங்களத்தில் மட்டும் தேசியகீதம் பாடவேண்டும் என்கிற செய்தி. அது ஓய்ந்துபோனாலும் தீ மூட்டப்பட்டதாக உணர்ந்தேன். தமிழிலும் முழுமயாக பாடவராது எனக்கு அதன்மேல் ஒரு விருப்பம் விருப்பபடாமல் போனதால்.ஆனாலும் மனசுக்கு கவலையளித்த விடயம் இது. இதற்கு வலுச்சேர்க்கும் படியாக இப்பொழுது ஆரம்பித்திருக்கும் "சிலோன்" சிறிலங்காவாக இருப்பது. தமிழில் இலங்கையா? இல்லை "சிறிலங்கா" வா "ஸ்ரீ லங்கா" வா என இன்னும் தெளிவாக இல்லை.

சில பேரை இழந்திருப்பது கவலையானது. அதேபோல் இணைந்திருக்காமல் இருப்பதும் அதே நட்பில் தவறானது.

தெளிந்தும் தெளியாமலும்
சீனா உலகநாடுகளில் முதன்மை பெற்று வருகிறது. அண்மைய ஒலிம்பிக் மற்றும் ஆசிய போட்டிகள் என்று விளையாட்டுத்துறைகளிலும் பொருளாதாரத்திலும் ஆதிக்கத்தையும் புரட்சியையும் ஏற்படுத்தியிருப்பது மற்றைய நாடுகளுக்கு ஒரு எச்சரிக்கையா அச்சுறுத்தலா என்பதும் நமது நாடு இந்திய, சீன பாகிஸ்தான் மற்றும் மத்திய கிழக்கு நாடுகளுடன் சேர்ந்து உறவாடுவதும் இன்னொரு சிந்திக்ககூடிய பிரச்சனைக்க வழிவகுக்குமா?? என்பது.

ஒரு ஸ்டேடஸ்:

"அங்கு நான் இருக்கிறேனா என்பது எனக்கு நீ சொன்னால்தான் தெரிந்துகொள்வேன்.
என்மனதில் நீ இருப்பதை நான் உனக்கு சொல்லும் போதுதான் புரிந்துகொள்வாய் என்பதை நான் அறிவேன்."

ஊடுறுவல்
எப்போதும் மற்றவர்களை மற்றவர் விடயத்தை ஆராய்வதில் சிலருக்கு ஏன் மனிதருக்கு இருக்கும் இயல்பு. இது சிலநேரங்களில் தேவையாகிறது. சில நேரங்களில் வெறுப்புத்தன்மையை ஏற்படுத்துகிறது. இணையத்தில் இந்த புல்லுருவிகள் (ஹக்கர்ஸ்) இருப்பது விக்கிலீக்ஸ் வெளியிட்ட தகவல்கள் போல.(அரசு அல்லது சமய நிறுவனங்களின் பாதுகாக்கப்பட்ட இரகசிய ஆவணங்களை பொது மக்களின் பார்வைக்கு வெளிச்சத்துக்கு கொண்டு வருகின்றது.) ஆனாலும் அந்த ஜூலியன் பால் அசாங் (julian paul assange) இன் நேர்மை பிடிச்சிருக்கு காரணம்
//வலையமைப்பின் பாதுகாப்பு வலையங்களை உடைத்து உட்புகுந்தால் கணினிகளுக்கோ, அதிலுள்ள கோப்புகளுக்கோ எந்த சேதத்தினையும் விளைவிக்காதீர்கள், உங்கள் உட்புகுதலுக்கான ஆதாரங்களை அழிப்பதைத் தவிர வேறெந்த சேதத்தினையும் செய்யாதீர்கள்', இவை ஜூலியனின் உபதேசங்கள். ///
மேலதிக தகவல்கள் சுடுதண்ணியில்
இருந்தாலும் மற்றவர்களின் தகவல்களை அறிய முயற்சிகளை மேற்கொள்ளுவது ???

நன்றி

விடைபெறும் வருடத்திற்கான முந்தைய கவிதையின் சில வரிகள்

ஒவ்வொருமுறையும்
ஒவ்வொன்றாய்
உதித்துக்கொண்டன
உயிர்த்தெழுந்து கொண்டேன்
கிழிக்கப்பட்டன
உயிர்ப்பிழிந்து கொண்டேன்

நீ போகிறாய்
நான்
காத்திருக்கிறேன்
இருட்டிலும்
விண்மீன்களுகாய்
இதுவரை
ஆனதுக்காக
நன்றி சொல்லுக்கொண்டு

நீ
உதித்து
உதிர்ந்தாய்
நான்
உயிர்ப்பித்திருக்கிறேன்

விடைபெறுகிறேன்
புதுவருட வாழ்த்துக்கள் சொல்லிக்கொண்டு
அனைவருக்கும் இனிய வருடமாகவும் சந்தோசச்சாரல்கள் நிறைந்த வருடமாகவும் அமைய வாழ்த்துகிறேன்.

சிதறும் சில்லறைகள் - 09

இன்றைய நாள்
நத்தார் தினப்பண்டிகை

"இந்நாள் இனிய நாளாக அனைவருக்கும் இனிய கிறிஸ்மஸ் தின வாழ்த்துக்கள்"

இன்றைய குறுஞ்செய்தி:

உங்கள் மகிழ்ச்சியின் வெளிச்சத்தில்
அன்பு கொண்டு அன்பு செய்க
இதயம் கொண்டு இன்பம் செய்க
யேசு பாலனின் இனிய நாளில்
வெற்றி தேவதைகள் உங்களைச்
சுற்றி வரட்டும்


நமது வாழ்க்கையில் சில நாட்கள் மறக்கமுடியாத நாட்களாக இருக்கும் நாம் சிலவேளை சில செயற்பாடுகளையும் மறக்காமல் இருக்கவேண்டும் என்று ஒரு நினைவில் நிற்கக்கூடிய நாட்களைத் தெரிவுசெய்வதும் வழமை.
அதேபோல்தான் நானும் இதேபோன்ற கிறிஸ்மஸ்தின நாளில் தான் எனது (புதிய)கணணியை வாங்கினேன் இற்றைக்கு நான்கு வருடங்கள் முன்பு. எனக்கு உதவியாக அல்லது தொல்லையாக இது இன்னும் இருந்துவருகிறது...

கவிதை கடந்தவருட நத்தார் பண்டிகைக்காக
வைக்கோலில் ஒர் ஒளிப்பிளம்பு
உலகம் மீட்க பிறந்த
உத்தமரின்
இத்தினம் முதல்
மனமெங்கணும்
மகிழ்ச்சி மலர்கள்
பூக்கட்டும்...

பதிவர் சந்திப்பு
ஒவ்வொருவர் வாழ்விலும் சந்திப்பு எப்போதும் இனிமையாகவும் நினைவில் நிற்கக்கூடியவையாகவும் இருப்பது மகிழ்ச்சியையும் சில சந்தர்ப்பங்களில் அதற்கு எதிர்மறையாகவும் இருக்கும். ஆனாலும் பதிவர் சந்திப்பு என்பது முகம் தெரியா எங்கெங்கோ ஆனவர்களையும் வலைப்பின்னலினூடாக அரட்டைகளிலும் தொலைபேசிகளினூடும் பதிவுகளினூடும் இணைந்த இதயங்கள் முகம் கொண்டு பேசும் இனிய பொழுது இப்பதிவர்சந்திப்பு.
கடந்த 19 ஆம் திகதி இலங்கை தமிழ்வலைப்பதிவர்கள் நாம் ஒன்றிணைந்தோம் சந்திப்புக்காக. மகிழ்ச்சி. இதற்கு முன்னைய நாளிலும் கிறிக்கட் விளையாட்டில் ஈடுபட்டோம். தித்திப்பு.

முதலில் இதனை ஏற்பாடு செய்த மாலவன் நிரூஜா(ஏற்பாட்டுக்குழு முதல்வர்), அனு, ,கங்கோன் கோபி , வரோ, அஸ்வின், வதீஸ் ,பவன், அனைவருக்கும் முதலில் நன்றிகள். காரணம் வேலைப்பளு உலகத்தில் சந்திப்புக்கு அனைவரையும் இணைத்து ஒருமிக்கவைப்பது இக்காலகட்டத்தில் மிகவும் கடினமாகதாகவே இருக்கிறது. ஆனபொழுதிலும் நாம் ஒன்றிணைந்தது மகிழ்ச்சி.
இச்சந்திப்புக்காக அனுவின் அம்மாசெய்துதந்த உருளைகள்(ரோல்ஸ்), நீரூஜாவின் வீட்டிலிருந்து வந்த கேசரி, பக்கோடா(எங்கிருந்து என்று சொல்லமாட்டன்), பவன் குழைத்த அன்னாசி மென்பானம் அனைத்தும் நல்லா இருந்தது.
ரோல்ஸ்க்காக அருவக்கத்திகொண்டு உருளைக்கிழங்கு தோலுரித்த கங்கோன், வதீஸ், மற்றும் அதிகாலை 6 மணிக்கு ???? எழுந்து வந்து அன்னாசித் துண்டுகளாக்கிய வதீஸ், பல்வேறு உதவிகள் புரிந்த வரோ, பக்கோடாவை அடிக்கடி மென்றுவிழுங்கி தொப்பையை வளர்த்துக்கொண்டிருந்த நிரூஜா, மென்பானத்தை குடித்து முடிக்கவேண்டுமென்று உழைத்த மருதமூரான் மற்றும் கங்கொன், நேரலைசெய்த மது...இப்படியே நல்ல இனிமையான நினைவுகளுடன் இனிதான சந்திப்பில் பல விடயங்கள் கலந்தாலோசிக்கப்பட்டன.

பதிவுஎழுதுதல் பற்றி பல்வேறு வாதங்கள் எழுந்தன.
அவற்றுக்காக நான். நேரலையின் அரட்டையில் நண்பர் நிமலபிரகாஷ் சொன்ன விடயம்
முதல்ல பதிவர்கள் என்றால் பதிவு அதிகமாக எழுதுங்க பிறகு அதை மேலும் விரிவுபடுத்தலாம்.
சில படங்கள்


இனிய அந்நாள்
இப்பதிவர் சந்திப்பிலே நினைவாக எனக்கு தேவைப்பட்ட ஒரு பொருளை வாங்கமுடிவு செய்தேன் இதற்காக எனக்காக உதவிய கெளபோய்மது என்றும் நெஞ்சினில். அதைவிட ஒரு நீங்கா நினைவுகளையும் என்னுடனும் பகிரந்தது பன்மடங்கு சந்தோசமும் நினைவுளும்.
மது உங்கள் அம்மாவுக்காக

ஒரு தாய்மையின் தன்மையை உறுதியை உருவாக்குதிறனைக்கண்டு நெகிழ்ந்தேன். தாயே உனக்கு நான் யாரோ ஆகலாம் உள்ளத்தில் எனக்கு ஏதோ ஒரு தீயை வளர்த்துவிட்டாய். எங்குற்றாலும் எனது வாழ்த்துக்களையும் உனது மக்களின் சந்தோசமாய் ஏற்றுக்கொள்க. நீ வாழீ...

ஒரு ஸ்டேடஸ்

உறவுகளுக்காக ஏங்கும் உலகிலே கிடைக்கும் நல்உள்ளங்களில் மகிழ்ச்சி விதைகளையும் அன்பு வேர்களையும் பயிரிடுக. அதை கவனமாக தொடர்ந்து வளர்க்க முயல்க.
ஒவ்வொரு உணர்வுகளுக்குள்ளும் அன்புறவு கொள்க. நட்பின் நீளம் வெல்க.

சிதறும் சில்லறைகள் - 08 (வாசிப்பு)

உலகம் உன் வசம்

பலநாட்களாக எழுத இருந்து எழுதாமல் போன விடயம் தொடா்பாடல் ஆனால் அதுபற்றி எழுதுவதற்கிடையில் என்கையில் ஒரு புத்தகம் கிடைத்தது.
அது உலகம் உன் வசம் - சோம. வள்ளியப்பன் எழுதியது. பல விடயங்கள் நமக்குத் தெரிந்த நாம் தவறிழைக்கின்ற நிறைய தகவல்கள் எளிமையாகவும் சிறப்பாகவும் எழுதி இருக்கிறார். அவசியம் அனைவரும் வாசிக்கவேண்டிய புத்தகம்.
"எந்த இடத்தில் எதைச் சொல்லவேண்டும் என்பதில் உள்ள தெளிவு, எந்த இடத்தில் எதைச்சொல்லக் கூடாது என்பதிலும் இருக்கவேண்டும்" இதுவே இந்தப்புத்தகத்தின் நோக்கக்கூற்றாக இருக்கிறது.
மற்றவர்களுடன் எப்படித்தொடர்பு கொள்ளவேண்டும் என்பதில் தெளிவான விளக்கங்கள் போதியளவு உதாரணங்களுடனும் மேற்கோள்காட்டி எழுதியிருப்பது வாசிக்க மனதோடு ஒத்துப்போகிறது.
பேச்சுப்பற்றி
"அழகாக, சாமர்த்தியமாக, கோர்வையாக, தெளிவாக, சுருக்கமாக, நகைச்சுவையாக, தேவையான நேரத்தில், புரியும்படி, தேவைப்படும் நேரங்களில் விளக்கமாக, சமயத்தில் உடனடியாக, வேறு சில சமயங்களில் கொஞ்சம் பொறுத்து, கவனமாக, சொல்ல நினைக்கும் பொருள் விளங்கும்படியாக... - எனப் பல்வேறு சந்தர்ப்ங்களில் பல்வேறுவிதமாக நாம் பேசவேண்டும் என்று அழகாக சொல்லியிருக்கிறார். இப்படி பலவிடயங்களை பல ஆதரங்களுடனும் புனைவுகளுடனும் எழுதியிருக்கிறார். நல்லதொரு கையாள்கை அந்த எழுத்துக்களில் தெரிகிறது. வாசியுங்கள் அதன்படியாவது முயற்சியுங்கள் நானும் முயற்சிக்கிறேன்.


திருவிழாவில்
ஒரு
தெருப்பாடகன்

தலைப்பே ஒரு கவிதையாகி நிக்கிறது. மு.மேத்தாவின் படையல்களில் அதிக வலிகள் பல இடங்களில் தெரிந்தாலும் கார்த்திகைக்கென நான் மீண்டும் ஒருமுறை படித்த இந்தபுத்தகம் கவிதையின் நுரைகளில் நுழைந்து அவதிப்பட்டேன்.
"
எங்கள் தேசத்தில்
ஒவ்வொரு கட்சிக்கொடியும்
உயரத்தில்தான் பறக்கிறது
எங்கள் சகோதரர்களின்
தாழ்ந்த குனிந்த
தலைக்கம்பங்களின் மீது!
"
எங்கேயே என்னை உசுப்பிவிட்ட வரிகள்.
தமிழனின் கதை என்ற தலைப்பில் தலைப்பே அத்தனையையும் அடுக்கிக்கிட்டு போகிறது.
விழிகளைத் திறக்கும் விறகுகள் என்ற கவிதை குடிசையின் இலட்சணங்களை படம்போட்டுக்காட்டுகிறது. அசோகவனத்தில் ஒரு சோகவனம் நம்ம நாட்டை.............

"பூந்தோட்டமே
அங்கு
பொசுங்கிப் போன பின்
மரங்கள்
இங்கே
மாநாடு போடுகின்றன"

இது ஈழத்துப்பூக்கள் என்ற கவிதையில் ..........
அதிக கவிதைகள் நமது நாட்டுக்காக எழுதப்பட்டவைகளாக இரசிப்பதா வெறுமனே வாசிப்பதா என்று தெரியாமல் கண்களின் ஓரங்களில் ஈரத்தை உதிர்த்துக்கொண்டு நான்.

கவிஞன்

முற்றுமுழுதாக மாதாந்தக் கவிதைச் சஞ்சிகையாக மட்டக்களப்பு புதுக்குடியிருப்பிலிருந்து வெளிவரும் இந்தக் கவிஞன் இதழ் கஸ்டப்பட்டு வந்துகொண்டு இருக்கிறது. இன்னுமின்னும் இளையோர்களையும் கவிஞர்களையும் காலத்தை தின்றவர்களையும் தேடி வாசியுங்கள் வாங்கிக்கொண்டு எழுதிக்கொள்ளுங்கள் இன்னுமின்னும் வளரவேண்டும் என்று வாழ்த்துவோம்.

சிதறும் சில்லறைகள் - 07(பெரிதுவத்தல்)

இன்றைய நாள்:
மேதகு ஜனாதிபதி மகிந்த ராஜபக்ஷ அவர்கள் இரண்டாவது தடவையாகவும் ஜனாதிபதியாக பதவியேற்றுள்ளார்.
இவர் இலங்கை ஜனநாயக குடியரசின் நிறைவேற்று அதிகாரம் கொண்ட ஆறாவது ஜனாதிபதியாக பதவியேற்று தனது இரண்டாவது பதவிக்காலத்தை ஆரம்பித்திருக்கிறார்.

திருக்குறள்

தந்தை மகற்குஆற்றும் நன்றி அவையத்து
முந்தி இருப்பச் செயல்.(67)

விளக்கம்:
ஒரு தந்தை தன் மகனுக்குச் செய்யும் நல்ல உதவி, அவனைக் கற்றோர் அவையிலே முதன்மை பெற்றவனாக இருக்கச் செய்தலே ஆகும்.

தன்னிலை விளக்கம்

இக்குறள் என்தந்தை கற்றாரோ என்னவோ இல்லை. ஆனாலும் தமது பிள்ளை தன்னை விட கற்று சமுதாயத்தில் விஞ்ச வேண்டுமென்ற அவா ஒவ்வொரு பெற்றோருக்கும் இருக்கும் உண்மை உணர்வு. அப்பாவும் என் குடும்பமும் என்னை ஒரு கற்றவனாக்குவதல் சில வெற்றிகளைக்கண்டாலும் என்விருப்பத்தை அவர்களுக்காக விட்டுக்கொடுப்பதில் அவர்களின் வேண்டுதலை நிறைவேற்றுவதில் எனக்கு அதீத விரும்பம் கொண்டவனாய் இருப்பேன். ஆனாலும் அதிகளவில் பயன்பாடுகளில் சிக்கலைத் தோற்றுவிக்கும் அல்லது மூடநம்பிக்கைகளை களைவதிலும் அவர்களுக்கு அவை பற்றி தெளிவுபடுத்துவதிலும் ஒருவனாக இருப்பேன். அப்படியே எனது விருப்பமான தனியார் துறைவிடுத்து அரச துறைக்கு முதன் முதலாக இணைகிறேன். இது கூட என் தந்தை ஆசைப்பட்டு நுழைகிறேன். என்னை எப்படியோ அரச உத்தியோகத்தில் சேரு என்று முணுமுணுத்து அவர் விருப்பத்தை நோகடிக்காமல் இருப்பதில் பெரும் மகிழ்ச்சியுறுகிறேன்.

பாடல்

நான் பல்கலைக்கழகத்தில் பட்டம் பெற்றவுடன் என்னை நனைத்துவிட்டுப்போன இப்பாடல்
இப்பொழுதும் அப்பாவுக்காக கேட்கிறேன்.



தேன் கிண்ணத்திலிருந்து

கனவெல்லாம் பலிக்குதே.. கண்முன்னே நடக்குதே..
கனவெல்லாம் பலிக்குதே.. கண்முன்னே நடக்குதே..
வாழ்க்கைக்கு அர்த்தங்கள் கிடைக்கிறதே
வானவில் நிமிடங்கள் அழைக்கிறதே
என்னுடைய பிள்ளை என்னை ஜெயிக்கிறதே
என்னைவிட உயரத்தில் பறந்து சிகரம் தொட
என் வானத்தில் ஒரு நட்சத்திரம்
புதிதாக பூப்பூத்து சிரிக்கின்றதே
எங்கே எங்கே என்று தினந்தோறும் நான்
எதிர்ப்பார்த்த நாளின்று நடக்கின்றதே
(கனவெல்லாம்..)

நடைவண்டியில் நீ நடந்த
காட்சி இன்னும் கண்களிலே
நாளை உந்தன் பேரைச் சொல்லும்
பெருமிதங்கள் நெஞ்சினிலே
என் தோளைத் தாண்டி வளர்ந்ததனால்
என் தோழன் நீயல்லவா
என் வேள்வியாவும் வென்றதனால்
என் பாதி நீயல்லவா
சந்தோஷ தேரில் தாவி ஏறி மனமின்று மிதந்திட
என் வானத்தில் ஒரு நட்சத்திரம்
புதிதாக பூப்பூத்து சிரிக்கின்றதே
எங்கே எங்கே என்று தினந்தோறும் நான்
எதிர்ப்பார்த்த நாளின்று நடக்கின்றதே
(கனவெல்லாம்..)

கிளிக்கூட்டில் பொத்தி வைத்து
புலி வளர்த்தேன் இதுவரையில்
உலகத்தை நீ வென்று விடு
உயிரிருக்கும் அதுவரையில்
என்னாளும் காவல் காப்பவன் நான்
என் காவல் நீயல்லவா
எப்போதும் உன்னை நினைப்பவன் நான்
என் தேடல் நீயல்லவா
என் ஆதி அந்தம் யாவும் இன்று ஆனந்த கண்ணீர்
என் வானத்தில் ஒரு நட்சத்திரம்
புதிதாக பூப்பூத்து சிரிக்கின்றதே
எங்கே எங்கே என்று தினந்தோறும் நான்
எதிர்ப்பார்த்த நாளின்று நடக்கின்றதே
(கனவெல்லாம்..)

படம்: கிரீடம்
இசை: GV பிரகாஷ்
பாடியவர்கள்: ஜெயசந்திரன், கார்த்திக்


புத்தகம்

இப்பெல்லாம் புத்தகம் என்றாலே உசிரு. படிக்காவிட்டாலும் வாங்கிக்கொள்ளவேண்டுமென்று ஒரு ஆவல். நான் படிக்காமல் போனாலும் யாராவது படிக்கட்டும் என்று உள்ளுணர்வு.
அண்மையில் சுஜாதாவின் மீண்டும் தூண்டில் கதைகள் படித்தேன். அதில் பத்துக்கதைகள் அற்புதமாய் எழுதிருக்கிறார் சுஜாதா அங்கே செல்போன்கள் பயனுள்ளவை,ஸ்டேடஸ், சென்னையில் மேன் ஹாட்டன் என்பன அவசியம் படிக்கவேண்டிய கதைகள்.

ஒரு ஸ்டேடஸ்'

"இன்பமும் துன்பமும் நிறைந்த வேதனையில்....
அழுதாலும் சிரித்தாலும்... வாழ்க்கை என்றே முற்றுப்புள்ளி வைக்கப்படுகிறது"

ஒரு படம்
அண்மையில் திருமலை சென்றபோது செல்போனுக்குள் சிக்கிய படம்.

சிதறும் சில்லறைகள் - 06 (வழியும் வலியும்)

இன்றைய தினம்

நவராத்திரி விழாவின் இறுதிப்பொழுதுகள் அன்னை சரஸ்வதிக்கு பூஜை பண்ணும் கடைசிப்பொழுது.
நான் வீட்டுக்கு வெளியில் ஒரு பயிற்சிப்பட்டறைக்காக இருப்பதால் இந்த உல்லாச விடுதியில் எப்படி இத்தினதைக் கடப்பது. ஆயினும் வாழ்நாளில் கடைப்பிடித்து வந்த முறைமையின் படி மனதை ஒருமித்து ஒரு சிலநிமிடங்கள் செலவழிக்க முடிந்தது மகிழ்ச்சி.

நாளை விஜய தசமி தினம். இந்து மக்கள் யாவரும் அறிந்த வித்தியாரம்பிக்கும் தினம். இதுபற்றி சில மனசுக்குள் தொக்கும் வரிகளை விதைக்கிறேன்
"எழுத்தறிவித்தல் இறைவனின் செயல்" என்று சொல்லுவர். எமது பிள்ளைகளுக்கு இத்தினத்திலே அனேகமாக நாம் எழுதப்பழக்கிக் கொடுக்கிறோம். ஆனால் இத்தினத்துக்கு முன்னமே நமது பிள்ளைகள் எழுத ஆரம்பித்துவிடுவர். ஆனால் சமய சம்பிரதாயம் என்ற ஒரு சடங்கு முறைகளுக்காகவே நாம் இச்செயலை செய்கிறோம்.

இதை தவிர்க்க என்ன செய்யலாம். நமது பிள்ளை இரண்டு அல்லது இரண்டரை வயதுகளிலே எழுத ஆரம்பிக்கும் நாம் ஏதாவது படிக்கும் பொழுது எழுதும் பொழுது அந்தப்பிள்ளையும் வந்து படிக்க எழுத ஆரம்பிக்கும் ஆனால் அவர்களை அந்த செயலுக்கு விடாமல் சில பெற்றோர் "உனக்கு ஏடு தொடங்கல நீ இப்ப எழுதாத" என்று அவர்கள் கல்வி வாழ்க்கைக்கு முற்றுப்புள்ளியிட வேண்டாம். அவர்கள் இரண்டு வயது ஆகினால் என்ன இரண்டு வயதுக்கு முன்னமே எழுத்தறிவிக்கலாம் இல்லையா. அப்பிள்ளைக்கு நான்கு ஐந்து வயது வரை காத்திருக்க வைக்காமல் எழுத ஆரம்பிக்க ஏடு தொடங்கணும் என்று முழங்குகிறேன்.
விஜயதசமி என்றால் ஏடு தொடங்கும் நாள் மட்டுமா. இது வித்தியாரம்பிக்கும் நாளும்மல்லவா.
இயல் இசை வாத்தியம் என்று எந்த நற்செயலானாலும் அவற்றை ஆரம்பித்தவிடுங்கள். விதைகளைப் பார்க்கும் போது தெரியாது அதன் விருட்சம். வளர்த்துவிட பிள்ளைக்கு வித்தியாரம்பித்துவிடுங்கள்.

நவராத்திரி விரதம் எனது பழைய பதிவு இங்கு காண்க

ஒரு கவிதை

'அன்னையே உன்னை
ஆராதிக்கிறேன்
அரிசியில் அகரம்
எழுதிய நாள்
முதலாய் தமிழாகி
தலையாயினன்
கற்றுக்கொண்டனன்
வழிகாட்டி நீ என்பதால்
மொழியானேன்
இன்பத் தமிழானேன்

சொல்லிவிடு எழுதிவிடு
எழுதாமல் இருக்கும் எல்லோருக்கும்
இயல் இசை எழுத்து என்று
ஏடு தொடங்கிவிடு
யாவருக்குமாய்
உணர்கிறேன்

என் குரல்வழியை விடசொல்லில்
விரல் வழியாய் விளைந்தவன்
ஆதலால்
அன்னையே வணங்குகிறேன்"

எமது மண்ணின் படைப்பு
இதுவும் எனது ஊரின் அண்ணா தணிகசீலன் அவர்களால் ஆகுகின்ற படைப்புக்கள். இங்கே சமயம் கிராமம் பாட்டு என்று பலவற்றை தரவேற்றம் செய்கிறார். நவராத்திரிப்படைப்பு இங்கே வெள்ளிச்சரம்


ஒரு பாடல்

எங்கே செல்லும் இந்தப்பாதை
பாருங்க சேது படத்திலிருந்து ஒரு பாடல். என் மனதை உருக்கி பல தடவைகள் கேட்டுக்கேட்டு கிறங்கி அழுத பாடல் இப்போதும்கேட்கும் போது மனதை என் பழைய சில நிகழ்வுகளை நெருக்கிவிடும் உணர்வு உயிரின் ஆழத்திலிருந்து சென்று மேலெழந்து கண்ணீரைச் சொரிந்துவிடும்.
என்பாதையின் வழியில் பிதற்றிய சில பொழுதுகள். நண்பன் ஒருவனுடன் கொண்ட மாறுதல்களின் விளைவினால் நான் பட்ட கஸ்டம். ஆனால் இங்க இந்தப்பாடல் காதல் என்று விதைக்கிறது. நான் இதை நட்பு என்று சொல்மாற்றிப்படித்தேன்.
எங்கிருந்தாலும் அவன் நல்லா வாழவேண்டும். அவனால் தான் எனது முன்னேற்றங்கள் வர்க்கங்களாயின. அவனை யாருக்கும் பிடிக்காமல் போகும் எனக்கு எப்போதும் பிடிக்கும்.

"நட்பின் நீளங்கள் புரியாவிட்டாலும் அதன் தாகம் உணர்வாய் ஒருநாள் "

சிதறும் சில்லறைகள் - 05 (சிறுவர் முதியோர் தினம் 2010)

இன்றைய தினம்:

இன்று 2010 ஒக்டோபர் 1 ஆம் திகதி சர்வதேச சிறுவர் தினம் (Children's Day)மற்றும் முதியோர் தினம் (Elder's Day).
இவ்வருட சிறுவர் தினத் தொனிப்பொருள் "சிறுவர்களின் உலகைச் சுபீட்சமாக்க அனைவரும் உதவுவோம்'
இவ்வருட முதியோர் தினத் தொனிப்பொருள் "மகிழ்ச்சி நிறைந்த ஆரோக்கியமான முதியோர் பருவம்"

கடந்தவருட சிறுவர் தினம் தொடர்பான என் இடுகை "சர்வதேச சிறுவர் தினம்"

சிறுவர்களுக்குரிய சரியான பராமரிப்பு இல்லாமை, அவர்களுக்கான சரியான வழிகாட்டல்கள் முறையாக முன்னெடுக்கப்படாமை,சிறுவர்களுக்கு உரிய இடம் வழங்கப்படாமை அவா்கள் எதிர்நோக்கும் சவால்களாகும்.
நமது மனித வளர்ச்சி என்று சொல்லப்படுவதன் ஆரம்பமே சிறுவர் பருவம் என்பதை நாம் வளர்ந்த பின் மறந்துவிடுவதுதான் வேதனையான விடயம்.
நாம் நமது வீட்டுப்பிள்ளைகள் மட்டும் வளர்ந்தால் போதும் என்ற மனப்பான்மையோடு இருப்போமானால் போதாது. மற்றவர் பிள்ளை என்ற உணர்வை விடுத்து நமது பிள்ளை என்ற உயர்வான சிந்தனையை ஏற்றுக்கொள்ளவேண்டும்.
சிலநேரம் இந்த சிந்தனையில் நாம் இருந்து பிறர் பிள்ளைகளுக்கு உதவும்போது அந்தப்பிள்ளைகள் அதை பிரயோசனமாக ஏற்காமல் உதாசீனம் செய்யும் போதுதான் நமக்கு இருந்த அந்த நல்லெண்ணமும் விட்டுவிலகும் சந்தர்ப்பம் வருவது என்பது கவலையானதுதான். ஏனெனில் அந்தப்பிள்ளை பக்குவப்படாமல் அல்லது தனது போக்கு, நிலைமை என்று விழிப்புணர்வு அந்தப்பிள்ளைக்கு விளங்கப்படுத்தப்படாமல் இருப்பதே காரணமாக இருக்கலாம். அதனை அப்பிள்ளைகளுக்கு தெளிவுபடுத்தி பிறகு அந்தப்பிள்ளை வளர்ந்த பின் தான் தவறிழைத்த சந்தர்ப்பத்தை உணர்ந்துகொள்ளும் போது நன்றி சொல்லும் நமக்கு.
இதற்காக நான் எழுதிய ஒரு ஸ்டேடஸ் இது 'கானா காணும் காலம்' என்ற தொடரில் சொல்லப்பட்டது.கொஞ்சம் மெருகேற்றலுடன்
""என்னால் செய்யப்பட்ட உதவிக்காக அதே உதவியை எனக்கு உடனே செய்யவதை விட
கைமாறாக உதவி தேவைப்படும் வேறொருவருக்கு தருணத்தில் செய்துவிடுங்கள். உதவுதல் சங்கிலியாய் தொடரட்டும். தேவைப்படும் போது நானே கேட்பேன்""

ஒரு கவிதை:
சிறுவனாக இருந்தபோது (பதின்மூன்று வயதுகளில்) எழுதிய கவிதை இன்றைய சிறுவர்களுக்காக அப்படியே

அவனியில் வாழவேண்டில்..
பெற்றோர் குரு தெய்வம் போற்றவேண்டும் - சுற்றம்
ஏற்றமாய் வாழ்ந்திட முயலவேண்டும்
அகத்தினிலே அகிம்சை அரும்பவேண்டும் - அது
அன்பின் சொருபமாய் மலரவேண்டும்
அனாதையை ஆர்வமாய் அணைக்கவேண்டும் - அவர்க்கு
அருளாளனாக நீ ஆகவேண்டும்
அன்பனாய் எல்லோரும் ஏற்கவேண்டும் - உன்னை
அறம் நிறைகலமெனப் போற்றவேண்டும்
பாவத்தைப் பகைவனாய் எதிர்க்கவேண்டும் - உயர்
நீதியைத் தெய்வமாய் ஏற்கவேண்டும்
அகிலத்தில் அறவொளி பரப்பவேண்டும் - அதில்
அனேகரின் அகஇருள் அகலவேண்டும்
உயிரிலும் மேலது மானமென்று - உன்
ஒவ்வொரு செயலிலும் நிலவவேண்டும்
வள்ளுவன் வழியிலே வாழவேண்டும் - கலங்கரை
விளக்காக எல்லோருக்கும் உதவவேண்டும்.

முதியோருக்கு
"காவோலை விழ குருத்தோலை சிரிக்குமாம்" ஒரு பழமொழி. இதுவே முதியோரின் நிலைமையை உணராத முதிராதவர்களின் தன்மை.
வாழ்க்கைவட்டத்தில் பருவமாற்றம் இருப்பதை நாம் உணரவேண்டும். இளமை ஒரு நிலா காலம் என்றால் அது முதுமையில் கனா காலம். ஆக இளமையில் நாம் பெரியவர்களுக்கு பெற்றோருக்கு முதியவர்க்கு செய்யும் சேவை அவர்கள் மனம் புண்ணாகாத வண்ணம் அவர்களை பராமரிப்பதும் அவர்கள் கஸ்டங்களை பொறுத்துக்கொள்வதுமே.
இந்த காணொளியை நீங்கள் ஏற்கனவே பார்த்தாலும் இப்போதும் பாருங்கள் மொழி விளங்காவிட்டாலும் விடயம் எதுவென உள்ளத்துள் உறையும் குறும் படம்.



பிறந்தநாளின் போது

கடந்த சில வருடங்களாக எனது பிறந்தநாளை சிறுவர்களோடு கொண்டாடுகிறேன். அவர்கள் விரும்பிய தீன் பண்டங்களை வாங்கி கொடுத்து அவர்களுடன் சேர்ந்து விளையாடி மகிழ்வதை வழக்கமாக்கிக் கொண்டுள்ளேன். கடந்த ஆகஸ்ட் 7 எங்க ஊர் கடற்கரையில் நாம்

பதிவுலக போக்கு
இன்று ஒரு நண்பருடன் அரட்டையில் பகிர்ந்தது உங்களுக்காக

"காதலுக்கு கடலை மாதிரி பதிவர்க்கு புதிய படம்"

'சினிமா ரசனைக்கு மனத்திருப்திக்கு ஆக இருக்கணும் கொஞ்சம் பெரிசா உங்க பிள்ள வளர்ந்ததும் நீங்களே யோசிக்கத்தோன்றும் இல்லையா?'

'அத விட பதிவு எழுதி நீங்க எதை விரும்புறீங்க. பின்னூட்டம் (Comment) வாக்கு(Vote)??
அதை விட அந்தப்பதிவு எல்லோரையும் சென்றடையணும் அந்த செய்தி (message)யாருக்காவது போய்சேரணும்'

'இல்லையேல் பதிவும் சினிமா மாதிரியாகிவிடும் மொக்கையா'
'ரசிப்போம் பாடல்கள் காட்சிகள் கதை வசனம் நடிப்பு அங்கங்கே சிலிர்ப்பு போதும்'
என்னோட பார்வை இது உங்க பதிவு தவறாமல் பார்ப்பேன்
தப்பாக சொல்லியிருந்தால் மனதை காயப்படுத்தினால் ஆறிக்கொள்க'

'பின்னூட்டங்கள் அவசியம் நல்ல பதிவுக்கும் இருக்கணும் இருந்தால் இன்னுமின்னும் பதிவரை வளர்க்கும். இதை யாருக்கும் யாரும் செய்யத்தோன்றணும். நாம தெரிஞ்சவங்களுக்கு மட்டும் காமண்டு அடிப்பது போதாது பதிவுலகம் நல்லதாக வளரமாட்டாது."

சிதறும் சில்லறைகள் - 04 (ஆற்றுப்படுத்தல்)

இன்றைய தினம்:

"உலக இருதய தினம்". இத்தினம் ஒவ்வொரு வருடமும் செப்டெம்பர் 26 ஆந்திகதி 1999/ ஆண்டிலிருந்து கொண்டாடப்படுகிறது.
இவ்வருடத்திற்கான தொனிப்பொருள் "ஆரோக்கியமான வேலைத்தளத்தில் உங்களுடைய இதயத்திற்கு பொறுப்பானவர்களாய் இருங்கள்"
"Workplaces Wellness: Take responsibility for your own heart health"

"World Heart Day, which used to take place every year on the last Sunday in September, is organized by the World Heart Federation, and has been celebrated annually since 1999^. As of 2011, World Heart Day is celebrated every 29 September"

நமது மனம் கஸ்டப்படும் பொழுதுகளில் எமது இதயம் பலவீனப்படும் என்பது யாவரும் அறிந்ததே.அண்மைக்காலமாய் பல வேதனைகளில் துன்புறும் போது நமது இதயம் பாதிக்கப்பட்டு பல இதய நோய்களுக்கு ஆளாகிக் கொண்டிருப்படுத்தை அனேகர் அறிந்துகொண்டிருக்கிறார்கள். ஆனாலும் இதய நோய்களுக்கு காரணம் பல இருக்கலாம். மனவேதனைகளும் இதயத்தை பலவீனப்படுத்துவதை தவிர்ப்பதற்கே இத்தினம் கொண்டாடப்படவேண்டிய தேவையும் இவை பற்றிய ஒரு விழிப்புணர்ச்சியும் அவசியம். அனேகமாக சமுதாயம் என்ற சமூகச் சூழலில் நாம் வாழவேண்டிய பொழுது இன்ப மற்றும் சந்தோசச் சாயத்தைப் பருகிக்கொள்ள முடியாமல் இருப்பதாலேயே பல சிக்கல்களுக்கும் மன உளைச்சல்களுக்கும் நாம் ஆளாகின்றோம். இதற்காக நான் எங்கேயோ கேட்ட விடயம் இதயபலவீனமாவர்களுக்கு அல்லது இதய நோயாளிகளுக்கு "இசை" மருத்துவம் மிகச் சிறந்தது.
ஆனாலும் இதயச்சுமை மனதினால் ஏற்றப்படும் வலி இவற்றைக்குறைப்பதற்கு சரியான தொடர்பாடல், இளகிய சொல்லாடல், இனிமை ததும்பும் பேச்சு, புன்சிரிப்புடனான உறவு, கோபம்,ஆத்திரம் தவிர்த்து உறவாடும் போது மற்றவர்களின் மனதை வருடும். அவாகளிகன் இதயத்தின் வலிகளை நாமே குறைக்கலாம். அவ்வாறே நமது இதயமும் இலேசாகும் என்பது வலிமை தருகிறது.

என் பாரம் அதிகரிக்கும் தருணங்களில் அம்மா அப்பாவிடம் அழுதுவிடுவேன் அவர்கள் எனக்காக பகிரும் அந்த பாசத்தில் அதிக சுமைகளைக் குறைக்க நேரிட்டாலும் இது எனது பலவீனத்தைக் காட்டுவதாய் உணர்கிறேன்.

ஆனாலும் மற்றவர்கள் உளரீதியாக கஸ்டப்படும் பொழுது அவர்களை ஆற்றுப்படுத்தல் சிறந்தது. அது அவா்களுக்கு எப்போதும் துணையாக நீங்கள் இல்லாவிட்டாலும் உங்கள் சொற்கள் அவர்களை எப்போதும் இயல்பாக வைத்திருக்க உதவும் என்பது எனது அனுபவம்.
அதேபோல் நமது மனக்கஸ்டங்களுக்கு பரிகாரமாய் நாம் ஒவ்வொருவரும் மாற்றுவழிகளைக் கையாளும் போது மற்றவர்களைப் பாதிக்கா வண்ணம் இருக்கவேண்டும்.இல்லையேல் மாற்று வழியே மாறுதலாகிவிடும்.

நேற்றைய பொழுது
எங்க ஊர் பாலமுருகனுக்குத் திருவிழா. அதற்காக பட்டெடுத்தல் நிகழ்வு நடைபெற்றபொழுது பிடித்த ஒரு மாலைநேரக்காட்சி.

"மூன்று நாள்
சொர்க்கம்" -சுஜாதா

பாடசாலை மாணவர்கள் அவசியம் வாசிக்கவேண்டிய ஒரு புத்தகம் அழகாக சித்தரித்து எழுதியிருக்கிறார் சுஜாதா. வாசிக்கும் போதே இது நம்ம பார்த்த சம்பவம் போல இருக்கு
என்கிற உணர்வை எத்தனிக்கிறது. வாசிக்கவேண்டும் அனைவரும். கதைகள் புனைவுகள் என்றாலும் கருத்துக்கள் ஆழம் பார்க்கப்படவேண்டியது.
சாண்டில்யனின் சரித்திர நாவல்களில் புதைந்த மனது இப்போது சில தடங்களில் சமூகத்தில் பாய்கிறது.

நிலைபேறாத்தன்மை

பெரும் புலமை வாதிகள் தாங்கள் முன்னேறி எங்கள் கலை இலக்கிய நிகழ்வுகளை வெளிநாடுகளுக்கும் பேட்டிகளுக்கும் கொண்டுசெல்வதை வரவேற்கிறேன்.ஆனால் அவர்களால் ஏதாவது அதே நிகழ்வை எமது கிராமமட்டங்களில் செய்யமுடியாமல் இருப்பது, அல்லது செய்யத்துணியாமல் இருப்பது வருந்தத்தக்க விடயம்.

அதேபோல் தங்களுக்கு பின் வாரிசாக தங்கள் பிள்ளை அல்லது உறவினன் மட்டும் வரவேண்டும் என்று எண்ணிக்கொள்வது எமது கலை இலக்கியங்களின் நீடித்து நிலைக்கமுடியாத தன்மையைக் காட்டுகிறது. நிறையத் திறமையுள்ள மாணவர்களை வழிநடத்தாமல் இருப்பது கவலையளிக்கிறது. அவர்களுக்கு உந்துகோலாக இருக்காமை வெறுக்கிறது எனக்கு.

இது பல்கலைக்கழக மட்டத்திலிருந்து எங்கும் இருக்கும் விடயம். தாங்கள் புலமை வாதிகள் என்றால் அந்த நூற்றாண்டு அப்படியே அவர்கள் மட்டுமே வாழவேண்டும். தங்கள் காலத்தில் வேறு ஒரு மாணவனை உருவாக்க வேண்டும் என்ற முனைப்பில் அனேகர் இல்லை.இதனை விளங்கிக்கிக்கொண்டு நீடித்து நிலைக்கவேண்டிய தன்மையை ஏற்படுத்த முயலவேண்டும் என்பது எதிர்பார்ப்பு.

சிலருக்காக அல்லது சிந்தனைக்காக

மு.மேத்தாவின் சில வரிகள்

"நான் எனக்குள்ளேயே செத்துப்போனாலே தவிர
என்னை எவராலும் புதைத்துவிட முடியாது என்பதை நான் புரிந்து வைத்திருக்கிறேன்.
அதனால் தான் - நான் இழப்புக்களின் மத்தியிலும் எழுந்து நிற்கிறேன்.
சோகங்களில் மூழ்கிப் போகாமல் சுறுசுறுப்போடு சுற்றி வருகிறேன்."

சிதறும் சில்லறைகள் - 03

இன்றைய தினம்:
சர்வதேச ஓசோன் தினம் (16-09-2010) ஓசோனுக்காய்..... என்று நான் சென்ற வருடம் எழுதிய பதிவு வாசிக்தத்தவறியவர்களுக்காக இங்கு போய்க் காண்க ஓசோனுக்காய்......

திறந்த வெளியில்
நீ
என் காவலனாய் ....
போர்வை போர்த்தியதும்
நிறமற்றவனாய்
நின்றபோதும்...

உணர்கிறேன்
தட்ப வெப்பநிலை மாற்றம்
உறை பனியில் உருக்கம்
மழைவீழ்ச்சியில் சுருக்கம்

இப்போதுதான்
தெரிகிறது
உன்னில் விழுந்த
ஓட்டைகளுக்கும்
கிளிஞல்களுக்கும்
காரணம்
நான் ஆனதற்காக
வருத்தப்படுகிறேன்

இன்று என்னை வளர்த்து ஆளாக்கிய என்னோடு என்றும் இருக்கும் என் சின்னம்மாவின் பிறந்தநாள் அவருக்கு எனது இனிய வாழ்த்துக்கள் அன்ரி..

எங்க ஊர்த்திருவிழா

எங்க ஊரில் பால முருகன் கோயில் அலங்காரத்திருவிழா நேற்று முன்தினம் ஆரம்பமாகியது கொடியேற்றத்துடன்...

அனுபவம்
எதிர்மறை சிந்தனைகளில் இருந்து எப்படி விடுபடுவது என்பது இன்று எனக்கு மிகவும் கஸ்டமாக இருந்தது. எனது இன்றைய பயணத்தில் சில முரண்பாடான கருத்து மோதல்கள் என் சக நண்பர்களிடம்.
சில வேளைகளில் மெளனமும் மெல்லிய பாடல்களும் என்னைச் சாந்தப் படுத்தும் என்பதை இன்று உணர்ந்துகொண்டேன். நீங்களும் முயற்சிக்கலாமே. வழமையாக பிரச்சனைகள் என்று வந்தால் பொதுவாக ஒதுங்கிக்கொள்ளும் நபர்களில் நானும் ஒருவன். பிரச்சனைகளுக்கு முகம் கொடுப்பதை வெறுப்பவன் அல்ல.
"வாழ்க்கையின் ஒவ்வொரு பிரச்சனைகளும் படிப்பினையும் முன்னேற்றத்தையும் ஏற்படுத்தவல்லவை."

அவ்வாறான பிரச்சனைகளை சவால்களை ஏற்றுகொள்வதில் "தில்" இருக்கும் இதை தவிர்க்கவிருப்பமுமில்லை எனக்கு. ஆனால் தேவையில்லாத முரண்பாடுகளுக்குள் மூக்கு நுழைத்து முட்டிக்ககொள்ள வேண்டிய கட்டாயம் எனக்கில்ல. எதிர்மறைக்கருத்துக்கள் எண்ணங்கள் எப்போதும் நமது எண்ணத்தில் முயற்சியில் எதிர்மறை விளைவுகளை ஏற்படுத்தும் என்பதைக் கருத்தில் கொள்க. நல்லவை நடக்காவிட்டாலும் நல்லவைகளையாவது சிந்திக்கலாமே. மற்றவர்களை உன்னிப்பாக பார்த்துக்கொண்டு அவர்களின் தவறுகளை சுட்டிக்காட்டிக் கொண்டிருப்பதை விட நாமாக முன்னேறப்பார்க வேண்டும். நமது வளர்ச்சியை மேம்படுத்தப் பார்க்கவேண்டும்.

சிந்தனைக்கு

"ஒப்பிடுதைக்காட்டிலும் முன்னேற எத்தனிப்பது மேல் அந்தசிந்தனையை வளர்ப்பது அதை விட மேல்"

மீண்டும் சிதறும் வரை.

உயர உயரப்பறக்கிறேன் ஊர்க்குருவி சிதறுகிறது

"உயர உயரப்பறந்தாலும் ஊர்க்குருவி பருந்தாகுமா??" எதுக்கு அது பருந்தாகணும்? பருந்து ஒரு மாமிசமாய் ஆன மிருகப்பறவை. அழகிய நெல்மணிகளை பொறுக்கி கீச் என்ற சத்தங்கள் அரவிக்கொண்டு ஊர் அழகு ரசித்துக்கொண்டு ஊர் சுற்றித்திரியும் சுறுசுப்பான அந்த ஊர்க்குருவி ஏன் பருந்தாக ஆக எண்ணணும். ஓ.. உயரப்பறந்தால் ஒசந்திரலாமா(உயர்ந்திடலாமா)?????. இல்லை நீ ஊர்க்குருவியாய் இரு. போதும்.

ம்ம்ம்.........

(ஊர்க்குருவியின் கூடு தனது குஞ்சுகளை பொரிப்பதற்காக காத்திருக்கும் பொழுது)

ஏதேதோ அலறுகிறேன் என்று அல்ல. இந்த ஊர்க்குருவி சிறகுகளை உலர்த்திக்கொண்டு 150 ஆவது சில்லறைகளை சிதறிவிடுகிறது இன்றுடன்.

பதிவுலகம் வந்து இத்தனை பதிவு என்பது சொற்பளவு. என்னைவிட எத்தனையோ பதிவர்கள் பல நூறு ஆயிரம் கடக்கிறார்கள். நானும் இங்கு நூற்றம்பதைத்தாண்டுகிறேன் என்பதில் மகிழ்ச்சி.

இதுவரை
பல பதிவுகள் உங்களை வந்தாலும் சில பதிவுகளே சில் என்று சிலிர்த்துக்கொண்டு அல்லது சிவப்பாய் சினத்துக்கொண்டு இருக்கும். என் பதிவுகளில் குறிப்பிட்ட மாற்றங்கள் பலபேரை மாறுதலடையச் செய்துள்ளது என்பது சிதறலின் ஒரு வெற்றி. பல நண்பர்களையும் எனது கிராமத்து உறவுகளையும் பல புலம்பெயர் உறவுகளையும் மனச்சிதறல்களினூடு பெற்றிருப்பது அளவுகடந்த சந்தோசம். தொழிநுட்ப மற்றும் பல்வேறு உதவிகளையும் பல மனதுக்கு ஆறுதலாக நிம்மதியாக பல உணர்வுகளையும் நட்புக்களையும் பெற்றிருக்கிறேன். நன்றி பதிவுலகமே.

மண்வாசனை எமது கிராமத்தின் பல நிகழ்வுகள் இணையவழி கொண்டு உலகெலாம் ஆர்க்க சிதறிய சில்லறைகளாய் ஆன இச்சிதறல்கள் உங்கள் எண்ணங்களில் எங்கோ ஒரு மூலையில் சில வண்ணங்களை பூசிக்கொள்ளும் என நினைக்கிறேன்.

"இந்த சிதறல்கள் வெறும் ஏட்டில் எழுதப்பட்டவை அல்ல
உணர்வுகளின் உயிர்களின் ஆழத்தில் எழுதப்படும் எழுத்துக்கள்"

"எனது பலமும் பலவீனமும் எனக்குத்தான் தெரியும்
என்னைப்பற்றி முழுமையாக தெரிந்து கொண்டவன் நானே ஆதலால்"

ஆதலால் இந்தவெற்றிப்பதிவு எழுதுகிறேன்.


"இனி"
"உங்கள் துயரத்தின் பாதியையேனும் குறைக்காவிட்டாலும் நான்
வழிகின்ற கண்ணீரின் ஈரத்தை துடைக்கின்ற கைகளாய் இருக்கவேண்டும்" என்று ஆசைப்படுகிறேன்.

"தபுசங்கரின்" "எனது கறுப்புப்பெட்டி" என்ற கவிதை தொகுப்பிலிருந்து..........

எத்தனை முறை வீழ்த்தினாலும்
கடைசியில்
நடக்கக் கற்றுக் கொடுத்தவிட்டது
நடைவண்டி

எத்தனை முறை கவிழ்த்தாலும்
கடைசியில்
ஓட்டக் கற்றுக் கொடுத்துவிட்டது
மிதிவண்டி

எத்தனைமுறை வீழ்த்தினாலும்
எத்தனைமுறை கவிழ்த்தாலும்
கடைசிவரை
வாழக் கற்றுக் கொடுக்கவில்லை
வாழ்க்கை

அற்புதமான வைரங்கள் அந்த கறுப்புப் பெட்டிக்குள்ளே புதைந்துகிடக்கிறது கவிதை வரிகள். இது பதிவுலகத்துக்கும் பொருந்தும் என நினைக்கிறேன்.

எனது பதிவைப்பார்த்து எனது உறவுக்கார அண்ணா தொலைபேசி அழைப்பெடுத்து அதிக புத்தகங்களை வாசியுங்கள் இன்னுமின்னும் அழகாக எழுதமுடியும் வாழ்க்கையையும் என்றார். இந்த விடயம் என்னுள் சேருமுன்னர் நான் சொற்பளவே புத்தகங்களை வாசித்திருக்கிறேன். பின்னர் எங்கு பயணம் செய்தாலும் ஏதாவது புத்தகங்களை வாங்க மறுப்பதில்லை. நன்றி அண்ணா.

அழகியது கிராமம்
அலைகிறது மனம்
இன்னும் கண்டுகொள்ளாமல்

எப்போதும் எனது கிராமத்தை நேசிப்பவன் அதன் எழில் கொஞ்சும் அழகுகளை அடிக்கடி ரசிப்பேன். அதே போல் நிகழ்வுகளின் நிஜப்பதிவாய் இருக்கப்பார்ப்பேன் அதனால் ஊரில் நிகழ்வுகளையும் உங்கள் கண்முன் கொண்டுவர முயற்சி எடுப்பதில் மகிழ்ச்சிகொள்ளும் இந்த சிதறல்கள். இன்னும் சிதறிக்கொள்ளும்.

ஆனாலும் இன்னும் பல விடயங்கள் எழுதப்படவேண்டும் என்று.........
எமது பாரம்பரிய விழுமியங்கள் இதுவரை இணையத்தரவேற்றம் செய்ப்படாத விடயங்கள், நாம் அறிந்து இன்னும் எழுதப்படாத விடயங்கள், ஆங்கிலத்தில் எழுதப்பட்ட நல்லபல தகவல்கள் மொழிபெயர்த்து அதன் இருப்பிடங்கள் சொல்லிக்கொண்டு, இன்னும் நமது பழைய அனுபவசாலிகளின் படைப்புக்கள், எமது பிள்ளைகளின் திறமைகள்....... என்று பல்வேறு சில்லறைகளை சிதறவேண்டும் என்று எனக்குள்ளே கேட்டுக்கொண்டு முடிந்தளவு எழுதவேண்டும் என்று இந்த ஊர்க்குருவி உயரப்பறக்கிறது சிதறல்களாலே.